Itech Biblia ijkuiliujtok tein Dios kineki maj tikmatikan. Moneki timomachtiskej para tikixmatiskej Dios, porin ompa moajsi tein kinemilia (Juan 17:3; 2 Timoteo 3:​16). Ompa, Jehová kijtoua keniuj kineki maj tinemikan uan tein kiixtalijtok kichiuas nikan taltikpak (Génesis 3:​15; Apocalipsis 21:​3, 4).

Nion se amatajkuilol ueli tepaleuia ijkon kemej Biblia. Itajtol Dios techpaleuia maj titetasojtakan uan maj titeiknelikan ijkon kemej Jehová kichiua. No kijtoua ke satepan kualtsin tinemiskej, uan nejon techpaleuia maj tiyolseujtokan maski titeltajyouijtoskej. Biblia no kinextia nochi tein amo kuali tein mochiujtok, nochi tein amo kiyolpaktia Dios (Salmo 119:105; Hebreos 4:​12; 1 Juan 2:​15-​17).

Keman Biblia moijkuiloj ne uejkauj, moijkuiloj itech tajtol hebreo, arameo uan griego. Motajtolkepani nochi oso sayoj seki amatajkuilolmej itech panoua 3,000 tataman tajtolmej. Amo onkak nion se amatajkuilol tein okachi kitajtolkepanij, uan tel miakej kipiaj. Itech Biblia okachi ika motajtoua iTaixyekanalis Dios, uan ompa moijtojkaya ke mochiuaskia nejin: “Itech nochi taltikpak moteixmatiltis kuali tanauatilmej tein ika tajtoua iTaixyekanalis Dios uan ijkon nochin uelis kikakiskej, uan satepan tatamis” (Mateo 24:14).

Kemej tikmatij ke tein kijtoua Biblia motelneki, tiktemojkej maj amo mopata tein kijtoua, ta maj kipia nochin tanemililmej tein yekinika moijkuilojkej uan maj kuali moajsikamati. Kampa kijtoua (“Toni moitak para maj kuali motajtolkepa Biblia”, “Tein kipia nejin Biblia” uan “Tein tapaleuij maj hasta axkan tikpiakan Biblia”) uelis tikonitas okseki taman.

Akin kitasojtaj Jehová uan kiueyichiuaj, kitemouaj kualtsin kiajsikamatiskej iTajtol Dios uan maj kipia nochi tein yejua kijtoj (1 Timoteo 2:4). Yejua ika, tiktajtolkepkej nejin Biblia itech náhuatl del norte de Puebla, para maj mosentoka motajtolkepa itech okachi miak tajtolmej. Tejuatsin akin tikonneki tikonixmatis Dios, tiktajtaniaj toTajtsin maj nejin Biblia mitsonpaleui xikonixmati (Hechos 17:27).