Istlakatili: Jehová itlajtoltemakauaj amo iljuichiuaj ipan Navidad pampa amo tlaneltokaj ipan Jesús.

 Tlen melauak: Tojuantij tielij Cristo itokilijkauaj uan temachtli tijmatij san Cristo uelis techmakixtis (Hechos 4:12).

  Istlakatili: Kiniljuiaj katli kinmachtiaj amo ma iljuichiuakaj ipan Navidad uan yeka ayokmo kuali mouikaj ininuaya ininchampoyouaj.

 Tlen melauak: Tojuantij tlauel tijpatiitaj tiitstosej ininuaya tochampoyouaj uan yeka tijchiuaj tlen Biblia techtlajtolmaka pampa kiampa kuali timouikasej.

  Istlakatili: Amo moyolpakiltiaj ipan Navidad, maske ipan nopa tonali timomajmakaj miak tlamantli, tijpiaj tlaseuilistli uan nochi kuali timouikaj.

 Tlen melauak: Tijchiuaj kampeka mojmostla kuali timouikasej uan titeiknelisej (Proverbios 11:25; Romanos 12:18). Yeka amo titlajtlanij tomij kema timonechikouaj uan amo titlainamaj kema titlajtolmoyauaj, pampa tijneltokaj tlen Jesús tlanauatik: “Axkema xitlainamakaj” (Mateo 10:8). Uan nojkia tijmoyauaj san toTeotsij iTlanauatijkayo uelis kichiuas ma tiitstokaj ika tlaseuilistli (Mateo 10:7).

•   Pampa Jesús tlanauatik ma kiilnamikikaj imikilis, amo kema tlakatki (Lucas 22:19, 20).

•   Apóstoles uan sekinok Jesús itokilijkauaj amo iljuichiuayayaj ipan Navidad. Kej kiijtoua nopa Diccionario del cristianismo, nopa iljuitl “kipeualtijkej kichiuaj ne Roma ipan xiuitl 330” teipa kema ya ualajtoya Jesús, kipano doscientos xiuitl kema tlami mijkej apóstoles.

•   Amo onka yon se tlenijki tlen kinextia Jesús nelia tlakatki ipan diciembre 25; Biblia amo kiijtoua tlake tonali tlakatki.

•   Tijmatij toTeotsij amo kineki ma tiiljuichiuakaj ipan Navidad, pampa katli pejkej kichiuaj kinueyichiuayayaj sekinok teotsitsij uan kichiuayayaj tlen amo kuali (2 Corintios 6:17).

 Maske miakej maseualmej kimatij Biblia amo kiijtoua ma tiiljuichiuakaj ipan Navidad uan ajkia pejkej kichiuaj, nojua iljuichiuaj pampa moiljuiaj amo kenijki tlaj kichiuasej. Yeka sekij kiijtouaj: ¿Kenke Cristo itokilijkauaj amo iljuichiuaj kej sekinok?

 Biblia techiljuia moneki toselti tijtlapejpenisej tlake tijchiuasej (Romanos 12:1, 2). Nojkia technextilia kenijkatsa uelis tijpatiitasej tlen Biblia tlamachtia (Juan 4:23, 24). Maske tijtlepanitaj tlen sekinok moiljuiaj, tojuantij tijnekij tijneltokasej tlen Biblia techtlajtolmaka maske miakej amo kichiuaj.

 Maske tojuantij amo tiiljuichiuaj ipan Navidad, amo tikiniljuiaj sekinok amo ma iljuichiuakaj, inijuantij kimatij tlaj kichiuasej o amo.