Mateo 22:1-46
22 Oksepa, Jesús peuak kintapouia miak taman. Kiniluij:
2 “ITaixyekanalis Dios tein moajsi iluikak uelis moijtos ke tamati kemej se tekiuaj akin kichiuak se iluit porin iokichpil monamiktij.
3 Kintitanik itakeualuan maj kinnotsatij akin kinyoleujkaj iluit, sayoj ke yejuan amo kinekkej ualaskej.
4 Satepan kintitanik okseki takeualmej uan kinnauatij: ‘Xikiniluikan akin nikinyoleuak: “Yetokya tapalol. Kinmiktijkejya nokuakuejuan uan notapialuan tein okachi tomaujkej. Nochi yetokya. Xiiluitikij”’.
5 Sayoj ke yejuan amo kinchiujkej cuenta uan yajkej, se yajki italpan uan okse tanamakato;
6 uan oksekin kinkitskijkej takeualmej, kinmagakej* uan kinmiktijkej.
7 ”Uan tekiuaj semi kualanik uan kintitanik isoldados; kinmiktij nejon temiktianij uan kichichinoj ueyi xolal kampa nemiaj.
8 Uan no kiniluij itakeualuan: ‘Nochi yetokya para maj mochiua iluit, sayoj ke akin nikinyoleujka amo kinnamikia maj nikinyoleuani.
9 Yejua ika, xiakan itech uejueyi ojmej uan xikinyoleuakan maj iluitikij nochin akin nankinajsiskej’.
10 Yejua ika takeualmej yajkej itech ojmej uan kinyoleujkej nochin akin kinajsikej, akin yolkualmej uan akin amo yolkualmej. Uan tel miakej mosentilijkej itech kali kampa iluichiuaj keman monamiktiaj.
11 ”Keman tekiuaj kinitato akin takuajtoyaj, kiitak se takat akin amo takentoya kemej monekia motakentiskej itech se nenamiktilis.
12 Yejua ika kiluij: ‘Tejuatsin, ¿keyej amo titakentiuits kemej moneki motakentiskej itech se nenamiktilis?’. Uan nejon takat amo teyi kinankilij.
13 Yejua ika tekiuaj kiniluij itakeualuan: ‘Xikmetsilpikan uan xikmailpikan* uan xikalantamotakan kampa tayouayan. Ompa ne chokatos uan tananatskatos’.
14 ”Porin miakej kinyoleuaj, sayoj ke amo miakej kinijitaj”.*
15 Fariseos yajkej uan peuak kiitaj keniuj ueliskiaj kichiuaskej maj Jesús kijto teisa tein amo kuali.
16 Yejua ika, kintitankej seki inintatojtokakauan fariseos, iniuan seki itatojtokakauan Herodes, maj kiluitij: “Tamachtijkej, tikmatij ke nochipa tikijtoua tein melauak, ke amo titakajkayaua keman titamachtia tein Dios kineki uan ke amo tiktemoua maj kuali mitsitakan oksekin, porin amo titechikoita.
17 Yejua ika xitechilui, ¿keniuj tikita? ¿Kuali yetok maj se kiixtauili impuesto Tekiuaj,* oso amo?”.
18 Sayoj ke, Jesús kimatia ke kinemilijtoyaj tein amo kuali, yejua ika kiniluij: “Taixkajkayauanij, ¿keyej nanechyejyekouaj?
19 Xinechnextilikan tomin tein ika moixtaua impuesto”. Uan yejuan kiualkuilijkej se platajtomin tein monotsa denario.*
20 Yejua kintajtanij:* “¿Akoni iixko nejin uan akoni itokay nikan ijkuiliujtok?”.
21 Yejuan kinankilijkej: “Tekiuaj”,* uan yejua kiniluij: “Komo ijkon, xikmakakan Tekiuaj tein iaxka Tekiuaj, sayoj ke xikmakakan Dios tein iaxka Dios”.
22 Yejuan semi kimojkakakkej nejon. Uan amo kikuejmolojkejok uan yajkej.
23 Nejon tonal ualajkej saduceos, akin kijtouaj ke mikemej amo oksepa nemiskej, uan kitajtanijkej:
24 “Tamachtijkej, Moisés kijtoj: ‘Komo se takat momikilia uan amo kinpiak ipiluan, iikniuj moneki monamiktis iuan icuñada, uan konemej tein kinpiaskej kinitaskej kemej ikoneuan akin momikilij’.
25 Touan nemiaj chikome iknimej. Akin tayekanaya monamiktij, sayoj ke momikilij, uan kemej amo kinpiak ipiluan, isiuatsin monamiktij iuan icuñado.
26 No ijkon panok iuan ojpatika, iuan expatika, hasta iuan chikometika.
27 Uan satepan ke nochin iknimej momikilijkej, no momikilij siuatsin.
28 Xitechilui, keman mikemej oksepa nemiskej, ¿akoni yeski isiuatsin? Porin nochin chikome iknimej iuan monamiktijkaj”.
29 Jesús kinnankilij: “Namejuan namopolojtokej porin amo nankiixmatij Tajkuilolamatsin nion keniuj tekiti ichikaualis Dios.
30 Porin keman mikemej oksepa nemiskej, takamej uan siuamej amo monamiktiskej, ta yeskij kemej ángeles.
31 Uan nankiitanij kampa ijkuiliujtok ke mikemej oksepa nemiskej. ¿Amo nankiitakej ke ijkuiliujtok ke Dios namechiluij
32 ‘Nejua niiDios Abrahán, niiDios Isaac uan niiDios Jacob’? Yejua amo ininDios mikemej, ta ininDios akin yoltokej”.
33 Nochin semi kimojkakakkej itamachtilis.
34 Keman fariseos kimatkej ke saduceos amo uelik teyi kinankilijkej,* mosentilijkej uan kiitatoj.
35 Uan semej akin kuali kiixmatia iTanauatil Moisés, kinekia kiyejyekos uan kitajtanij:
36 “Tamachtijkej, ¿katiyejua tanauatil okachi tayekantok itech iTanauatil Moisés?”.
37 Yejua kinankilij: “‘Xiktasojta moDios Jehová* ika nochi moyolo, ika nochi monemilis uan ika nochi motanemilil’.
38 Nejin yejua yekinika tanauatil uan tein okachi tayekantok.
39 Ojpatika yejua nejin: ‘Xiktasojta moknitsin kemej tejua timotasojta’.
40 Itech nejin ome tanauatil ualeujtok nochi iTanauatil Moisés uan tein kijkuilojkej Tanauatianij”.*
41 Satepan, keman fariseos ompa yetoyajok, Jesús kintajtanij:
42 “¿Keniuj nankiitaj Cristo? ¿Akoni itat?”. Yejuan kinankilijkej: “David”.
43 Yejua kintajtanij: “Komo ijkon, ¿keyej David keman ichikaualis Dios kiyekanak, kiluij noTekotsin? Porin yejua kijtoj:
44 ‘Jehová* kiluij noTekotsin: “Ximotali noyekmakopa hasta maj nikintali mometstampa akin mitstauelitaj”’.
45 Komo David kiluia noTekotsin, ¿keniuj Cristo uelis yeski ikoneuj David?”.
46 Amo akin uelik kinankilij nion teyi. Uan desde ijkuak, amo akinok moixeuij kitajtanis teisa.
Tajtolmelaualismej
^ Oso “kinuitekkej”.
^ Oso “Xikmetstsikokan uan xikmatsikokan”.
^ Oso “kinixpejpenaj”.
^ Itech griego, “César”.
^ Oso “kintajtoltij”.
^ Itech griego, “César”.
^ Oso “kintentsakuak (kintentamatilij) saduceos”.
^ Xikonita tanauatijkej.
