Keman mochiua se tetsauit, itaixpantijkauan Jiova ijsiujka tikitaj keniuj tikinpaleuiskej tokniuan akin kipanotokej nejon ouijkayot. Ika nejin tiknextiaj ke yekmelauj timotasojtaj (Juan 13:34, 35; 1 Juan 3:17, 18). ¿Keniuj titapaleuiaj?

Titapaleuiaj ika tomin. Akin kichiuayaj kemej Cristo itech altepet Antioquía kinpaleuijkej ika tomin akin no kichiuayaj kemej Cristo itech altepet Judea keman kipanokej se ueyi mayan itech nejon altepet (Hechos 11:27-30). No ijkon, keman tikmatij ke tokniuan tajyouijtokej ika se ueyi ouijkayot kansaika itech taltikpak, itech tonechikol tiktemakaj tomin uan motitani kampa moneki kiseliskej nejon tapaleuil (2 Corintios 8:13-15).

Titapaleuitij kampa mochiua tetsauit. Tayekananij akin moajsij kampa mochiuak se tetsauit kintemouaj sejsemej akin pouij itech nechikol uan kiitaj maj kuali yetokan. Tokniuan akin kiixyekanaj tekit kampa mochiua se tetsauit uelis kiitaskej maj motemaka tein kikuaskej, at tein tayiskej, tein ika motakentiskej, tapajtilis uan kani mokauaskej. Miakej itaixpantijkauan Jiova akin kimatij kichiuaskej se tekit, ika inintomin youij tapaleuitij kampa mochiuak tetsauit oso kiyekchijchiuatij ininchan tokniuan oso Kalmej kampa Mosentiliaj. Kemej kuali timouikaj uan miakpaya tisentekitinij, ueli ijsiujka titapaleuiaj keman panoua se ouijkayot. Uan maski tikinpaleuiaj sayoj “tokniuan taneltokani”, no tikinpaleuiaj oksekin keman ueli, maski kipiaskej okse taneltokalis (Gálatas 6:10).

Tikinyolseuiaj ika iTajtol Dios uan tikinpaleuiaj maj kuali momachilikan. Akin kipanokej se tetsauit okachi kinekij maj kinyolseuikan. Ijkuak, Jiova, “Dios akin temaka nochi yolseuilis”, kinyolchikaua (2 Corintios 1:3, 4, TNM). Yejua ika, akin tajyouijtokej tikinnextiliaj Biblia kampa kijtoua tein mochiuas satepan, tein kinextiaj ke amo uejkaua iTekiuajyo Dios kiixpolos nochi tataman tetsaujmej tein kichiua maj onka tekokojkayot uan tajyouilis (Apocalipsis 21:4).

• ¿Keyej tiitaixpantijkauan Jiova ueli ijsiujka titapaleuiaj keman mochiua se tetsauit?

• ¿Keniuj tikinyolseuiaj ika Biblia akin kipanokej se tetsauit?