Sekin kiitanij ke telpochmej akin miak tiempo kikuij Internet uelis kinpanos nejin:

• Nochipa kinekij kikuitoskej celular.

• Uelis kinkuejmoloskej itech Internet oso yejuan ijkon kinchiuiliskej oksekin.

• Uelis kiitaskej auilnemilis maski amo kitemoskej.

NOCHIPA KIKUITOSKEJ

Seki taman tein se kichiua itech Internet uelis ouij se kikauas, kemej se mauiltis. Uan nejin panoua porin ijkon kinchijchiuaj. Amatajkuilol En defensa de la conversación kijtoua: “Aplicaciones chijchiujtokej kemej amo se kinkauas”. Uejueyi tanamakaloyamej kitanij miak tomin keman tikuij miak tiempo se aplicación kampa nesi tein kinamakaj.

XIKONNEMILI NEJIN: ¿Miak tiempo kikuitokej mokoneuan inincelular? ¿Keniuj uelis tikonpaleuis maj kuali kikuikan tiempo? (EFESIOS 5:15, 16).

KEMAN TEKUEJMOLOUAJ ITECH INTERNET

Sekin niman kualanij, amo tetasojtaj nion tepoujkaitaj keman kikuij Internet. Nejin uelis kichiuas maj peua kinkuejmolokan oksekin.

Sekin ijkon kichiuaj porin kinekij maj miakej kinitakan uan maj kinixmatikan. Uan sekin kinemiliaj ke kinixtopeuaj keman amo kinyoleuaj maj kichiuakan teisa iniuan oksekin, kemej se iluit.

XIKONNEMILI NEJIN: ¿Tepoujkaitaj mokoneuan keman kikuij Internet? (Efesios 4:31). ¿Keniuj momachiliaj mokoneuan keman amo kinyoleuaj maj kichiuakan teisa iniuan oksekin?

AUILNEMILIS

Itech nejin tonalmej, Internet kichiuani maj okachi amo ouij se kiita auilnemilis. Uan maski tetatmej uelis kimatiskej toni kiitaj ininkoneuan, nejin amo nochipa tapaleuia.

Se kititanis oso se kiselis taixkopimej ika auilnemilis itech celular uelis kitapanauilis se tanauatil. Kemansa tanauatilmej tein kiixtaliaj tekiuanij uelis kichiuas maj kinteluilikan akin kititanij oso kiitaj taixkopimej ika auilnemilis.

XIKONNEMILI NEJIN: ¿Keniuj uelis tikonpaleuis mokonetsin maj amo kiita oso kititani taixkopimej ika auilnemilis itech Internet? (EFESIOS 5:3, 4).

KUALI XIKONMACHTI MOKONETSIN

Maski konemej uan telpochmej amo ouij kinkisa kikuiskej celular moneki maj kinpaleuikan. Amatajkuilol Indistractable (Indistraíble) kijtoua ke se kimakas konetsin se celular achto ke kimatis kikuis semi amo kuali, kemej yeskia se kikauas maj mopantamota itech at keman amo ueli ajkui.

Xikontsojkuilo tein tikonuelitaskia tikonchiuas oso xikonijkuilo tein tikonnemilia:

• Nitajtos iuan nokonetsin keyej moneki kinpoujkaitas oksekin keman kikuis Internet.

• Nikpaleuis maj amo moyolkoko keman oksekin kichiuaskej teisa uan amo kiyoleuaskej.

• Niktsakuas páginas kampa uelis nesis auilnemilis.

• Nikitas tein nokonetsin kipia itech icelular.

• Nikixtalis kanachi tiempo uelis kikuis celular.

• Amo nikauas nokonetsin maj kikui celular youak kampa kochi.

• Amo nikauas maj mokui celular keman titakuaskej.