Hebreos 13:1-25
13 Xiksentokakan ximotasojtakan kemej yeskia naniknimej.
2 Amo xikelkauakan kuali nankinseliskej oksekin,* porin kemej sekin kichiujkej nejon, kinselijkej ángeles uan nion kimatkej.
3 Xikinelnamikikan akin tsaktokej* kemej yeskia iniuan nantsaktoskiaj, uan no xikinelnamikikan akin kintajyouiltijtokej kemej yeskia no iniuan nantajyouijtoskiaj.
4 Maj nochin kitakachiuakan* tein Dios kiixtalij para akin monamiktijkejya uan takat uan siuat maj amo mokajkayauakan iuan okse, porin Dios kintatsakuiltis akin auilnemij,* yeski ininselti oso akin monamiktijkejya.
5 Amo xiktelnejnekikan tomin, uan xiyolpakikan ika tein nankipiaj. Porin Dios kijtoj: “Amo keman nimitskauas uan nochipa nimitspaleuis”.
6 Yejua ika, maj amo timouikan, ta maj tikijtokan: “Jehová* nechpaleuia. Amo nimouis. ¿Toni uelis nechchiuiliskej?”.
7 Xikinelnamikikan akin namechixyekanaj, akin namechmachtijkej itajtol Dios. Xikitakan keniuj tapaleuia tein kuali tein kichiuaj uan xitakuaujtamatikan kemej yejuan.
8 Yalua, axkan uan nochipa, Jesucristo amo keman mopata.
9 Amo ximokauakan maj namechkajkayauakan ika tataman tamachtilis tein amo nankiixmatij, porin okachi kuali maj se moyolchikaua ika itatiochiualis Dios tein amo technamiki, uan maj amo tiktayekanaltikan takual.* Akin kitayekanaltiaj nejon amo teyi ika kinpaleuia.
10 Tikpiaj se altar. Sayoj ke akin kitekitiliaj Dios itech takenkal amo ueli kikuaj* tein yetok itech altar,
11 porin ininnakayo tapialmej kinchichinouayaj kampa amo akin nemia. Tayekankatiopixkat kiuikaya ininesyo nejon tapialmej kampa Okachi Yektik uan kimaktiliaya Dios para maj kintapojpoluili inintajtakoluan.
12 Yejua ika, Jesús no tajyouij ueyi xolaltenoj para maj ika iesyo miakej moajsikan chipaujkej iixpan Dios.
13 Yejua ika maj tikisakan uan maj tiakan kampa yetok yejua, uan maj techpijpinaujtikan ijkon kemej yejua kipijpinaujtijkej,
14 porin nikan amo tikpiaj se ueyi xolal tein nochipa yetos, ta tiktemouaj ika nochi toyolo ueyi xolal tein moixtalis satepan.
15 Maj nochipa tikueyitalikan Dios itechkopa Jesús. Keman tikueyitaliaj, kemej yeskia tikmaktilijtoskiaj Dios se tapialtsin. Ika totenoj tikteixmatiltiaj itokay.
16 Uan no, amo xikelkauakan nankichiuaskej tein kuali uan nankinpaleuiskej oksekin ika tein nankipiaj, porin nejin semi kiyolpaktia Dios, uan ijkon kemej yeskia nankimaktilijtoskiaj se tapialtsin.
17 Xikintakamatikan akin namechixyekanaj uan ximokauakan maj namechyekanakan, porin yejuan namechyekpixtokej uan ika nejon tanankiliskej iixpan Dios. Komo ijkon nankichiuaj, yejuan yolpakiskej keman kichiuaskej inintekiuj uan amo tayokoyaskej, porin komo nankichiuaskiaj maj tayokoyakan, namechijtakoskia.
18 Xiksentokakan xiktataujtikan Dios maj techpaleui, porin tikyekmatij ke amo teyi techyolkuejmoloua, porin amo keman tiknekij titakajkayauaskej.*
19 Sayoj ke okachi namechiluia ximotataujtikan para maj oksepa niman namechitati.
20 Dios akin teyolseuia kichiuak maj oksepa nemi ueyi ichkatajpixkej: toTekotsin Jesús, akin ika iesyo moixtalij tein Dios motenkauak tein uejkauas nochipaya. Maj Dios
21 namechmaka nochi tein namechpoloua para nankichiuaskej tein kineki uan maj itechkopa Jesucristo kichiua totech tein kiyolpaktia. Yejua kinamiki maj kiueyitalikan nochipaya. Maj ijkon mochiua.*
22 Nokniuan, axkan namechtataujtia xikakikan ika nejmachkayot nejin amatajkuilol tein ika namechyolchikaua, porin semi tepitsin namechtajkuilouilia.
23 Nikneki xikmatikan ke toknitsin Timoteo kikajkaujkejya. Komo niman ejko, tisenyaskej tamechitatiuij.
24 Xinechintajpalouilikan nochin akin namechixyekanaj uan nochin akin Dios moinxelouilij.* Tokniuan akin yetokej Italia namechtajpalouaj.
25 Maj Dios namechmaka nanochin itatiochiualis tein amo technamiki.
Tajtolmelaualismej
^ Oso “nanyeskij nankualtakamej iniuan akin amo nankinixmatij”.
^ Itech griego, “akin ilpitokej (tsikaujtokej) ika cadena”.
^ Oso “kipoujkaitakan”.
^ Xikonita auilnemilis.
^ Oso “tein moixtalia toni uelis se kikuas”.
^ Oso “amo kipiaj tanauatil para kikuaskej”.
^ Oso “tiknekij tiyeskij timelaujkej itech nochi”.
^ Oso “Amén”.
^ Oso “chipaujkej iixpan Dios”.
