Mateo 2:1-23
2 Jesús yolik ompa Belén tein poui Judea, keman Herodes* tekiuajtia. Ijkuak, ualajkej Jerusalén seki takamej akin kinixmatij kemej magos.* Yejuan ualeuayaj de kampa ualkisa tonaltsin,
2 uan tatsintokayaj: “¿Kani yetok inintekiuaj judíos akin tikmatkej ke yolik? Porin keman tietoyaj kampa ualkisa tonaltsin tikitakej isitalin uan timoixpilokoj iixpan”.*
3 Keman tekiuaj Herodes uan nochin akin nemiaj Jerusalén kikakkej nejon, semi motekipachojkej.
4 Tekiuaj kinsentilij nochin uejueyi tiopixkamej uan tajkuilouanij uan kintajtanij* kani yoliskia Cristo.*
5 Yejuan kinankilijkej: “Ompa Belén tein poui Judea, porin yejua nejin tein kijkuiloj tanauatijkej:*
6 ‘Uan tejua Belén tein tipoui Judá, nochin akin tekiuajtij Judá maj amo mitsitakan ke semi amo tiueyichiujkej, porin motech kisas se tekiuaj akin kinixyekanas israelitas, akin pouij itech noxolal’”.
7 Yejua ika, Herodes kinichtakanotsak nejon magos uan kinyektajtanij kemanian nesik nejon sitalin.
8 Uan kintitanik Belén uan kiniluij: “Xiakan uan xikyektemokan okichpiltsin. Keman nankiajsiskej, xinechiluikij para no uelis nias nimoixpilotiuj iixpan”.*
9 Keman tekiuaj kiniluij nejon, yejuan kisentokakej ojtokakej. Uan sitalin tein kiitakaj keman yetoyaj kampa ualkisa tonaltsin kinyekantiaya, uan motsakuilito kampa yetoya okichpiltsin.
10 Keman kiitakej sitalin, semi yolpakkej.
11 Keman kalakkej kalijtik, kiitakej okichpiltsin iuan inan, María. Uan motankuaketskej uan moixpilojkej.* No kitapojkej ininkaxonuan uan kitayokolijkej oro, istak kopal uan chokilot ajuiyak tein monotsa mirra.
12 Sayoj ke, kemej Dios kinnauatij keman takochitstoyaj maj amo kiitatijok Herodes, keman mokepkej ininaltepeuj kikuikej okse ojti.
13 Satepan ke yajkej, keman José takochitstoya kiitak iángel Jehová.* Yejua kiluij: “Ximoketsa, xikuiteua okichpiltsin uan mosiuatsin uan xicholo Egipto. Ompa ximokaua hasta keman nimitsiluis, porin Herodes kitemoti okichpiltsin para kimiktis”.
14 Yejua ika José meuak nejon youak uan kinuikak okichpiltsin uan isiuatsin hasta Egipto,
15 uan ompa mokauak hasta keman Herodes momikilij. Ijkon mochiuak tein Jehová* kijtojka itechkopa itanauatijkauj: “Niknotsak nookichpiltsin maj kisa de Egipto”.
16 Keman Herodes kiitak ke nejon magos kikajkayaujkej, semi kualanik uan tanauatij maj kinmiktikan nochin okichpipilkonemej akin ayamo kiajxitiayaj ome xiuit, nochin akin nemiaj Belén uan itech xolalmej tein ompaka moajsiaj. Yejua kichiuak nejon porin ika tein kiluijkaj nejon takamej, kiixejekoj ke Jesús ayamo kiajxitiaya ome xiuit.
17 Ijkon mochiuak tein Dios kijtojka itechkopa tanauatijkej Jeremías:
18 “Ompa Ramá mokakik se siuatsin akin semi tayokolchokaya. Raquel kinchokilijtoya ikoneuan; amo kinekia maj kiyolseuikan, porin ikoneuan amo yetokejok”.
19 José yetoya Egipto keman Herodes momikilij. Itech nejon tonalmej, keman José takochitstoya kiitak iángel Jehová.*
20 Yejua kiluij: “Ximoketsa, xikuiteua okichpiltsin uan mosiuatsin, uan ximokepa Israel, porin momikilijkejya akin kinekiaj kimiktiskej okichpiltsin”.
21 Yejua ika, moketsak uan kikuiteuak okichpiltsin uan isiuatsin, uan mokepak Israel.
22 Sayoj ke mouik yas Judea keman kimatik ke axkan tekiuajtitoya Arquelao, ikoneuj Herodes. Uan yajki Galilea, kemej Dios kinauatij keman takochitstoya.
23 Uan mokaltalij itech se ueyi xolal tein monotsa Nazaret. Ijkon mochiuak tein Dios kijtojka inintechkopa tanauatianij: “Kiixmatiskej kemej akin kayot Nazaret”.*
Tajtolmelaualismej
^ Nejin takamej kiitaj itech sitalimej tein mochiuas satepan.
^ Oso “tiktakachiuakoj”.
^ Oso “kintajtoltij”.
^ Oso “Mesías”, “Taijital (Taixpejpenal)”.
^ Xikonita tanauatijkej.
^ Oso “niktakachiuatiuj”.
^ Oso “kitakachiujkej”.
^ Tajtol griego kayot Nazaret xa mokixtij itech tajtol hebreo tein kijtosneki keman itsmolini oso selia se kouit.
