BIBLIA TAYOLMAJXITIA: “Akin amo niman kualani okachi kuali ke se takat akin kipia chikaualis” (Proverbios 16:32).

TEIN KIJTOSNEKI: Komo amo niman tikualanij, semi techpaleuis. Kemansa, xa kinamiki maj tikualanikan. Sayoj ke, komo nochipa tikualanij, semi techijtakos. Miakpa, keman aksa kualani kijtoua oso kichiua teisa tein satepan kinemilia maj amo ijkon kichiuani.

TEIN UELIS TIKONCHIUAS: Amo niman xionkualani, porin ijkon amo tikonchiuas teisa tein amo kuali. Sekin kinemiliaj ke keman kualanij kinextiaj ke yolchikaujkej, sayoj ke nejon amo melauak. Biblia kijtoua: “Kemej se xolal tein moaxkatilijkej, tein amo kipia tepamit, ijkon tamati takat akin amo ueli kitsakuilia ikualanyo” (Proverbios 25:28). Achto ke tikonijtos oso tikonchiuas teisa porin tionkualani, xikontemo tikonmatis tein panok. Biblia kijtoua: “Itaajsikamatilis taltikpaknenkej kichiua maj amo niman kualani” (Proverbios 19:11). Komo tikonkaki oksekin ika nejmachkayot, tikonajsikamatis tein panok uan mitsonpaleuis amo niman xionkualani.

BIBLIA TAYOLMAJXITIA: “Xiktasojkamachilijtiyakan Totajtsin Dios” (Colosenses 3:15).

TEIN KIJTOSNEKI: Akin motasojkamatij kijtouaj ke okachi yolpakij. Hasta akin momikilij se akin kitasojtaj kijtouaj ke semi kinpaleuia maj kuali momachilikan keman kitasojkamatij tein kipiaj uan amo semi itech tanemiliaj tein amo kipiajok.

 TEIN UELIS TIKONCHIUAS: Mojmostaj xikonnemili oso xikonijkuilo seki taman tein tikontasojkamati. Amo moneki yeski uejueyi taman. Uelis tikontasojkamatis seki taman tein xa tiknemiliaj ke amo semi kipiaj ininpatiuj kemej ijkuak kualtsin tanesi, keman kualtsin tionmonojnotsa iuan aksa akin tikontasojta oso ke tikonsentoka tikonpia monemilis. Komo ijkon tikonchiua, okachi kuali tionmomachilis.

Semi mitsonpaleuis komo tikontasojkamatilia mochankauan uan akin iniuan tionmouika. Xikonnemili keyej tikonpatiuita uan xikonilui oso xikonijkuilouili. Nejon mitsonpaleuis okachi iniuan xionmouika uan tionyolpakis komo tikonchiua seki taman tein kuali ininka oksekin (Hechos 20:35).

MAJ AMO SE MOTAJTOLTEUI

“Se kipeualtis se neteuilis kemej yeskia se kitatapoliskia miak at tein kisentilijtoyaj; achto ke peuas neteuilis, xiyouj.” (PROVERBIOS 17:14.)

MAJ AMO SEMI SE MOTEKIPACHO IKA TEIN PANOS SATEPAN

“Amo ximoyolkuejmolokan den toni mochiuas mosta, porin ne tonal den mosta kualkuis okse ne kuejmololis. Cada se tonal kipia ne ouijkayot.” (MATEO 6:34.)

MAJ KUALI SE TANEMILI ACHTO KE SE KICHIUAS TEISA

“Kuali tanemililis mitsnejmachpias, uan taajsikamatilis mitsmatampauis.” (PROVERBIOS 2:11.)