¿TONI tanauatilmej tikonajsi keman tikonixtajtoltia periódico, tikonita televisión, oso tikonkaki tepostatsotson? ¡Ompa moijtouaj miak amo kuali tachiualismej, neteuilismej, uan tachiualismej tein ika kinmojmoujtiaj tekiuanij! Axkan xiontanemili itech mokuejmoluan. Komo momikilij se motasojikniuj oso se mochankauj oso kokolis, kichiua xionmoteltekipachojto. Xa tionmomachilia kemej Job, se takat yolkuali akin kijtoj kipiaya miak tajyouilis (Job 10:15).

Xa tionmotajtania:

• ¿Yejua nejin tein Dios nechnekiliaya uan kinnekiliaya oksekin?

• ¿Kani uelis nikajsis nepaleuil tein ika uelis nikxikos kuejmolmej?

• ¿Onkas yekyetolis se tonal nikan taltikpak?

Biblia kinankilia nejin netajtanilmej kemej techyolseuis.

“Totajtsin kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok.” (Apocalipsis 21:4)

 “Koxoj ajkotsikuinis ijkon kemej kichiua masat.” (Isaías 35:6)

“Ininixtololouan ixpopoyomej tapouiskej.” (Isaías 35:5)

“Nochin animajme [oso mikemej] ual kisaske kampa ne animajtekochme.” (Juan 5:28, 29)

“Nion se taltikpaknenkej kijtos: ‘Nimokokoua’.” (Isaías 33:24)

“Onkas tel miak tatet [oso takual] nikan taltikpak.” (Salmo 72:16)

Amo xikonnemili ke tajtolmej tein achto tikitakej sayoj se takochitalis. Dios motenkauak kiualkuis, uan Biblia kimelaua keniuj kichiuas.

Uan amo sayoj yejua. Biblia no techmachtia keniuj axkan uelis tikpiaskej yekmelauj yolpakilis. Xiontanemili itech mokuejmoluan uan monetekipacholuan. Xa mitsontekipachoua mochankauan, kokolis, xa porin momikilij se motasojikniuj, oso porin amo teyi tomin. Biblia techpaleuia maj tikxikokan nejon ouijkayomej uan techyolchikaua, no technankilia netajtanilmej kemej nejin:

• ¿Keyej titajyouiaj?

• ¿Keniuj uelis tikxikoskej netekipacholmej tein tikpiaj itech tonemilis?

• ¿Toni uelis tikchiuaskej tein techpaleuis kemej kalyetouanij maj tikpiakan okachi yolpakilis?

• ¿Toni techpanoua keman timomikiliaj?

• ¿Oksepa tikinitaskej totasojikniuan akin momikilijkejya?

• ¿Keyej uelis senkis tikneltokaskej ke Dios kichiuas ijkon kemej motenkaujtok?

 Kemej tikonixtajtoltijtok nejin tajtolmej, tikonnextia ke tikonneki tikonmatis tein Biblia tamachtia. Uan nejin amaix mitsonpaleuis xikonmati. Uelis tikonitas ke tatsintan moajsij inetajtaniluan párrafos. Tel miakej semi kiuelitaj momachtiskej ika netajtanilmej uan tanankililmej, kemej kichiuaj itaixpantijkauan Jiova keman momachtiaj Biblia, uan tikchiaj no xikonuelita. Maj Dios mitsontatiochiui keman tionmomachtis tein yekmelauj tamachtia Biblia, se teisa tein okachi kuali uelis tikonpanos.