Hechos 9:1-43
9 Sayoj ke Saulo kisentokaya kinmojmoujtiaya imomachtijkauan toTekotsin uan kinekia kinmiktis. Yejua ika kiitato tayekankatiopixkat
2 uan kitajtanij maj kijkuilo se tanauatil tein kinnextiliskia akin pouij kampa taueyichiuaj judíos ompa Damasco. Nejon tanauatil kikauaya maj kitemo, maj kiilpi* uan maj kiuika Jerusalén akin yeski akin pouiskia itech iOjtsin toTekotsin, yeski takat oso siuat.
3 Uan keman yajtoya Damasco uan ajsitiayaya, se tanex tein ualeuaya iluikak sepasan kiixmiktij,
4 uan yejua uetsito talpan uan kikakik ke kiluiayaj: “Saulo, Saulo, ¿keyej tinechtajyouiltijtok?”.
5 Yejua tajtanik: “¿Tiakoni noTekotsin?”. Uan yejua kinankilij: “Nejua niJesús, akin tejua tiktajyouiltijtok.
6 Sayoj ke axkan ximeua uan xiouj Damasco, uan ompa mitsiluiskej tein moneki tikchiuas”.
7 Takamej akin iuan yayaj amo ueliaj tajtouayaj, porin kikakiaj ke aksa* ualtajtouaya sayoj ke amo akin kiitayaj.
8 Saulo meuak uan maski ixtajtapotoya, amo tachiaya. Yejua ika kimajchantiajkej hasta Damasco.
9 Eyi tonal amo tachiak, uan amo takuaj uan amo teyi tayik.
10 Ompa Damasco yetoya se imomachtijkauj Jesús akin monotsaya Ananías, uan toTekotsin monextij iixpan uan kiluij:* “¡Ananías!”. Yejua kinankilij: “Nikan nietok, noTekotsin”.
11 Uan toTekotsin kiluij: “Ximoketsa, xiouj itech ojti tein monotsa Melauak uan xiktemo ichan Judas se takat kayot Tarso akin monotsa Saulo. Yejua kichiujtok netataujtil
12 uan iixpan monextij* se takat akin monotsa Ananías. Yejua kiitak ke kalakik uan itech kitalij imauan para maj oksepa tachia”.
13 Sayoj ke Ananías kinankilij: “NoTekotsin, nikakini ke miakej ika tajtouaj nejin takat uan keniuj semi kintajyouiltij momomachtijkauan ompa Jerusalén.
14 Uan nikan yetok porin uejueyi tiopixkamej kiualtitankej maj kinkitskiki* nochin akin kiteneuaj motokay”.
15 Sayoj ke toTekotsin kiluij: “Xiouj, porin nejin takat nikijitak* para maj nechteixmatilti iniuan akin amo judíos, uan no iniuan tekiuanij uan israelitas.
16 Nejua nikyeknextilis nochi tein kijyouis porin kiteixmatiltis notokay”.
17 Yejua ika Ananías yajki, kalakik kalijtik, kitalij imauan itech uan kiluij: “Noknitsin Saulo, toTekotsin Jesús akin monextij moixpan itech ojti kampa tiualaya, nechualtitanik para oksepa xitachia uan xikseli ichikaualis Dios”.
18 Nimantsin uejuetskej de iixtololouan tein tamatia kemej ipaneuayo pescado* uan yejua oksepa tachiak. Uan moketsak uan kiauijkej,
19 tepitsin tamajseuak uan moyolkuik.
Uan mokauak seki tonalmej iniuan tokniuan akin yetoyaj Damasco.
20 Uan nimantsin peuak kiteixmatiltia Jesús kampa taueyichiuaj judíos, kijtouaya ke yejua iKoneuj Dios.
21 Sayoj ke nochin akin kikakiaj kimojkaitayaj uan kijtouayaj: “¿Amo yejua nejin takat akin eliuis kintajyouiltiaya ompa Jerusalén akin kiteneuaj nejin tokayit? ¿Amo ualajka nikan para kinkitskis uan kinuikas* ininixpan uejueyi tiopixkamej?”.
22 Sayoj ke Saulo okachi kuali tanojnotsaya, uan judíos akin nemiaj Damasco amo kimatiaj toni kinankiliskej keman kinyeknextiliaya ke Jesús yejua Cristo.
23 Miak tonalmej satepan, judíos kiitakej keniuj kimiktiskej.
24 Sayoj ke Saulo kimatik tein kinekiaj kichiuiliskej. Kemej yejuan no tajpiayaj kaltenoj youalintonal para kimiktiskej,
25 se youak itatojtokakauan kipaleuijkej uan kipantemouijkej itech se chikiuit kampa takoyontoya itech tepamit.
26 Keman ajsik Jerusalén, yejua kitemoj mosentilis iniuan imomachtijkauan Jesús, sayoj ke nochin kimouiliayaj porin amo kineltokayaj ke yejua no katka se imomachtijkauj Jesús.
27 Yejua ika Bernabé kipaleuito uan kiuikak ininixpan tatitanilmej. Uan kintapouij nochi: ke Saulo kiitaka toTekotsin itech ojti, ke yejua kinojnotska uan ke Saulo amo mouik tanojnotsas itokaykopa Jesús ompa Damasco.
28 Saulo mokauak iniuan, uan yejua uelia yajtinemia kampa yeski* ompa Jerusalén uan amo mouia tanojnotsas itokaykopa toTekotsin.
29 Iniuan tajtouaya uan iniuan monanankiliaya judíos akin tajtouayaj griego. Sayoj ke yejuan miakpa kinekkej kimiktiskej.
30 Keman tokniuan kimatkej, kiuikakej hasta Cesarea uan kititankej maj youi Tarso.
31 Tokniuan akin nemiaj Judea, Galilea uan Samaria, yolseujkanemiaj uan okachi takuaujtamatiaj. Uan kemej kimojkatokayaj Jehová* uan ichikaualis Dios kinyolseuiaya, okachi momiakilijtiayaj.
32 Kemej Pedro yajtinemia itech nochi nejon talmej, no temok kinkalpanoto imomachtijkauan Jesús akin nemiaj Lida.
33 Ompa kiitak se takat akin monotsaya Eneas, akin amo uelia nejnemia uan chikueyi xiuitya uetstoya.
34 Pedro kiluij: “Eneas, Jesucristo mitspajtia. Ximeua uan xiktetekuino mopetauj”.* Nimantsin yejua meuak.
35 Keman nochin akin nemiaj Lida uan ompa Sarón kiitakej, takuaujtamatkej iuan toTekotsin.
36 Ompa Jope nemia se imomachtijkauj Jesús akin monotsaya Tabita, tokayit tein kijtosneki Dorcas.* Yejua kichiuaya miak taman tein kuali uan semi kinpaleuiaya pobres.
37 Sayoj ke itech nejon tonalmej, kokolispeuak uan momikilij. Yejua ika kialtijkej* uan kitekatoj itech se cuarto tein moajsia ajko.
38 Uan Lida amo uejka yetoya de Jope, yejua ika keman imomachtijkauan Jesús kimatkej ke Pedro yetoya itech nejon ueyi xolal, kintitankej ome takamej maj kiluitij: “Timitstataujtiaj, nimantsin xiuiki”.
39 Pedro nimantsin moketsteuak uan yajki iniuan. Keman ajsito, kiuikakej itech cuarto tein moajsia ajko. Uan nochin siuatsitsin akin momikilijkaya inintakatsin kiitatoj, chokatoyaj uan kinextiliayaj nochi ininpantaken uan okseki tasal tein Dorcas kichijchiujka keman yoltoya.
40 Uan Pedro kiniluij nochin maj kisakan, motankuaketsak, kichiuak netataujtil, moixkepak kampa uetstoya uan kiluij: “Tabita, ¡ximeua!”. Yejua ixtajtapouik uan nimantsin keman kiitak Pedro, motalij.
41 Pedro kimakitskij uan kipaleuij maj meua. Uan no, kinnotsak imomachtijkauan Jesús uan nejon siuatsitsin, uan nochin kiitakej ke Tabita yoltoya.
42 Itech nochi ueyi xolal Jope momatik nejin, uan miakej taneltokakej iuan toTekotsin.
43 Pedro mokauak ompa Jope miak tonalmej iuan se takat akin monotsaya Simón, akin tekitia ika tapialkuetax.
Tajtolmelaualismej
^ Oso “kitsiko”.
^ Oso “akin”, “akaj”.
^ Oso “kiluij keman majya takochitstoya”.
^ Oso “kiitak keman majya takochitstoya”.
^ Itech griego, “kinilpiki (kintsikoki)”.
^ Oso “nikixpejpenak”.
^ Oso “amichij”.
^ Itech griego, “kinuikas ilpitokej (tsikaujtokej)”.
^ Itech griego, “kalakia uan kisaya”.
^ Oso “motapech”.
^ Tokayit itech tajtol griego Dorcas uan tokayit itech tajtol arameo Tabita kijtosneki ‘masat’.
^ Oso “kipakkej”.
