TELPOCHMEJ UAN ICHPOCHMEJ
9. Keniuj mitsixmatij oksekin
¿TONI KIJTOSNEKI?
Oksekin amo sayoj mitsixmatij ika motokay oso kemej titamati, ta no mitsixmatij ika tein tikchiua, tein tikneltoka uan kemej timouika iniuan oksekin.
¿KEYEJ SEMI MONEKI?
Keman tikmati toni tikneki, tikchiua tein tikneltoka uan amo timokaua maj oksekin mitschiualtikan tein yejuan kinekij xikchiua.
“Miakej amo kimatij toni kinekij, hasta kintajtaniaj oksekin maj kiniluikan keniuj motakentiskej” (Adrian).
“Nikchiua tein kuali maski ouij nechkisa. Kuali nikinixmati akin iniuan kuali nimouika uan no kuali nimomachilia keman iniuan nietok” (Courtney).
BIBLIA KIJTOUA: “Amo xiksentokakan xikchiujtokan kemej kichiuaj akin axkan nemij; ta xikauakan maj Dios kipata kemej nantanemiliaj” (Romanos 12:2).
¿TONI UELIS TIKCHIUAS?
Para tikmatis toni tikneki axkan uan toni tikneki tikchiuas satepan, xikita tein kuali tikchiua, tein ouij mitskisa tikchiuas uan toni tikneltoka. Uelis timotajtanis nejin.
Tein ueli nikchiua: “¿Toni kuali uan niman ueli nikchiua? ¿Itech toni moita ke kuali nikchiua teisa? ¿Ueli nimotsakuilia para amo nikchiuas se taman tein amo moneki? ¿Niajsi itech hora tein nikijtoua, kuali nitekiti uan nikinpaleuia oksekin?”.
TEIN UELIS TIKCHIUAS: Komo amo tikyekmati toni kuali tikchiua, xikinilui maj mitsiluikan motatuan oso se akin kuali iuan timouika.
BIBLIA KIJTOUA: “Sayoj ke sejse maj kiyekita tein kichiua, uan ijkon yolpakis keman kiitas tein yejua kichiuak, uan amo sayoj kiitstos tein okse ueli kichiua” (Gálatas 6:4).
Tein ouij mitskisa tikchiuas: “¿Ijkon kemej nechixmatij oksekin onkak se taman tein okachi kuali uelis nikchiuas? ¿Kemanian okachi nikneki nikchiuas tein amo kuali? ¿Itech toni seki taman moneki nimotsakuilis?”.
BIBLIA KIJTOUA: “Komo tikijtouaj ‘Amo tikpiaj tajtakol’, sayoj tejuan timokajkayaujtokej” (1 Juan 1:8).
Tein tikneltoka: “¿Katiyejua tanauatilmej ika nimoixyekana, uan keyej? ¿Nikneltoka ke Dios nemi? ¿Toni nikitani tein kinextia ke yejua nemi? ¿Toni tein mochiua kampa ninemi amo nikuelita, uan keyej? ¿Keniuj nikita tein panos satepan?”.
BIBLIA KIJTOUA: “Tiyektanemilis mitsnejmachpias, uan taajsikamatilis mitsmatampauis” (Proverbios 2:11).
Xa no tikonuelitas
ITANANKILILUAN 10 NETAJTANILMEJ TEIN KIPIAJ TELPOCHMEJ
¿Keniuj yekmelauj nitanemilia?
Komo tikmati toni kuali tikchiua uan toni amo tikyekchiua, uan tikmati toni tikixtalia tikchiuas uan keyej kuali timonejnemiltia, kuali titaixpejpenas keman oksekin mitsiluiskej toni xikchiua.
