TAMACHTILIS 5
Samuel nochipa kichiuak tein Jiova kinekia
Keman katka konetok, Samuel peuak nemi uan tekiti itech tabernáculo, kampa yayaj kiueyichiuatij Jiova. ¿Tikmati keyej Samuel nemia itech tabernáculo? Maj achto tikitakan tepitsin toni kichiuak imomaj. Motokaytiaya Ana.
Ana miak xiujmej kinekia kipias se konetsin, sayoj ke amo uelia kipiaya. Yejua ika kitataujtij Jiova uan kiluij: “Jiova, ika kualtakayot, xinechpaleui”. Uan motenkauak: “Komo nikpia se okichpil, nikuikas itech tabernáculo maj ompa nemi uan maj ompa tekiti”. Jiova kichiuak tein Ana kitajtanij, uan Ana kipiak se konetsin. Yejua kitokaytij Samuel. Keman Samuel kipiaya eyi oso naui xiuit, Ana kiuikak tabernáculo kampa kitekitiliskia Dios, ijkon kemej motenkaujka.
Tiopixkat akin taixyekanaya itech tabernáculo motokaytiaya Elí. Sayoj yejua akin kinpaleuiaya israelitas maj motokikan iuan Dios. Ome ikoneuan, akin uejueykejya katkaj, no ompa tekitiaj. Itech tabernáculo kiueyichiuayaj Jiova, uan yejua ika akin ompa nemiaj monekia kichiuaskej tein kuali. Sayoj ke Samuel kiitaya ke ikoneuan Elí kichiuayaj tein tel amo kuali. ¿No kichiuak Samuel tein amo kuali, kemej ikoneuan Elí? ¿Toni tiknemilia?... Amo, ta Samuel kisentokak kichiuak tein Jiova kinekia, ijkon kemej kimachtijkaj itatuan.
¿Toni monekiskia kichiuas Elí? ¿Melauj ke monekia kintatsakuiltis ikoneuan?... ¡Kemaj! Elí amo monekia kinkauasok maj tekitikan itech tabernáculo. Sayoj ke Elí amo teyi kichiuak. Yejua ika Jiova kualanik iuan Elí uan nejon ome ikoneuan, uan kiixtalij kintatsakuiltis.
Samuel kiluij Elí tein Jiova kinauatij
Se youak keman Samuel kochtoya, kikakik ke aksa kinotsaya uan kiluiaya: “¡Samuel!”. Yejua motaloj kampa yetoya Elí, sayoj ke yejua kiluij: “Nejua amo nimitsnotsak”. Nejin panok ojpaok. Satepan ke kinotskej ika expa, Elí kiluij Samuel: “Komo oksepa tikaki ke mitsnotsaj, xitanankili: ‘Xinechilui, Jiova. Nimitskaktok’”. Keman Samuel kichiuak nejon, Jiova kiluij: “Xikilui Elí ke nikintatsakuiltis ichankauan porin kichiujtokej tein amo kuali”. ¿Ouij kikisak Samuel kiluis Elí nejin tanauatil? ¿Toni tiknemilia?... Ouij kikisak. Tein melauj, Samuel mouia. Sayoj ke kichiuak tein Jiova kiluij maj kinauati Elí. Tein Dios kijtojka mochiuak: satepan, Elí uan nejon ome ikoneuan momikilijkej.
Tein kichiuak Samuel techmachtia miak taman. Yejua nochipa kichiuak tein Jiova kinekia maski kiitaya ke oksekin kichiuayaj tein amo kuali. ¿Uan tejua no ijkon tikchiuas? ¿Tiyeski kemej Samuel uan tikchiuas tein Jiova kineki? Komo tikchiua, tikyolpaktis Jiova uan motatuan.
