Hechos 3:1-26
3 Pedro uan Juan pankistiayaj templo kemej eyi hora tiotak,* itech hora keman mochiua netataujtil,
2 uan se takat akin yolik metskoxoj kimamajtiayaj hasta puerta tein monotsa Kualtsin. Mojmostaj ompa kitaliayaj para maj kintajtani tomin akin kalakiaj templo.
3 Nimantsin keman kiitak ke Pedro uan Juan yaya kalakitij, peuak kintajtania tomin.
4 Sayoj ke Pedro uan Juan sayoj kisenitakej, uan Pedro kiluij: “Xitechita”.
5 Yejua ika, kinsenixitak porin kichiaya maj kimakakan teisa.
6 Sayoj ke Pedro kiluij: “Amo nikpia plata nion oro, sayoj ke nimitsmakati tein nikpia. ¡Itokaykopa Jesucristo akin kayot Nazaret, nimitsiluia xinejnemi!”.
7 Uan kimatilanak ika iyekmay uan kiajokuik. Nimantsin metschijchikauayak,
8 ajkotsikuinik uan moketsak, peuak nejnemi uan kalakik iniuan itech templo. Yejua nejnentiaya, ajkotsikuintiaya uan kiueyitalijtiaya Dios.
9 Uan nochin kiitakej ke nejnentiaya uan kiueyitalijtiaya Dios.
10 Kiitakej ke katka takat akin motaliaya uan tajtania tomin itech puerta tein monotsa Kualtsin, uan kiueyimojkaitakej uan kisenitakej nochi tein mochiujka.
11 Nejon takat inintech mokitskijtoya Pedro uan Juan. Uan nochin semi kimojkaitakej uan tsikuinkej hasta kampa yetoyaj, hasta ikalikxiuan Salomón.
12 Keman kiitak nejin, Pedro kiniluij: “Israelitas, ¿keyej semi nankimojkaitaj nejin? ¿Keyej nantechitaj kemej yeskia tejuan tikchiujkej maj nejnemi nejin takat oso ke tikchiujkej maj nejnemi porin tikueyichiuaj Dios ika nochi toyolo?
13 IDios Abrahán, iDios Isaac uan iDios Jacob, ininDios touejkaujtatuan, kiueyitalij iTekitikauj, Jesús, akin namejuan nankitemaktijkej uan nankiixtopeujkej iixpan Pilato, maski yejua yaya kikajkauatiya.
14 Kemaj, namejuan nankiixtopeujkej nejon takat akin chipauak iixpan Dios uan yolmelauak, nantajtankej maj kikajkauanij se temiktijkej
15 uan nankimiktijkej Taixyekankej akin kiixtalijkej maj kichiua maj se nemi. Sayoj ke Dios kichiuak maj oksepa nemi,* uan tejuan tikitakej nejon uan tikteixmatiltiaj.
16 Itokaykopa Jesús uan porin itech titakuaujtamatij,* metschijchikauayak nejin takat akin namejuan nankiitaj uan nankiixmatij. Kemej titakuaujtamatij iuan Jesús, nejin takat pajtik namoixpan.
17 Nokniuan, nikmati ke nankichiujkej nejon porin amo nankimatiaj tein nankichiujtoyaj, ijkon kemej namotaixyekankauan.
18 Sayoj ke, ijkon Dios kichiuak tein achto kitematiltijka inintenkopa nochin tanauatianij:* ke Cristo tajyouiskia.
19 ”Yejua ika, ximoyolpatakan uan ximokepakan iuan Dios para maj namechtapojpoluili namotajtakoluan, uan ijkon Jehová* namechyolseuis
20 uan namechtitanilis Cristo akin kiixtalij maj namechpaleui: Jesús.
21 Yejua moneki kisentokas ompa iluikak hasta maj ejkokan tonalmej keman nochi motayektalis ijkon kemej Dios tanauatij inintenkopa itanauatijkauan akin nenkej ne uejkauj.
22 Tein melauj, Moisés kijtoj: ‘NamoDios Jehová* kiixtalis semej namokniuan maj mochiua tanauatijkej kemej nejua para maj namechpaleui. Moneki nankikakiskej uan nankichiuaskej nochi tein namechiluis.
23 Tein melauj, akin amo kikakis nejon Tanauatijkej, Dios kiixpolos’.
24 Nochin tanauatianij, desde Samuel uan akin nenkej satepan, no ika tajtojkej nejin tonalmej.
25 Namejuan nanininkoneuan tanauatianij uan akin Dios kinmakas tein motenkauak iuan Abrahán keman kiluij: ‘Uan nochin kalyetonij itech taltikpak kintatiochiuiskej inintechkopa mokoneuan’.
26 Satepan ke kiixtalij iTekitikauj, Dios namechtitanilij achto namejuan para namechtatiochiuis uan namechpaleuis nansejsemej xikauakan tein amo kuali tein nankichiuaj”.
Tajtolmelaualismej
^ Itech griego, “chiknauitika hora”.
^ Itech griego, “kiajokuik”.
^ Itech griego, “titakuaujtamatij itech itokay”.
^ Xikonita tanauatijkej.
