AMAIX Apocalipsis oso Revelación, kijtoua tein Dios “kiitaltij itekitikauj [...] ika neskayomej” (Revelación 1:1, TNM). Uan ompa ika motajtoua se siuaauilnenkej akin iixkuako ijkuiliujtok tokayit ‘Ueyi Babilonia’. No kijtoua ke ‘kinixyekana pueblojmej, tagayot, paísmej uan tein tajtouaj tataman tajtolis’ (Apocalipsis 17:1, 5, 15). Se yekmelauj siuat amo ueliskia kichiuaskia nejon, yejua ika Ueyi Babilonia sayoj kiixnextia teisa. Axkan, ¿toni kiixnextia?

Itech Apocalipsis 17:18 kijtoua ke yejua ‘ueyi pueblo tein kinyekantinemi nochi in tayekananij de nochi in taltikpak’. Tajtol “ueyi pueblo” techtanemililtia itech se oloch taltikpakneminij. Uan no, kijtoua ke nejin “ueyi pueblo” kinixyekana ‘tayekananij de nochi in taltikpak’. Nejin techajsikamatiltia ke itaixyekanalis Ueyi Babilonia ajsi semanauak taltikpak. Sayoj ke, ¿katiyejua taixyekanalis? Itaixyekanalis taneltokalis. Maj tikitakan seki textos itech amaix Apocalipsis tein techpaleuia maj ijkon tikijtokan.

Tein uelis kipiaskej taixyekanalis itech nochi taltikpak, uelis yeski se tekiuajyot, taneltokalis oso uejueyi tanamakanij.  Moajsikamati ke Ueyi Babilonia amo kiixnextia se tekiuajyot, porin iTajtol Dios kijtoua ke “tayekanani reyes [tataman taltikpak tekiuanij], yejuan nojonkes motajtakolmakatinenke iuan ne siuaauilnenke”. Maj moijto ke iniuan auilnemi taltikpak tekiuanij, kijtosneki ke iniuan mokui. Yejua ika, kinamiki maj motokayti “siuaauilnenke” (Apocalipsis 17:1, 2; Santiago 4:4).

Biblia no kijtoua ke keman nejin siuat ixpoliuis, kichokiliskej “comerciantes de nikan taltikpak”. Moyekita ke Ueyi Babilonia amo no kiixnextia uejueyi tanamakanij. Uan no, textos itech Biblia, kinextiaj ke tekiuanij uan uejueyi tanamakanij “uejka san” kiualitstoskej (Apocalipsis 18:3, 9, 10, 15-17). Ika nochi nejon, techuika maj tikijtokan ke amo kiixnextia taltikpak tekiuajyot, nion no uejueyi tanamakanij, ta kiixnextia taneltokalis.

Moajsi okse taman tein techpaleuia maj tikijtokan ke kiixnextia taneltokalis: moyekijtoua ke kinkajkayaua taltikpakneminij oso ‘kinnaualuia’ (Apocalipsis 18:23). Nochi tataman naualot mochiua ika ininchikaualis amokuali ejekamej. Yejua ika amo tikmoujkaitaj maj Biblia kilui Ueyi Babilonia, “kampa kalyetokke sayo amokuali ejekame” (Apocalipsis 18:2; Deuteronomio 18:10-12). Uan no, tikitaj ke nejon Ueyi Babilonia, senkis kitauelita taneltokalis tein melauak, ta kinixnamiki “tanauatiani” uan “taneltokani yolchipauke” (Apocalipsis 18:24). Kemej kiteltauelita taneltokalis tein melauak, kinixnamiki ika kualanyot ‘tein tanojnotstinemij itenkopa Jesús’ uan kemansa kinmiktia (Apocalipsis 17:6). Yejua ika, Ueyi Babilonia kiixnextia nochin taneltokalismej tein amo melaujkej, tein moajsij semanauak taltikpak uan kiixnamikij Jiova Dios.