¿ToTeotsij iTlanauatijkayo eltok ipan toyolo?
Tlen Biblia kiijtoua
ToTeotsij iTlanauatijkayo amo eli se tlamantli tlen eltok ipan toyolo. a Biblia kiijtoua kanke eltok uan kitokaxtia “kampa tlanauatia toTeko tlen itstok iluikak” (Mateo 4:17). Nojkia kiijtoua eli se tlanauatijkayotl tlen tekichiua iluikak. Ma tikitakaj.
Ipan toTeotsij iTlanauatijkayo itstokej katli tlanauatiaj, katli kinnauatiaj uan kipiaj tlanauatili. Uan nopa tlanauatijkayotl mosentlalijtok ma mochiua tlen toTeotsij kineki ipan iluikaktli uan ipan Tlaltipaktli (Mateo 6:10; Apocalipsis 5:10).
ToTeotsij iTlanauatijkayo kinnauatis “nochi tlakamej ipan nochi tlaltinij, uan tlakamej tlen kimatiyayaj nochi tlajtoli ipan Tlaltipaktli” (Daniel 7:13, 14). Ni tlanauatijkayotl amo kitlalijtokej maseualmej, toTeotsij kitlalijtok uan kimakatok tlanauatili uan kiampa tlanauatis ipan nochi Tlaltipaktli (Salmo 2:4-6; Isaías 9:7).
Jesús kiniljuik iapóstoles tekichiuaskiaj iuaya ipan toTeotsij iTlanauatijkayo ne iluikak. ¿Tlake kichiuaskiaj? Ya kiniljuik: “Niinmechseuis ipan sillas tlen yejyektsi”, ni kiijtosneki tlanauatisej iuaya (Lucas 22:28, 30).
ToTeotsij iTlanauatijkayo kintsontlamiltis ikualankaitakauaj (Salmo 2:1, 2, 8, 9; 110:1, 2; 1 Corintios 15:25, 26).
Uajka, Biblia amo tlamachtia tlaj toTeotsij iTlanauatijkayo tlanauatia ipan toyolo. Nopa kiijtosneki amo eltok ipan toyolo nopa tlanauatijkayotl. Biblia kena tlamachtia nopa “kuali tlamachtili tlen kejatsa eltos kema toTeko tlanauatia” o “kejatsa toTeko tlanauatia” moneki techyololinis tijtekipanosej toTeotsij (Mateo 13:19; 24:14).
¿Uan kenke Jesús kiijtok: “ToTeko tlanauatia ipan ininyolo tlakamej”?
Ipan sekinok Biblias kitlajtolkueptokej tlen kiijtoua Lucas 17:21 kej “toTeko tlanauatia ipan ininyolo tlakamej”. Yeka, miakej maseualmej moiljuiaj toTeotsij iTlanauatijkayo tlanauatia ipan ininyolo. Tlaj tijnekij tijkuamachilisej ni texto moneki tikitasej tlen kiijtoua achtoui.
Nopa tlakamej katli kinekiyayaj kimiktisej Jesús amo ueliskia kipixtosej toTeotsij iTlanauatijkayo ipan ininyolo
Jesús kiniljuik fariseos tlen kiijtoua nopa texto. Inijuantij tlauel kikualankaitayayaj uan kinekiyayaj kimiktisej (Mateo 12:14; Lucas 17:20). ¿Kinejki kiniljuis nopa amo kuali tlakamej kipixtoyaj toTeotsij iTlanauatijkayo ipan ininyolo? Amo, pampa ya kiniljuik: “Axneli inkuajkualmej, pampa fiero inmoyolo. San inkichiuaj ome inmoixayak” (Mateo 23:27, 28).
Ipan sekinok biblias kuali kitlajtolkueptokej tlen kiijtoua Lucas 17:21. El Nuevo Testamento original kiijtoua: “ToTeotsij iTlanauatijkayo ya itstok inmonechka”, uan nopa Traducción del Nuevo Mundo de las Santas Escrituras (con referencias) kiijtoua: “ToTeotsij iTlanauatijkayo ya itstok inmouaya” (xikita nopa nota). Uajka, ¿kenke toTeotsij iTlanauatijkayo itstoya ininnechka o ininuaya fariseos? Pampa Jesús, katli toTeotsij kitlapejpenijtoya ma eli tlanauatijketl, itstoya ininuaya (Lucas 1:32, 33).
a Miak religiones tlamachtiaj toTeotsij iTlanauatijkayo eltok ipan ininyolo maseualmej. Ipan Estados Unidos onka se religión tlen kiixmatij kej Convención de Bautistas del Sur uan inijuantij kiijtouaj toTeotsij iTlanauatijkayo “tekichiua ipan ininyolo maseualmej uan kinyakana ipan ininnemilis”. Uan ipan nopa amochtli Jesús de Nazaret, nopa papa Benedicto XVI kiijtok: “ToTeotsij iTlanauatijkayo asi ipan iyolo se katli kitlakakilia tlen Biblia kiijtoua. Ya nopa iojui”.
Tlen nojkia mitspaktis tikitas
TLAMACHTILI TLEN TLAUEL IPATI
¿Tlake nopa toTeotsij iTlanauatijkayo?
Kema Jesús itstoya ipan Tlaltipaktli, nelia tlauel tlamachtik tlen ToTeotsij iTlanauatijkayo. Uejkajtok miak xiuitl maseualmej momaijtojtokej pampa kinekij ma asi nopa Tlanauatijkayotl.
TLEN TEMATILTIA
¿Ajkia tekichiuas ipan toTeotsij iTlanauatijkayo?
Miakej katli kiijkuilojkej Biblia kiijtojkej se keski tlamantli tlen techpaleuiskia ma tijmatikaj ajkia tlanauatiskia ipan toTeotsij iTlanauatijkayo. Nochi tlen kiijtojkej moaxitik ipan Jesucristo.
TLEN BIBLIA TLAMACHTIA
Xikita kenijkatsa titlamachtiaj
Xijtlajtlani ma mitsmachtikaj ika Biblia uan kiampa tijyekojtias miak tlamantli.