1 Corintios 15:1-58
-
Keman Cristo oksepa nemik (1-11)
-
Moneki titakuaujtamatiskej ke mikemej oksepa nemiskej (12-19)
-
Kemej Cristo oksepa nemik techyekmatiltia ke mikemej oksepa nemiskej (20-34)
-
Tein poui nikan taltikpak uan tein poui ne iluikak (35-49)
-
Tein amo ueli miki uan tein amo uejueliui (50-57)
-
“Nochipa xikchiujtokan itekiuj toTekotsin” (58)
15 Nokniuan, axkan namechelnamiktia kuali tanauatilmej* tein namechixmatiltij, tein nankineltokakej uan tein amo nankikauaj.
2 No namomakixtiaj komo nankisentokaj nankineltokaj kuali tanauatilmej tein namechixmatiltij. Komo amo, nenkaj peuak nantaneltokaj.
3 Porin tein okachi tayekantok tein namechixmatiltij yejua tein nejua no nechmatiltijkej: ke Cristo momikilij para kiixtauas totajtakoluan, kemej kijtoua Tajkuilolamatsin;
4 ke kitokkej uan ke eyi tonal satepan oksepa nemik,* kemej kijtoua Tajkuilolamatsin,
5 uan ke monextij iixpan Cefas* uan satepan ininixpan 12 tatitanilmej.
6 No monextij ininixpan panoua 500 tokniuan akin senyetoyaj, miakej touan yetokejok, maski sekin momikilijkejya.*
7 Satepan monextij iixpan Santiago; ompa ininixpan nochin tatitanilmej.
8 Keman monextijkaya ininixpan nochin, no monextij noixpan, yejua ika nejua nitamati kemej se konetsin tein yoli achto ke ajsis tonal.
9 Porin nejua okachi amo niueyichiujkej ke okseki tatitanilmej, uan amo nechnamiki maj nechnotsakan tatitanil, porin nikintajyouiltij akin pouij itech inechikol Dios.
10 Sayoj ke kemej Dios nechnextilij itatiochiualis tein amo technamiki, ueli nikchiua nejin tekit. Uan tatiochiualis tein nechnextilij amo nenkajtik, porin nitekitini okachi ke nochin tatitanilmej. Sayoj ke nejin tekit amo nikchiua ika nochikaualis, ta ika tatiochiualis tein Dios nechnextilij.
11 Yejua ika, yeski nejua oso yejuan akin tanojnotsaj, sayoj se taman tein tikteixmatiltiaj uan ijkon namejuan nantaneltokakej.
12 Komo moteixmatiltijtok ke Cristo oksepa nemik, ¿keniuj nansekimej nankijtouaj ke mikemej amo oksepa nemiskej?
13 Tein melauj, komo mikemej amo oksepa nemiskej, Cristo amo no oksepa nemik.
14 Sayoj ke, komo Cristo amo oksepa nemik, nenkaj titanojnotstinemij uan no nenkaj nantakuaujtamatij.
15 Uan no, komo akin momikilijkejya tein melauj amo oksepa nemiskej, Dios amo no kichiuak maj oksepa nemi Cristo, uan nejon kijtosneki ke tiktakajkayauilijtokej Dios keman tikijtouaj ke kichiuak maj oksepa nemi Cristo.
16 Porin komo akin momikilijkejya amo oksepa nemiskej, Cristo amo no oksepa nemik.
17 Uan no, komo Cristo amo oksepa nemik, nenkaj nantakuaujtamatij uan ayamo kiixtauaj namotajtakoluan.
18 Komo ijkon, akin pouij iuan Cristo uan momikilijkejya* amo no keman oksepa nemiskej.
19 Komo titakuaujtamatij iuan Cristo sayoj axkan keman tiyoltokej, yekmelauj semi titeikneltijkej.
20 Sayoj ke, Cristo yejua akin yekinika oksepa nemik* tein kinextia ke akin momikilijkejya* no oksepa nemiskej.
21 Kemej peuak timomikiliaj itechkopa sayoj se takat, akin momikilijkejya no oksepa nemiskej itechkopa sayoj se takat.
22 Porin ijkon kemej itechkopa Adán nochin momikilijtokej, no ijkon itechkopa Cristo nochin oksepa nemiskej.
23 Sayoj ke sejse motojtokatias ijkuin: Cristo achto,* uan satepan akin pouij iuan Cristo, keman mokepasya.*
24 Uan keman tamis, yejua kimaktilis Taixyekanalis iDios uan iTajtsin, keman kiixpolos nochi tataman taixyekanalis, tanauatil uan chikaualis.
25 Porin yejua moneki tekiuajtis hasta keman Dios kintalis imetstampa nochin akin kitauelitaj.
26 Satepan ke ixpoliuiskej nochin taixnamikinij, mikilis no ixpoliuis.
27 Porin Dios “kitalij nochi imetstampa Cristo”. Sayoj ke, keman kijtoua ke “kitalij nochi imetstampa”, amo ika tajtojtok Dios, porin yejua akin kitalij maj kiixyekana nochi.
28 Uan keman iKoneuj kiixyekanasya nochi, yejua no mokauas maj kiixyekana Dios, akin kimaktilij nochi. Ijkon sayoj Dios kiixyekanas nochi.
29 Komo amo ijkon yeskia, ¿toni kichiuaskej akin moauiaj para momikiliskej? Komo akin momikilijkejya amo oksepa nemiskej, ¿keyej yejuan no moauiaj sayoj para momikiliskej?
30 ¿Uan keyej nochipa no tietokej tamouililpan?
31 Mojmostaj nikita ke nimikiti. Nejon melauak, ijkon kemej no yekmelauj namoka niyolpaki nokniuan, nanimomachtijkauan toTekotsin Cristo Jesús.
32 Komo nejua, ijkon kemej oksekin,* nimoteuij iniuan koujtajtapialmej ompa Éfeso, ¿toni ika nechpaleuia nejon? Komo akin momikilijkejya amo oksepa nemiskej, “maj titakuakan uan maj titatayikan, porin mosta timikiskej”.
33 Maj amo namechkajkayauakan. Komo namouikaj iniuan akin amo yolkualmej, amo nankichiuaskejok tein kuali tein ipa nankichiuaj.
34 Xiyektanemilikan uan xikchiuakan tein kuali yetok uan amo xitajtakojtokan, porin sekin amo kiixmatij Dios. Namechiluia nejin para ximopinaujmatikan.
35 Sayoj ke aksa* xa kijtos: “¿Keniuj oksepa nemiskej akin momikilijkejya? Kemaj, ¿keniuj moitaskej keman oksepa nemiskej?”
36 ¡Amo titanemilia! Tein tiktoka amo ixua komo amo achto palani.*
37 Uan amo tiktoka teisa tein moskaltijya ta tiktoka se xinach, yeski trigo oso okse taman xinach.
38 Sayoj ke Dios kichiua maj moskalti kemej yejua kineki uan tataman kemej moskaltia sejse xinach.
39 Takamej uan siuamej, tapialmej, totomej uan pescados* tataman ininnakayo.
40 Onkakej akin pouij ne iluikak uan akin pouij nikan taltikpak, sayoj ke ininkualtsinyo akin pouij ne iluikak amo kemej ininkualtsinyo akin pouij nikan taltikpak.
41 Tataman ininkualtsinyo tonaltsin, metsti uan sitalimej. Tein melauj, sejse sitalin tataman ikualtsinyo.
42 No ijkon mochiua iniuan akin oksepa nemij. Tein se kitokati uejueliui, sayoj ke tein oksepa nemi amo uejueliui.
43 Tein se kitoka tepinaujtij, sayoj ke tein oksepa nemi kiueyitaliaj. Tein se kitoka amo chikauak, sayoj ke tein oksepa nemi chikauak.
44 Tein se kitoka poui nikan taltikpak, uan tein oksepa nemi poui ne iluikak. Komo onkakej akin pouij nikan taltikpak, no onkakej akin pouij ne iluikak.
45 Ijkuiliujtok ijkuin: “Yekinika takat Adán mochiuak se takat akin yoltoya”. Uan okse Adán,* mochiuak kemej akin pouij ne iluikak uan kichiua maj se nemi.
46 Sayoj ke, tein poui ne iluikak amo achto mochiua. Tein poui nikan taltikpak yejua tein achto mochiua uan satepan tein poui ne iluikak.
47 Yekinika takat pouik nikan taltikpak, uan kichijchiujkej ika talnex; ojpatika takat poui ne iluikak.
48 Akin nemij nikan taltikpak tamatij kemej akin Dios kichijchiuak ika talnex; akin pouij ne iluikak tamatij kemej akin yajki iluikak.
49 Uan ijkon kemej titamatij kemej akin kichijchiujkej ika talnex, no tiyeskij kemej akin yajki iluikak.
50 Sayoj ke, nokniuan, namechiluia nejin: nakat uan esti amo ueli kalakij itech iTaixyekanalis Dios nion tein uejueliui ueli mochiua kemej tein amo uejueliui.
51 ¡Xikitakan! Namechiluiti se taman tein Dios amo kitematiltijtoya:* amo tinochin timomikiliskej,* sayoj ke Dios techpatas tinochin
52 ijsiujka, kemej ijkuak se ijkoptiuetsi, keman kipitstoskej trompeta tein ika tatami. Porin trompeta kakistis uan akin momikilijkejya oksepa nemiskej uan amo uejueliuisok ininnakayo, uan tejuan Dios techpatas.
53 Porin nejin tein uejueliui moneki mochiuas kemej tein amo uejueliui, uan tein ueli miki moneki mochiuas kemej tein amo ueli miki.
54 Sayoj ke, keman nejin tein uejueliui mochiuas kemej tein amo uejueliui uan tein ueli miki mochiuas kemej tein amo ueli miki, mochiuasya tein ijkuiliujtok: “Mikilis ixpoliui* nochipaya”.
55 “Mikilis, ¿kani yetok mochikaualis? Mikilis, ¿kani yetok tein ika titetajyouiltia?”.*
56 Tein kichiua maj se miki yejua tajtakol, uan iTanauatil Moisés kichiua maj tajtakol kipia chikaualis.
57 ¡Sayoj ke tiktasojkamatiliaj Dios porin techpaleuia maj titatanikan itechkopa toTekotsin Jesucristo!
58 Yejua ika, nokniuantsitsin, xiksentokakan xiyekijkatokan, amo ximotsinkixtikan uan nochipa xikchiujtokan itekiuj toTekotsin, uan xikmatikan ke amo nenkaj nankitekitilijtokej toTekotsin.
Tajtolmelaualismej
^ Oso “tajtolmej”.
^ Itech griego, “moajokuik”. Nejin mokuis itech nochi capítulo.
^ No monotsa Pedro.
^ Itech griego, “kochkejya”.
^ Itech griego, “kochkejya”.
^ Itech griego, “yekinika takilot”.
^ Itech griego, “kochkejya”.
^ Tajtol griego, parousía. Xikonita keman Cristo mokepasya.
^ Itech griego, “yekinika takilot”.
^ Oso xa “ijkon kemej tanemiliaj nikan taltikpak”.
^ Oso “akin”, “akaj”.
^ Itech griego, “miki”.
^ Oso “amichimej”.
^ Nikan ika motajtojtok Jesús.
^ Xikonita tein Dios amo kitematiltijtoya.
^ Itech griego, “tikochiskej”.
^ Itech griego, “kitolouaj”.
^ Oso “tein ika titetipinia (titetsoponia)”.
