Apocalipsis 21:1-27
21 Uan nikitak se yankuik iluikak uan se yankuik taltikpak; porin iluikak uan taltikpak tein achto yetoyaj ixpoliujkej, uan ueyiat amo yetokok.
2 Uan no nikitak ueyi xolal tein yektik, Yankuik Jerusalén, ualpantemouaya de ne iluikak kampa yetok Dios. Uan chijchiujtoya kemej se novia akin kichixtok* takat akin iuan monamiktiti.
3 Satepan nikakik ke aksa* chikauak ualtajtouaya den ueyi silla uan kijtouaya: “¡Xikita! Dios mokaltaliko* iniuan nochin akin nemij nikan taltikpak. Yejua iniuan nemis uan yejuan pouiskej itech ixolal. Uan Dios yekmelauj iniuan yetos.
4 Uan kinuachilis nochi ininixayo, uan amo akin momikilisok, nion tayokoyas nion chokas nion tajyouis. Tamikya nochi tein achto techtajyouiltiaya”.
5 Akin tokotsyetoya itech ueyi silla kijtoj: “¡Xikita! Nikchijchiujtok nochi yankuik”. No kijtoj: “Xikijkuilo nejin porin tein nikijtoua takuaujtamach uan melauak”.
6 Uan nechiluij: “¡Motamichiuakya! Nejua nipeua uan nejua nitami.* Akin amikis nikmakas maj tayi at tein mextok* tein kichiua maj se nemi uan amo moneki kiixtauas.
7 Akin tatanis nikmakas nejin uan nejua niyeski niiDios uan yejua yeski nokoneuj.
8 Sayoj ke akin mojkamej, akin amo takuaujtamatij, akin pitsotikej uan tetajyaltiaj, temiktianij, akin auilnemij,* akin tanaualuiaj,* akin kinueyichiuaj tatadiosmej* uan nochin akin takajkayauaj kinpantamotaskej kampa kuakualakatok* tit, tein kiixnextia ojpatika mikilis”.
9 Uan nechnojnotsako semej chikome ángeles tein kipiayaj chikome kaxit. Sejse kaxit pexontoya* ika chikome tetsaujmej tein ika tamijya nochin tetsaujmej. Yejua nechiluiko: “Xiuiki, nimitsnextiliti akin iuan monamiktiti Ichkatsin”.*
10 Yejua ika, nejon ángel, ika ichikaualis Dios nechuikak itech se ueyi tepet tein uejkapan uan nechnextilij Jerusalén, ueyi xolal tein yektik ualpantemouaya de ne iluikak kampa yetok Dios,
11 uan kipiaya ikualtsinyo Dios. Petania kemej se tetsin tein semi kualtsin, kemej se tet tein kiluiaj jaspe tein chipaktik kemej teskat.
12 Kiyoualouaya se ueyi tepamit tein uejkapan, uan kipiaya 12 puertas uan itech sejse puerta yetoya se ángel uan itech sejse puerta ijkuiliujtoya 12 inintokay uejueyi kalyetonij israelitas.
13 Kampa kisa tonaltsin kipiaya eyi puertas, ajkokopa kipiaya eyi puertas, tanikopa* kipiaya eyi puertas uan kampa pankalaki tonaltsin kipiaya eyi puertas.
14 Uan no, tepamit tein kiyoualouaya ueyi xolal kipiaya kemej tatsineualoni 12 temej uan itech sejse tet ijkuiliujtoya inintokay 12 itatitaniluan Ichkatsin.
15 Akin nouan tajtojtoya kipiaya se taman tein ika tatamachiuaya, se akat tachijchiuj ika oro, para kitamachiuas ueyi xolal, puertas uan tepamit tein kiyoualouaya.
16 Ueyi xolal kipiaya naui esquinas, ijkon kemej ueyak katka no ijkon katka patauak. Yejua kitamachiuak ueyi xolal ika akat uan ueyak, patauak uan uejkapan katka kemej 2,220 kilómetros.* Nochi kipiaya sayoj se tamachiuj.
17 No kitamachiuak tepamit tein kiyoualouaya: katka kemej 144 molikmej.* Ángel tatamachiuak ijkon kemej tejuan titatamachiuaj.
18 Tepamit chijchiujtoya ika tet tein kiluiaj jaspe uan ueyi xolal chijchiujtoya ika senkis oro, chipaktik kemej teskat.
19 Itatsineualoni tepamit tein kiyoualouaya ueyi xolal chijchiujtoya ika miak taman tetsitsin tein kualtsitsin: yekinika tatsineualoni chijchiujtoya ika jaspe, ojpatika ika zafiro, expatika ika calcedonia, naujpatika ika esmeralda,
20 makuiltika ika sardónica, chikuasentika ika sardio, chikometika ika crisólito, chikueyitika ika berilo, chiknauitika ika topacio, majtaktika ika crisoprasa, majtaktika uan se ika jacinto uan majtaktika uan ome chijchiujtoya ika amatista.
21 Uan no, 12 puertas katkaj 12 uejueyi temej tein kiluiaj perlas; sejse puerta chijchiujtoya ika sayoj se perla. Uan ueyi ojti tein kipiaya ueyi xolal chijchiujtoya ika senkis oro, chipaktik kemej teskat.
22 Amo nikitak nion se templo itech ueyi xolal, porin Jehová* Dios, akin kipia nochi chikaualis uan Ichkatsin yejuan templo.
23 Amo moneki maj tonaltsin uan metsti kitauilikan ueyi xolal, porin ikualtsinyo Dios kitauilia uan itauil yejua Ichkatsin.
24 Akin pouij itech altepemej nejnemiskej ika nejon tauil uan akin tekiuajtij itech taltikpak kikualtsintiliskej nejon ueyi xolal.
25 Nochin tonal amo tatsakuaskej, porin ompa amo tayouayantias.
26 Uan nochin kiueyitaliskej uan kitakachiuaskej nejon ueyi xolal.
27 Sayoj ke amo keman kalakis nion teyi tein amo chipauak nion akin kichiua tein tetajyaltij uan xolopij. Sayoj kalakiskej akin ijkuiliujtokej itech iamatajkuilol* Ichkatsin kampa ixnesij akin nemiskej.
Tajtolmelaualismej
^ Oso “kichatok”.
^ Oso “akin”, “akaj”.
^ Oso “Itankenkal Dios yetok”.
^ Itech griego, “niAlfa uan niOmega, tein ika peua uan tein ika tami”. Itech tajtol griego, alfa yejua letra tein ika peua abecedario uan omega tein ika tami.
^ Oso “ixuatok”.
^ Oso “tiotsitsin”.
^ Oso “molontok”.
^ Oso “mokalakiaj itech tataman naualot”.
^ Xikonita auilnemilis.
^ Oso “temitoya”.
^ Oso “Borrego”.
^ Oso “ataujkopa”, “tauakalkopa”.
^ Itech griego, “12,000 estadios”. Itamachiuj se estadio katka 185 metros.
^ Kemej 64 metros.
^ Itech griego, “iamatatetekuinol”. Xikonita amatatetekuinol.
