Hechos 4:1-37
4 Keman Pedro uan Juan kinnojnotstoyaj akin ompa yetoyaj, kinajsitoj tiopixkamej, tayekankatajpixkej itech templo uan saduceos.
2 Kualantoyaj porin yejuan tamachtiayaj uan kiteixmatiltiayaj ke Jesús oksepa nemik.
3 Yejua ika kinkitskijkej uan kintsakkej hasta mostika, porin yaya tayouatiya.
4 Sayoj ke miakej akin kikakkej tein yejuan kijtojkaj, taneltokakej. Uan akin taneltokakej katkaj kemej makuil mil takamej.
5 Mostika, mosentilijkej ompa Jerusalén taixyekananij judíos uan tajkuilouanij,
6 iuan ueyi tiopixkat Anás uan iuan Caifás, Juan, Alejandro uan nochin akin katkaj ichankauan ueyi tiopixkat.
7 Kinualkuikej ininixpan Pedro uan Juan uan peujkej kintajtaniaj:* “¿Akoni itokaykopa nankichiuaj nejin? ¿Akoni namechnauatij xikchiuakan?”.
8 Dios kimakak ichikaualis Pedro, uan yejua kinnankilij:
“Taixyekananij judíos,
9 komo axkan nantechtatsintokiaj porin tikpaleuijkej se takat akin amo uelia nejnemia uan nankinekij nankimatiskej akoni kipajtij,
10 xikmatikan nochin namejuan uan nochin israelitas ke yejua pajtik itokaykopa Jesucristo akin kayot Nazaret, akin namejuan nankikoujpampilojkej sayoj ke Dios kichiuak maj oksepa nemi.* Itechkopa yejua, nejin takat yetok nikan namoixpan uan paktok.
11 Yejua nejin ‘tet tein namejuan akin nankalchiuanij, nankiixtopeujkej uan tein mochiuako ueyi tet tein kichikaua ome tepamit’.*
12 Uan no, amo onkak okse temakixtijkej, ta sayoj yejua, porin amo onkak okse tokayit nikan taltikpak tein ika uelis timakisaskej”.
13 Uan keman kiitakej ke Pedro uan Juan yolchikaujkej katkaj, uan kiajsikamatkej ke amo ueyichiuanimej katkaj uan amo semi taixmatiaj,* semi kinmojkaitakej. Uan kimatkej ke iuan yetoyaj Jesús.
14 Kemej kiitayaj ke iniuan yetoya takat akin pajtikaya, amo ueliajok kiniluiayaj nion teyi.
15 Uan kinnauatijkej maj kisakan de kampa mosentiliaj Uejueyi Tamelauanij* uan peujkej yejuan monojnotsaj.
16 Kijtouayaj: “¿Toni maj tikinchiuilikan nejin takamej? Porin nochin akin nemij Jerusalén kuali kimatij ke kichiujkej se ueyi milagro, uan amo uelis tikijtoskej ke amo melauak.
17 Yejua ika, para maj nejin amo kisentoka moteixmatilti, tikinmojmoujtitij uan tikiniluitij maj amo akin oksepa ika kinojnotsakan itokay nejin takat”.
18 Yejua ika kinnotskej uan kinnauatijkej maj amo tajtokan nion maj tamachtikan nion teyi itokaykopa Jesús.
19 Sayoj ke Pedro uan Juan kinnankilijkej: “Komo kuali yetok iixpan Dios tamechtakamatiskej namejuan uan amo Dios, namejuan xikitakan.
20 Sayoj ke tejuan tiksentokaskej ika titajtoskej tein tikitanij uan tikakinij”.
21 Yejua ika, oksepa kinmojmoujtijkej uan kinkajkaujkej porin amo teyi kinajxilijkej tein ika ueliskia kintatsakuiltiskej uan porin kinmouiliayaj akin ompa yetoyaj, porin nochin kiueyitalijtoyaj Dios ika tein mochiujka.
22 Porin takat akin pajtika ika nejin milagro kipiaya panoua 40 xiujmej.
23 Satepan ke kinkajkaujkej, yajkej kampa yetoyaj okseki imomachtijkauan Jesús uan kintapouijkej tein uejueyi tiopixkamej uan taixyekananij judíos kiniluijkaj.
24 Keman kikakkej nejin, kisentataujtijkej Dios uan kijtojkej:
“ToUeyi Teko, tejua akin tikchijchiuak iluikak, taltikpak, ueyiat, uan nochi tein onkak ompa,
25 uan ika mochikaualis tikijtoj itenkopa touejkaujtat, motekitikauj David, ijkuin: ‘¿Keyej kualankej akin nemij itech altepemej? ¿Uan keyej nochin kinemilijkej tein sayoj nenkaj?
26 Tekiuanij itech taltikpak moketskej uan taixyekananij mosentilijkej kemej yeskia sayoj se para kiixnamikiskej Jehová* uan akin yejua kijitak’.*
27 Uan ijkon mochiuak, porin Herodes uan Poncio Pilato mosentilijkej itech nejin ueyi xolal iniuan akin kayomej itech okseki altepemej uan israelitas para kiixnamikiskej motekitikauj akin yektik, Jesús, akin tejua tikijitak.*
28 Yejuan mosentilijkej para kichiuaskej tein achto tikijtojka. Nejin mochiuak porin tejua tikpia chikaualis uan porin ijkon tikixtalij.
29 Uan axkan, Jehová,* xikaki keniuj techmojmoujtiaj uan xikinpaleui motakeualuan maj amo mouikan uan maj kisentokakan kiteixmatiltikan motajtol.
30 Uan no xiksentoka xitapajti ika mochikaualis, uan itokaykopa motekitikauj Jesús akin yektik maj mochiua milagros uan uejueyi taman tein se kimojkaita”.
31 Keman chikauak motamitataujtijkej, talolinik kampa mosentilijtoyaj, uan nochin kiselijkej ichikaualis Dios uan amo mouiaj kiteixmatiltiskej itajtol Dios.
32 Uan no, nochin akin taneltokakej sayoj se taman kiyolnemiliayaj, uan nion se kijtouaya ke tein kipiaya katka iaxka, ta momamakayaj nochi tein kipiayaj.
33 Uan tatitanilmej kisentokakej kiteixmatiltijkej ke toTekotsin Jesús oksepa nemik, uan nejon semi tapaleuij. Dios semi kintatiochiuij nochin.
34 Tein melauj, amo moajsia nion akin maj amo kipiani tein ika moixpanoltis, porin nochin akin kipiayaj talmej oso kalmej kinnamakayaj uan nejon tomin
35 yayaj kinmakatij tatitanilmej. Uan moxejxelouaya ijkon kemej sejse kipolouaya.
36 Yejua nejon tein kichiuak se takat levita akin yolik Chipre. Monotsaya José, sayoj ke tatitanilmej no kiluiayaj Bernabé (tein kijtosneki “akin teyolseuia”).
37 Yejua kinamakak se ital uan tomin kinmakato tatitanilmej.
Tajtolmelaualismej
^ Oso “kintajtoltiaj”.
^ Itech griego, “kiajokuik”.
^ Oso “tepanchikaualoni”.
^ Nejin kijtosneki ke amo momachtijkaj kampa tamachtiayaj inintalneltokalis judíos. Amo kijtosneki ke amo taixmatiaj.
^ Oso “uan iCristo”.
^ Oso “tikixpejpenak”.
