Rut 1:1-22
1 Itech tonalmej keman jueces taixyekanayaj, peuak tatasojti uan amo onkaya toni kikuaskej ompa Israel. Uan se takat akin nemia Belén tein poui Judá nemito Moab. Iuan yajki isiuatsin uan ome iokichpipiluan.
2 Nejin takat monotsaya Elimélec,* isiuatsin monotsaya Noemí,* uan iokichpipiluan monotsayaj Mahlón* uan Kilión.* Yejuan nemiaj Efrata, tein no monotsa Belén tein poui Judá. Uan ajsikej Moab uan ompa mokaujkej.
3 Satepan, Elimélec momikilij uan Noemí mokauak sayoj iniuan iokichpipiluan.
4 Satepan, iokichpipiluan monamiktijkej iniuan siuamej de Moab: se monotsaya Orpá, uan okse Rut. Ompa nenkej kemej majtakti xiujmej.
5 Satepan Mahlón uan Kilión no momikilijkej. Noemí amo kipiayaok itakatsin nion iokichpipiluan.
6 Yejua ika mokuijkuik uan peuak mokepa Israel iniuan isiuamouan, porin ompa Moab kitekakilijka ke Jehová oksepa kintatiochiuijtoya israelitas uan kinmakatoya toni kikuaskej.*
7 Noemí uan ome isiuamouan kiskej de kampa nemiaj para yaskej Judá. Keman nejnentiayaj,
8 Noemí kiniluij: “Ximokepakan kampa nemi namomaj, uan maj Jehová nochipa namechtasojta ijkon kemej nanechtasojtaj nejua uan nankintasojtakej nookichpipiluan.
9 Maj Jehová namechpaleui oksepa ximonamiktikan uan kualtsin xinemikan”. Noemí kinmakak se beso* uan yejuan peuak tayokolchokaj.
10 Isiuamouan kiluiayaj: “Amo, amo timokepaskej, ta tiaskej mouan uan tinemitiuij iniuan israelitas”.
11 Sayoj ke Noemí kiniluij: “Ximokepakan nokoneuantsitsin, nenkaj nanyaskej nouan. Amo ueliok nikinpia okichpipil para iniuan namonamiktiskej.
12 Ximokepakan nokoneuantsitsin, xiakan, porin nejua semi ninanajtsinya uan amo uelisok nimonamiktis. Uan maski nejin youal nimonamiktiskia uan nikinpiaskia konemej,
13 ¿nankinchiaskiaj maj moskaltikan para iniuan namonamiktiskej? ¿Namoselti nanyetoskiaj nochi nejon xiujmej? Amo nokoneuantsitsin. Jehová nechtatsakuiltijtok. Uan semi nechtayokoltia nikitas ke nochi nejin no namechtajyouiltia namejuan”.
14 Uan yejuan oksepa peuak tayokolchokaj. Satepan Orpá kimakak se beso* imonan uan yajki, sayoj ke Rut amo kinekik kikaujteuas.
15 Yejua ika Noemí kiluij: “Xikita, okse nosiuamon mokepakya kampa nemij ichankauan uan oksepa kinueyichiuato tatadiosmej,* iuan xiouj”.
16 Sayoj ke Rut kiluij: “Amo xinechiluijtook maj nimitskaua uan maj amo mouanok niouj, porin nimitstojtokas* kampa tias uan kampa tinemitiuj no ompa ninemitiuj. Akin iniuan tinemis no iniuan ninemis, uan moDios yeski noDios.
17 Kampa tejua timomikilis, nejua ompa nimokauas hasta ke nimomikilis uan ompa nechtokaskej. Nimitskauas sayoj komo nimomikilia, uan maj Jehová semi nechtatsakuilti komo amo ijkon nikchiua”.
18 Keman Noemí kiitak ke Rut kitelnekia iuan yas, amo teyi kiluijok.
19 Uan kisentokakej nejnenkej para ajsiskej Belén. Keman ajsikej, nochin akin ompa nemiaj kimojkaitayaj uan siuamej moiluiayaj: “¿Toni kipanok Noemí?”.
20 Uan yejua kiniluiaya: “Amo xinechnotsakan Noemí,* ta xinechnotsakan Mara,* porin Dios semi nechtajyouiltiani.
21 Nikpiaya nochi keman niajki, sayoj ke Jehová kichiuak maj nimokepa noselti uan maj amo teyi nikpiaok. ¿Keyej nanechnotsaj Noemí? Jehová nechtatsakuiltijtok. Dios akin kipia nochi chikaualis semi nechtajyouiltijtok”.
22 Yejua nejin tein kipanok Noemí keman mokepak de Moab iuan isiuamon, Rut. Ajsikej Belén keman yekin peuaya kitekiaj xinach tein kiluiaj cebada.
Tajtolmelaualismej
^ Tokayit tein kijtosneki ‘noDios se tekiuaj’.
^ Tokayit tein kijtosneki ‘tein nechyolpaktia’.
^ Tokayit tein itech tajtol hebreo xa kijtosneki ‘kuetaui’ oso ‘kokoxkej’.
^ Tokayit tein kijtosneki ‘kuetaui’ oso ‘tami’.
^ Itech hebreo, “pantsin”.
^ Oso “kinpitsoj”, “kintenamik”.
^ Oso “kipitsoj”, “kitenamik”.
^ Oso “tiotsitsin”.
^ Oso “nimitstoktilis”.
^ Tokayit tein kijtosneki ‘tein nechyolpaktia’.
^ Tokayit tein kijtosneki ‘chichik’.
