1 Corintios 16:1-24
16 Axkan ika nitajtoti tomin tein mosentilia para akin Dios moinxelouilij.* Xikchiuakan ijkon kemej nikinnauatij tokniuan itech nechikolmej ompa Galacia.
2 Itech tonal keman peua semana, nansejsemej moneki nankixeloskej tepitsin tomin ijkon kemej nanueliskej, ijkon keman niajsis amo monekisok nankisentilijtoskej tomin.
3 Uan keman niajsis ompa, nikintitanis sekin maj yakan Jerusalén maj kiuikakan tomin tein nankitemakakej ika pakilis. Nikintitanis akin namejuan nankijtoskej itech namoamatajkuilol ke takuaujtamachmej.
4 Sayoj ke, komo moneki maj no niouj, yejuan nouan yaskej.
5 Nias namechitatiuj keman nipanos Macedonia, porin nipanoti Macedoniajkopa,
6 uan xa nimokauas namouan seki tonalmej oso xa hasta keman panos tonalmej keman taseseya, para tepitsin xinechnalkauatij kampa nias.
7 Porin axkan amo nikneki sayoj namechitstikisas, ta nikchia namouan nietos seki tonalmej, komo Jehová* kineki.
8 Ipa nimokauati nikan Éfeso hasta iluit tein monotsa Pentecostés
9 porin kemej yeskia taueyika nechtatapouilijkej para okachi nitekitis, sayoj ke miakej taixnamikij.
10 Komo ajsi Timoteo, xikpaleuikan para maj nion tepitsin motekipacho keman yetos namouan, porin yejua kichiujtok itekiuj Jehová,* ijkon kemej nejua.
11 Yejua ika, maj amo akin kiixtopeua. Xiknalkauakij tepitsin para nechitakiuj, porin nikchixtok* iniuan tokniuan.
12 Semi niktataujtij tokniuj Apolos maj namechitati iniuan tokniuan. Yejua amo kinemilijtok yas axkan, ta yas keman uelis.
13 Xiijsatokan,* xiksentokakan semi xitakuaujtamatikan, xiyolchikaujkej uan xichikaujkej.
14 Xikchiuakan nochi porin nantetasojtaj.
15 Nokniuan, axkan moneki namechtataujtis teisa. Namejuan nankimatij ke akin nemij ichan Estéfanas yejuan akin yekinika taneltokakej* ompa Acaya uan no nankimatij ke yejuan kinpaleuijkej ika nochi ininyolo akin Dios moinxelouilij.*
16 Namejuan no ximokauakan maj namechyekanakan tokniuan kemej yejuan uan nochin akin tapaleuiaj uan chikauak tekitij.
17 Niyolpaki porin ualajkej Estéfanas, Fortunato uan Acaico. Yejuan semi nechpaleuijkej keman namejuan amo nanyetoyaj.
18 Yejuan nechyolchikaujkej uan namechyolchikaujkej. Yejua ika, xikinpatiuitakan akin ijkon kichiuaj.
19 Tokniuan itech nechikolmej ompa Asia namechtajpalouaj. Áquila uan Prisca, iniuan tokniuan akin mosentiliaj ininchan, namechtajpalouaj ika miak pakilis kemej imomachtijkauan toTekotsin.
20 Nochin tokniuan namechtajpalouaj. Ximotajpalokan se iuan okse ika se beso* kemej yeskia naniknimej.
21 Nejua Pablo, nikmaijkuiloua nejin tajtolmej tein ika namechtajpaloua.
22 Komo aksa* amo kitasojta toTekotsin, maj kitatsakuiltikan. ¡Totekotsin, timitstataujtiaj xiuiki!
23 Maj toTekotsin Jesucristo namechmaka tatiochiualis tein amo technamiki.
24 Nikneki namechyekiluis ke namechtasojta nanochin akin nanimomachtijkauan Cristo Jesús.
Tajtolmelaualismej
^ Oso “chipaujkej iixpan Dios”.
^ Oso “nikchatok”.
^ Oso “Xitachixtokan”, “Xiixpetantokan”.
^ Oso “yejuan yekinika takilomej”.
^ Oso “chipaujkej iixpan Dios”.
^ Oso “uan ximopitsokan”, “uan ximotenamikikan”.
^ Oso “akin”, “akaj”.
