Apocalipsis 3:1-22
3 ”Xiktajkuilouili ángel tein kinyekpia tokniuan akin mosentiliaj ompa Sardis: Yejua nejin tein kijtoua akin kipia chikome chikaualismej tein ualeuaj imako Dios uan chikome sitalimej: ‘Nikmattok nochi tein tikchiua uan nikmattok ke mitsitaj ke tiyoltok, sayoj ke tein melauj timiket.
2 Ximotachili uan xikchikaua tein yaya mikitiya, porin nikita ke amo tikchiujtok nochi tein Dios kineki xikchiua.
3 Yejua ika, nochipa xikelnamiki tein mitsmakakej uan tein tikakik. Xiksentoka xiktakamati uan ximoyolpata. Tein melauj, komo amo tiixpetani, nikistiuetsikiuj kemej se tachtekkej uan amo tikmatis toni hora niejkos.
4 ”’Sayoj ke ompa Sardis mouan yetokej sekin akin amo kipitsotilijkej inintasal, uan nouan nejnemiskej ika istak tasal, porin motanilijkej.
5 Akin tatanis, ijkon takentias, ika istak tasal, uan amo keman nikixpolos itokay tein ijkuiliujtok itech amatajkuilol kampa ixnesij akin nemiskej, ta iixpan noTajtsin uan iixpan iangeluan nikijtos ke nikixmati itokay.
6 Akin kipia inakas, maj kikaki tein Dios ika ichikaualis kiniluia tokniuan itech nechikolmej’.
7 ”Xiktajkuilouili ángel tein kinyekpia tokniuan akin mosentiliaj ompa Filadelfia: Yejua nejin tein kijtoua akin yektik, akin melauak, akin kipia illave David, akin keman tatapoua amo akin ueli tatsakua, uan keman tatsakua amo akin ueli tatapoua:
8 ‘Nikmattok nochi tein tikchiua. (Xikita, moixpan niktalij se puerta tein tapotok tein amo akin ueli kitsakua). Uan nikmati ke maski amo semi tichikauak, tinechtakamatik uan amo tikixtopeuak notokay.
9 Xikita, yejua nejin tein nikinchiualtis akin pouij itech inechikol Satanás, akin kijtouaj ke judíos sayoj ke amo judíos, ta takajkayauaj: nikchiuas maj moixpilokij moixpan,* uan nikinmatiltis ke nimitstasojta.
10 Kemej titaxikoj ijkon kemej nejua nitaxikoj,* nejua no nimitsyekpias itech hora keman tajyouiskej akin nemij itech taltikpak uan moyekitas ox kichiujtokej tein kuali oso tein amo kuali.
11 Amo uejkaua niejkos. Amo xikaua tein tikpia para maj amo akin mitskuili motaxtauil.*
12 ”’Akin tatanis, nikchiuas kemej se kalikxit tein kipia itemplo noDios, uan amo keman kisasok. Itech nikijkuilos itokay noDios, itokay Yankuik Jerusalén (iueyi xolal noDios tein ualpantemoua de ne iluikak, kampa yetok noDios), uan no nikijkuilos notokay tein yankuik.
13 Akin kipia inakas, maj kikaki tein Dios ika ichikaualis kiniluia tokniuan itech nechikolmej’.
14 ”Xiktajkuilouili ángel tein kinyekpia tokniuan akin mosentiliaj ompa Laodicea: Yejua nejin tein kijtoua akin kiluiaj Amén,* taixpantijkej akin takuaujtamach uan melauak, akin Dios achto kichijchiuak:
15 ‘Nikmattok nochi tein tikchiua uan nikmati ke amo tisesek nion titotonik. Niknekiskia majkan xisesek oso xitotonik.
16 Sayoj ke, kemej titamati kemej ayeman,* tein amo totonik nion sesek, nimitsijsotati.
17 Tejua tikijtoua: “Nitominpia, niksentilij miak taman tein patiyoj uan amo teyi nechpoloua”. Sayoj ke amo tikita ke amo tiyolpaki, ke titeikneltij, tipobre uan amo titachia uan ke tixipetstik.*
18 Yejua ika xikaki tein nimitsiluia: nejua xinechkouiliki oro tein kichipaujkej ika tit* para xitominpia, nejua xinechkouiliki istak tasal para xitakentiuj uan ijkon maj amo kiitakan ke tixipetstik* uan timopinaujtis uan nejua xinechkouiliki pajti tein timoixtololojtalilis para titachias.
19 ”’Nejua nikinnextilia tein amo kuali tein kichiujtokej akin nikintasojta uan nikinmachtia maj kipatakan tein moneki.* Yejua ika ximoyolpata uan xiktekitili Dios ika nochi moyolo.
20 Xikita, niijkatok kaltenoj uan nitanotstok. Komo aksa* nechkaki uan nechtatapouilia, nikalakis ichan uan tisentakuaskej tiotakpa.
21 Akin tatanis nikauas maj nouan motali itech noueyi silla, ijkon kemej nejua nitatanik uan nimotalij iuan noTajtsin itech iueyi silla.
22 Akin kipia inakas, maj kikaki tein Dios ika ichikaualis kiniluia tokniuan itech nechikolmej’”.
Tajtolmelaualismej
^ Oso “mitstakachiuakij”.
^ Oso “tikchiuak tein nikijtoj keniuj moneki se taxikos”.
^ Oso “mocorona”.
^ “Amén” se tokayit tein ika moixmati Jesús tein kiixnextia tein kichiuak.
^ Oso “at tein yemankatotonik”.
^ Oso “tixitatstik”.
^ Oso “tekol”.
^ Oso “tixitatstik”.
^ Oso “nikinmelaua”.
^ Oso “akin”, “akaj”.
