Hechos 23:1-35
23 Pablo kinsenitak Uejueyi Tamelauanij* uan kijtoj: “Nokniuan, hasta nejin tonal iixpan Dios ueli nikijtoua ke amo teyi nechyolkuejmoloua porin amo nikchiuani nion teyi tein amo kuali”.
2 Keman tayekankatiopixkat Ananías kikakik nejon, kinnauatij akin iuan yetoyaj maj kitentatsinikan.
3 Yejua ika Pablo kiluij: “Dios mitsmagas* tejua, taixkajkayaujkej.* Komo tejua tikixejekoua tein nechchiuiliskej ijkon kemej kijtoua iTanauatil Moisés, ¿keyej amo tiktakamati uan titanauatia maj nechixtatsinikan?”.
4 Akin ompa iuan yetoyaj kiluijkej: “¿Timoixeuia tiknajnankilis* itayekankatiopixkauj Dios?”.
5 Pablo kinnankilij: “Nokniuan, nejua amo nikmatia ke yejua tayekankatiopixkat. Porin ijkuiliujtok: ‘Amo xikuijuikalti nion semej taixyekananij itech moxolal’”.
6 Uan kemej Pablo kimatia ke sekin katkaj saduceos uan oksekin fariseos, chikauak kijtoj ininixpan: “Nokniuan, nejua nifariseo uan notatuan fariseos. Axkan nankiixejekojtokej toni nanechchiuiliskej porin nikneltoka ke oksepa nemiskej akin momikilijkejya”.
7 Yejua ika fariseos uan saduceos peujkej motajtolteuiaj uan akin mosentilijkaj moxexelojkej,
8 porin saduceos kijtouaj ke akin momikilijkejya amo oksepa nemiskej uan ke amo onkakej ángeles,* sayoj ke fariseos kineltokaj nochi nejin.
9 Yejua ika peujkej eliuis tsatsajtsij. Uan seki tajkuilouanij akin pouiaj iniuan fariseos moketskej uan peujkej eliuis taixnamikij uan kijtouayaj: “Amo tikajxiliaj nion teyi tein amo kuali nejin takat. ¿Uan takan kinojnotsak se ángel?”.*
10 Keman tayekankasoldado* kiitak ke okachi eliuis motajtolteuijtoyaj, mouik maj kimiktikan Pablo. Yejua ika tanauatij maj soldados temokan para maj kikixtikan uan maj kiuikakan kampa mokauayaj soldados.
11 Sayoj ke nejon youak toTekotsin monextij kampa yetoya Pablo uan kiluij: “¡Ximoyolchikaua! Porin ijkon kemej kuali* tinechteixmatiltiani nikan Jerusalén, no monekis tinechteixmatiltis ompa Roma”.
12 Keman tanesik, judíos ichtaka kisenixtalijkej uan moyektenkaujkej maj kinpano tein amo kuali komo takuaj uan tatayij achto ke kimiktiskej Pablo.
13 Katkaj panoua 40 takamej akin ichtaka kiixtalijkej nejin.
14 Yejua ika kinitatoj uejueyi tiopixkamej uan taixyekananij judíos, uan kiniluijkej: “Timoyektenkaujkej maj techpano tein amo kuali komo titakuaj achto ke tikmiktiskej Pablo.
15 Yejua ika, namejuan uan Uejueyi Tamelauanij* xitajtokan iuan tayekankasoldado para maj kiuika kampa namejuan nanyetokej, kemej yeskia nankinekiskiaj nankiyektatsintokiskej. Uan achto ke yejua ajsis, tejuan tikchixtoskejya* para tikmiktiskej”.
16 Sayoj ke isobrino Pablo kimatik ke kiixtaliayaj kiichtakauiskej, yejua ika yajki kampa mokauayaj soldados uan kinauatij Pablo.
17 Uan Pablo kinotsak se akin kinixyekana 100 soldados uan kiluij: “Xikuika nejin okichpil iixpan tayekankasoldado, porin kineki kimatiltis teisa”.
18 Yejua ika, kiuikak iixpan tayekankasoldado uan kiluij: “Pablo akin tsaktok, nechnotsak uan nechiluij maj nimitsualkuiliani nejin okichpil porin kineki mitsiluis teisa”.
19 Tayekankasoldado kimakitskij, kiuikak okseko, uan kitajtanij:* “¿Toni tikneki tinechmatiltis?”.
20 Yejua kinankilij: “Judíos motenkaujkej mitsiluiskej xikuika Pablo mosta hasta kampa yetokej Uejueyi Tamelauanij,* kemej yeskia kinekiskiaj okachi kitatsintokiskej.
21 Sayoj ke amo xikchiua tein mitsiluiskej, porin kinpiaj panoua 40 takamej akin kichixtokejya* para kiichtakauiskej. Uan yejuan moyektenkaujkej maj kinpano tein amo kuali komo takuaj oso tatayij achto ke kimiktiskej. Sayoj kichixtokej* xikijto maj mochiua tein kinekij”.
22 Tayekankasoldado kikauak maj youi okichpil, sayoj ke achto kinauatij: “Amo akin xikilui ke tinechiluij nejin”.
23 Uan tanauatij maj kinnotsakan omen akin kinixyekanaj 100 soldados uan kiniluij: “Xikisakan iniuan 200 soldados uan xiakan hasta Cesarea kemej chiknaui hora youak.* No xikinuikakan 70 soldados akin youij itech caballos uan 200 akin kiuikaj koujmej tein tenpitstikej.*
24 Xikinualkuikan caballos tein ika nankiuikaskej Pablo para kuali ajsitiuj keman nankiuikiliskej tekiuaj Félix”.
25 Uan kijkuiloj se amat tein kijtouaya ijkuin:
26 “Nejua niClaudio Lisias, ika nejin amatajkuilol nimitstajpaloua tejuatsin tekiuaj Félix:
27 Judíos kikitskijkej nejin takat uan kimiktijtoyajya. Sayoj ke keman nikmatik ke katka romano, nimantsin nikmakixtito iniuan nosoldados.
28 Kemej niknekia nikmatis toni ika kiteluiliayaj, nikinuikilij Uejueyi Tamelauanij* itech ininxolal.
29 Nikmatik ke ika mokuitoyaj ininTanauatil, sayoj ke amo nikita ke kinamiki maj kimiktikan oso maj kitsakuakan.
30 Sayoj ke nechiluijkej ke ichtaka kisenixtalijkej kimiktiskej, yejua ika nimantsin nimitstitanilij uan no nikinnauatij akin kiteluiliaj maj mitsiluitij keyej kiteluiliaj”.
31 Yejua ika, nejin soldados kichiujkej tein kinnauatijkej uan youak kiuikakej Pablo hasta Antípatris.
32 Mostika, yejuan mokepkej kampa mokauayaj uan okseki soldados akin yayaj itech caballos kiuikakej.
33 Keman ajsitoj Cesarea, kitemaktijkej Pablo iuan tekiuaj Félix uan no kimakakej amat.
34 Yejua kiitak tein kijkuilouilijkaj uan tajtanik kani kayot katka Pablo. Uan kimatik ke katka kayot Cilicia.
35 Yejua kijtoj: “Kuali nikakis tein tinechiluis keman ualaskej akin mitsteluiliaj”. Uan tanauatij maj kiyekpixtonij itech ipalacio Herodes.
Tajtolmelaualismej
^ Oso “mitsuitekis”.
^ Oso “tepamit tein pochiktik”.
^ Oso “tikuijuikaltis (tiktejtelchiuas)”.
^ Oso “amo onkak nion ángel nion tein amo se kiita”.
^ Oso “tein amo ueli se kiita oso se ángel”.
^ Nejin takat kinixyekanaya mil soldados.
^ Oso “ajsitok”.
^ Oso “tikchatoskejya”.
^ Oso “kitajtoltij”.
^ Oso “kichatokejya”.
^ Oso “kichatokej”.
^ Itech griego, “expatika hora youak”.
^ Oso “yekapitstikej”.
