TAMACHTILIS ITECH IPEUJYAN AMAIX | ¿TIKONSELIS OKACHI UEYI NETETAYOKOLIL TEIN DIOS KITEMAKA?
Iueyi netetayokolil Dios. ¿Keyej kitelpia ipatiuj?
¿Toni kichiua xikonpatiuita se netetayokolil? Tikyekmatij ke seki taman yejua nejin: 1) akoni kitemakak netetayokolil, 2) keyej kitemakak, 3) toni monekik kichiuas uan ijkon kitemakas uan 4) ox nejon netetayokolil tapaleuij itech se taman tein yekmelauj monekia. Titanemiliskej itech nejin naui taman uelis techpaleuis maj okachi tiktasojkamatikan taxtauil, okachi ueyi netetayokolil tein Dios techmakani.
¿AKONI KITEMAKAK NETETAYOKOLIL?
Se netetayokolil uelis tikpatiuitaskej komo akin techmakak kipia tanauatil oso semi tikpoujkaitaj. Okseki netetayokolilmej xa tikinpatiuitaj porin techmakak se tochankauj akin tiktasojtaj oso se akin kuali iuan timouikaj, maski amo semi patiyoj. Ijkon katka netetayokolil tein Rusell kimakak Jordan akin ika titajtojkej itech yekinika tamachtilis. Sayoj ke ¿keniuj mouika nejon iuan taxtauil?
Yekinika, Biblia kijtoua ke “Dios techualtitanilij ya ne iyojtsin Konetsin nikan taltikpak para maj tejuan tikpiakan ne nachipa nemilis ika ne chikaualis de Cristo” (tejuan tiktalilijkej cursivas; 1 Juan 4:9). Nejon kichiua maj nejon netetayokolil kitelpia ipatiuj, porin amo akin kipia okachi tanauatil ke Dios. Se hebreo akin kijkuiloj Salmo, kijtoj: “Tejua, akin motokay Jiova, sayoj tejua okachi tiUeyichiujkej itech nochi taltikpak” (Salmo 83:18). Nejin se ueyi netetayokolil porin techmakak akin okachi Ueyichiujkej.
Ojpatika, Dios yejua “toUeyiTajtsin” (Isaías 63:16). ¿Keyej tikijtouaj nejon? Porin techmakak tonemilis. Uan no, techyekpia uan toka motekipachoua kemej kichiua se kuali tepopaj iniuan ikoneuan. Keman Dios ininka tajtoj sekin akin pouiaj itech ixolal ne uejkauj, akin kintokaytiayaj Efraín, tajtanik: “¿Amo Efraín nokoneuj akin tel kuakualtsin, akin nikteltasojta? [...] Uan yekmelauj nikiknelis” (Jeremías 31:20). Axkan, Dios no ijkon kinita akin kiueyichiuaj. Amo sayoj toTachijchiujkauj akin kipia miak chikaualis, ta no toTajtsin akin techtasojta uan akin kuali iuan timouikaj. Yejua ika, tein yeski netetayokolil tein techmakas senkis tikpatiuitaj.
¿KEYEJ KITEMAKAK?
Seki netetayokolilmej motelpatiuitaj porin motemakakej ika netasojtalis uan amo porin monekia motemakas. Akin kiuelita kitemakas teisa amo kichia maj kimakakan teisa.
Dios kitemakak iKonetsin maj toka momikiliki porin techtasojta. Biblia kijtoua: “Dios technextilij ya ne itetasojtalistsin ijkuin: Dios techualtitanilij ya ne iyojtsin Konetsin nikan taltikpak para maj tejuan tikpiakan ne nachipa nemilis ika ne chikaualis de Cristo” (tejuan tiktalilijkej cursivas; 1 Juan 4:9). Dios amo monekia kichiuas nejon. Maj Dios kiixtauani “nochi totajtakoluan” itechkopa Jesús kinextia ke Dios “techueyiyoliknelij”, se taman tein amo technamikia (tejuan tiktalilijkej cursivas; Romanos 3:24).
¿Keyej nejin netetayokolil tein Dios techmakak kinextia ke “techueyiyoliknelij”? Biblia kimelaua: “Dios techueyinextilia iueyitetasojtalistsin maski tejuan tech ne tonal tikatkaj semi titajtakolejke. [...] Cristo momikilij toixpatka” (Romanos 5:8). Iueyi netasojtalis Dios, kiolinij maj techmakixti porin amo tiuelij timopaleuiaj uan titajtakouanij. Tejuan amo technamikia nejon netasojtalis uan amo keman uelis tikixtauiliskej. Inetetayokolil kinextia ueyi netasojtalis tein amo akin kinextiani.
¿TONI MOTEMAKAK?
Seki netetayokolilmej semi patiyojkej porin akin kitemakak monekik kichiuas se ueyi taman. Keman aksa techmaka teisa tein semi kipatiuita, kichiua maj nejon netetayokolil okachi tikpatiuitakan.
Dios “kualtitanik Iyojtsin Ikonetsin” (tejuan tiktalilijkej cursivas; Juan 3:16). Yejuatsin kitemakak akin okachi kitasojtaya. Tel miak millones xiujmej Jesús tekitik iuan Dios keman kichijchiuak iluikak uan taltikpak uan mochiuak “akin yejua kiteltasojtaya” (Proverbios 8:30). Dios semi kitasojta iKonetsin, Jesús akin “tamati kemej Dios akin amo ueli se kiita” (Colosenses 1:13-15, TNM). Amo keman moajsinij omen maj ijkon mouikakan.
Maski ijkon, Jiova kinekik kitemakas iKonetsin (Romanos 8:32). Kemej tikitaj, kitemakak tein okachi kuali tein kipiaya. Maski kiteltasojtaya, kitemakak.
¿KEYEJ SEMI MONEKIK?
Seki netetayokolilmej tikinpatiuitaj porin techpaleuia itech se taman tein motelneki. Xikonnemili ke tejuatsin moneki tikonselis se taman tapajtilis tein uelis mitsonmakixtis sayoj ke amo ueli tikonixtaua, uan aksa kijtoua ke mitsonixtauilis. ¿Melauak ke semi tikontasojkamatiliskia?
“Porin ijkon kemej itech Adán nochin momikilijtokej, no ijkon itech Cristo nochin nemiskej” (1 Corintios 15:22, TNM). Tinochin tiikoneuan Adán timomikilijtokej porin amo tiuelij timokixtiliaj kokolis uan mikilis; amo ueli toselti timotokiaj iuan Dios nion ueli timoajsij tichipaujkej iixpan. Uan nion no tiuelij tikmakixtiaj aksa itech mikilis. Biblia kinextia ke nion akin “ueli kimakixtia se iikniuj, nion ueli kimaka Dios se taxtauil tein ika mopaleuis” (Salmo 49:7, 8). Moneki maj niman techpaleuikan, porin amo tiuelij tikixtauaj tein ika timomakixtiskej. Toselti amo tiuelij timopaleuiaj.
Iueyi netasojtalis Jiova, kiolinij maj ika miak pakilis kitemaka taxtauil tein ika techmakixtiskia uan kichiuak itechkopa Jesús. ¿Keniuj taxtauil kichiua nejon? “Iesyotsin de Jesucristo Ikonetsin Dios, [...] techchipautinemi de nochi totajtakol.” Nejin kijtosneki ke titakuaujtamatiskej itech iesyo Jesús tein kitoyauak tapaleuia maj Dios techtapojpolui totajtakoluan uan maj tikpiakan nemilis nochipaya (1 Juan 1:7; 5:13). Taxtauil no kinpaleuis akin tikintasojtaj uan momikilijkejya. Biblia kijtoua: “Porin kuak ne achto tagat Adán motajtakolmakakak, ijkuakon in mikilis peuak kinkitskia in taltikpakuani. Uan no ijkon kuak Cristo pankisak yoltok intsalan in animajme, ijkuakon Dios kitsinpeualtij nitekiu de kinpankixtis yoltokke itaneltokakauan” (1 Corintios 15:21). *
Inemilis Jesús tein kitemakak yejua okachi ueyi netetayokolil tein motemakani porin techmakak akin okachi ueyichiujkej itech nochi taltikpak uan iluikak porin semi techtasojta. Amo akin kitemakani se netetayokolil tein okachi ueyi ijkon kemej Jiova Dios. Uan amo moajsi okse netetayokolil tein motelnekia maj techmakakan porin tapaleuia maj techkixtilikan tajtakol uan mikilis. Tikyekmatij, ke amo moajsi okse netetayokolil kemej taxtauil.
^ párr. 19 Komo tikonneki tikonmatis okachi keniuj Dios kiixtalijtok oksepa kinmakas nemilis akin momikilijkejya, xikonixtajtolti amaix ¿Toni yekmelauj tamachtia Biblia? itech capítulo 7, tein kichijchiujkej itaixpantijkauan Jiova tein moajsi itech www.ps8318.com/ncj.