Génesis 22:1-24
22 Satepan ke panok nochi nejin, toTajtsin Dios kinekia kiitas ox Abrahán semi iuan takuaujtamatia. Yejua ika kiluij: “¡Abrahán!”. Uan yejua kinankilij: “¡Nikan nietok!”.
2 Uan Dios kiluij: “¿Uelis tikchiuas nejin? Xikuika mookichpil Isaac, akin ipa setsin uan semi tiktasojta, uan xiouj itech tal kampa motanotsa Moria. Uan ompa xinechmaktili* itech se tepet tein nimitsnextiliti”.
3 Yejua ika Abrahán semi kualkan meuak, kipejpechtij iburro uan kinnotsak ome itakeualuan para maj kiuikakan yejua uan iokichpil. No kitapanak kouit tein ika kichichinoskia tein yaya kitemaktiti. Satepan kikuik ojti para yas kampa toTajtsin Dios kiluijka.
4 Ome tonal satepan, Abrahán moixajokuik uan kiuejkaitak kampa ajsiskiaj.
5 Uan Abrahán kiniluij itakeualuan: “Nikan ximokauakan iuan burro, uan nejua uan nookichpil tiouij nepa para tikueyichiuaskej Dios. Satepan timokepaskej”.
6 Yejua ika Abrahán kikuik kouit tein ika kichichinoskia tein yaya kitemaktiti uan kimamaltij Isaac. Uan Abrahán kiuikak tekol uan cuchillo, uan peuak nejnemij.
7 Uan Isaac kiluij itat: “¡Paj!”. Abrahán kinankilij: “¿Toni nokonetsin?”. Isaac kiluij: “Tikpiaj tekol uan kouit, sayoj ke ¿kani yetok ichkat* tein tikchichinouilitij Dios?”.
8 Uan Abrahán kinankilij: “Nokonetsin, Dios techmakas ichkat tein tikchichinouiliskej”. Uan kisentokakej nejnenkej.
9 Uan ajsikej kampa toTajtsin Dios kiluijka Abrahán maj youi. Ompa Abrahán kichijchiuak se altar uan ompa kitalij in kouit. Kimailpij uan kimetsilpij* Isaac uan kitalij itech altar tapani den kouit.
10 Satepan, Abrahán kikuik cuchillo para kimiktis ikonetsin.
11 Sayoj ke desde ne iluikak iángel Jehová kinotsak uan kiluij: “¡Abrahán! ¡Abrahán!”. Uan yejua kinankilij: “¡Nikan nietok!”.
12 In ángel kiluij: “Amo teyi xikchiuili mokonetsin, amo xikmikti. Axkan nikyekmati ke yekmelauj tinechmojkatoka, porin yaya tinechmakati mokonetsin, akin ipa setsin”.
13 Uan Abrahán moixajokuik uan kiitak ke tepitsin nepaka yetoya se ichkaueuet tein mokuatsikojka koujtsalan. Yejua ika yajki, kikuik ichkaueuet, kimiktij uan kichichinouilij Dios uan amo kitemaktijok iokichpil.
14 Uan Abrahán tatokaytij kampa yetoyaj Jehová-Yiré.* Yejua ika hasta axkan moijtoua “Itech tepet tein iaxka Jehová, yejua kitemakas tein monekis”.
15 Desde ne iluikak, iángel Jehová oksepa kinotsak Abrahán
16 uan kijtoj: “Jehová kijtoua ‘Nimitsyekiluia notokaykopa ke kemej tikchiuak tein nimitsiluij uan yaya tinechmakati mookichpil akin ipa setsin,
17 yekmelauj nimitstatiochiuis. Uan yekmelauj nikchiuas maj mokoneuan tel miakej kemej sitalimej tein yetokej iluikak, uan kemej xal tein onkak martenoj. Uan no, mokoneuan kintakuiliskej* akin kintauelitaj.
18 Uan inintechkopa mokoneuan, akin nemij itech nochin altepemej motaniliskej se tatiochiualis porin tinechtakamatik’”.
19 Satepan, Abrahán mokepak kampa yetoyaj itakeualuan uan nochin mokepkej Beer-Seba. Uan Abrahán kisentokak ompa nemik.
20 Satepan, kiluijkej Abrahán: “Milcá kinpiak konemej iuan mokniuj Nacor.
21 Akin tayekana monotsa Uz, uan akin kitojtoka monotsa Buz. Okse monotsa Quemuel, itat Aram.
22 Okseki ikoneuan monotsaj Késed, Hazó, Pildás, Jidlaf uan Betuel”.
23 Betuel katka itat Rebeca. Yejuan nejin chikueyi okichpipil tein Milcá kinpiak iuan Nacor, iikniuj Abrahán.
24 Okse isiuatsin* Nacor, akin monotsaya Reumá no kinpiak nejin konemej: Tébah, Gaham, Tahas uan Maacá.
Tajtolmelaualismej
^ Oso “xinechchichinouili kemej se tapialtsin”.
^ Oso “borrego”.
^ Oso “Kimatsikoj uan kimetstsikoj”.
^ Tokayit tein kijtosneki ‘Jehová kitemakas’.
^ Oso “mokuiliskej ininueyi xolal”.
^ Xikonita tajtol okse siuatsin.
