DOREEN amo uelia kineltokaya keman kimatik ke inamik, Wesley, akin sayoj kipiaya 54 xiujmej, kiajxilijkej se ueyi kokolis itech itsontekon. * Tapajtianij kiluijkej ke sayoj nemiskia seki metsti. Doreen kijtoua: “Miak semanas amo uelia nikneltokaya nion nikajsikamatia. Nikmachiliaya ke nejin kinpanotoya oksekin, amo tejuan. Amo nikmatia toni nikchiuas”.

Tetayokoltij tikijtoskej ke miakej momachiliaj ijkon kemej Doreen. Tinochin uelis tikpanoskej se ouijkayot kemej nejon. Miakej tel kuali tein kichiuaj porin motemakaj kiyekpiaskej se ininchankauj akin kipia se kokolis tein ika momikiliti. Sayoj ke, se kiyekpias se akin mokokoua semi ouij. ¿Keniuj uelis kalyetouanij kiyolseuiskej uan kiyekpiaskej se akin kitasojtaj akin kipia se kokolis tein ika momikiliti? ¿Keniuj uelis kitsakuiliskej tein xa kimachiliskej akin kiyekpiaj se akin mokokoua? Ijkon kemej moualtokiaj tonalmej keman momikilis, ¿toni uelis kichiuaskej? Yekinika, maj tikitakan keyej axkan semi ouij se kiyekpias se akin momikilitiya.

Se siglo achto, hasta itech altepemej kampa okachi motani tomin, miakej amo miak xiujmej nemiaj ijkon kemej axkan. Niman momikiliayaj keman kokolispeuayaj oso keman kipanouayaj tein amo kichiayaj. Amo nochin ueliaj yayaj kaltapajtiloyan uan miakej kinyekpiayaj ininchankauan ininkalijtik uan ompa momikiliayaj.

Itech nejin tonalmej, tein kiajsinij tamatinij kinpaleuia tapajtianij maj kikuikan tataman pajti tein semi chikauak uan ika kichiuaj maj okachi se nemi. Akin achto niman momikiliskia ika se taman kokolis, axkan uelis nemis okachi miak xiujmej. Sayoj ke, nejon amo kijtosneki ke pajtis. Miakpa, semi mokokoua uan amo ueliok moita iselti. Uan moneki kichiuaskej miak taman keman kinyekpiaskej uan nejon semi tesioujtij.

Okachi miakej momikiliaj itech kaltapajtiloyamej ke ininkalijtik. Axkan miakej amo kimatij toni taman panoua keman aksa momikilitiya uan amo miakej kiitanij ijkuak aksa momikilia. Yejua ika, nejon uelis kichiuas  maj aksa amo kuali kiyekpia se ichankauj akin mokokoua oso maj amo kiyekpia. ¿Toni uelis tapaleuis?

Miakej semi motayokoltiaj keman se akin kitasojtaj kiajxiliaj se kokolis tein ika momikiliti, ijkon kemej kipanok Doreen. Maski tionmotekipachojtos, tionmoujtos uan tiontayokoxtos, ¿toni uelis mitsonpaleuis xikonixnamiki nejon ouijkayot? Se itekitikauj Dios akin amo kikauak, motataujtij: “Xitechnextili keniuj tikpouaskej totonaluan, ijkon uelis tikpiaskej se yolo ika tamatilis” (Salmo 90:12). Xikontataujti Dios maj mitsonpaleui xikonmati keniuj uelis tionpanos okachi tonalmej iuan mochankauj akin mokokoua achto ke momikilis.

Uelis kuali tikonchiuas nejon, komo achto kuali tikonixtalia tein tikonchiuas. Komo akin tikontasojta ueliok tajtoua uan kineki ika tajtos, uelis tikontajtanis akoni moneki kiixejekos seki taman keman yejua amo uelisok kichiuas. Tiontajtos iuan ika tein kineki maj mochiua, uelis tapaleuis maj satepan amo semi onka kuejmolmej oso maj kalyetouanij amo kinkuejmolo inintanemilil porin moneki kiixejekoskej se taman tein yejua amo ueliok kiixejekoua. Uelis tikontajtanis ox kineki maj kikuikan seki taman tein kipaleuis maj kisentoka yolto, maj kiuikakan kaltapajtiloyan oso maj kimakakan okseki taman pajti. Komo achto kuali ika nantajtouaj, nejon namechpaleuis kemej kalyetouanij okachi xikitakan keniuj nankiyekpiaskej namochankauj ijkon kemej okachi mokokoua. Biblia kijtoua: “Amo kuali kisa tein moixtalia mochiuas keman amo moteixejekoltia” (Proverbios 15:22).

Akin kiyekpia se akin mokokoua, moneki kiyolseuis. Akin mokokoua moneki maj kiluikan ke kitasojtaj uan ke amo iselti yetok. ¿Keniuj se kipaleuis? Xikonixtajtoltili amaixmej uan xionmokuikati nekuikatilmej tein kiyolpaktiaj uan tein kiyolchikauaj. Uan no, miakej kuali momachiliaj keman se ininchankauj kinmakitskia uan kinnojnotsa ika nejmachkayot.

No tapaleuia maj akin kikalpanotij kijtokan akonimej. Se taman tein motematiltij, kimelaua: “Moijtoua ke maski okseki taman itech se inakayo amo tekitiok, se kisentoka se takaki. Akin mokokoua uelis kisentokas takakis maski moitas ke kochtok. Yejua ika, amo xikonijto teisa tein amo tikonijtoskia komo yejua ijsatoskia”.

Komo ueli, ximosentataujtikan. Biblia kijtoua ke se tonal, Pablo se imomachtijkauj Jesús uan akin iniuan  yetoya moajsikej itech se ueyi ouijkayot uan hasta kinemilijkej ke momikiliskiaj. ¿Keniuj kitemojkej nepaleuil? Pablo kiniluij akin kuali iniuan mouikaya maj ininka motataujtianij (2 Corintios 1:8-11). Keman senkis se motekipachoua uan se kipia se ueyi kokolis, se motataujtis ika nochi se iyolo semi tapaleuia.

Se kimatis ke se akin tiktasojtaj momikilijtok senkis tetayokoltia. Uan nejon amo se kimoujkaita porin amo akin kineki momikilis. Amo techchijchiujkej maj timomikilikan (Romanos 5:12). ITajtol Dios kijtoua ke mikilis se “taixnamikkej” (1 Corintios 15:26, TNM). Yejua ika, moajsikamati maj amo tiknekikan maj momikili se akin tiktasojtaj.

Sayoj ke, kinemiliskej tein uelis panos kinpaleuis kalyetouanij maj amo senkis motekipachokan uan maj kichiuakan nochi tein kinpaleuis maj taxikokan. Seki taman tein uelis kinextis akin mokokoua moajsi itech recuadro “ Keman akin mokokoua momikilitiya”. Amo nochin akin mokokouaj kinextiaj nejon nion kipanouaj ijkon kemej tekpantokej itech recuadro. Maski ijkon, miakej kinextiaj se taman tein ompa moijtoua.

Satepan ke momikilia se akin tiktasojtaj, uelis techpaleuis maj titajtokan iuan aksa akin kuali iuan timouikaj akin techiluij ke techpaleuis. Akin kiyekpiakej akin mokokouaya uan oksekin kalyetouanij xa kinyolseuis maj se kinilui ke tein okachi ouij panokya uan ke akin kitasojtaj amo tajyouijtokok. ToTachijchiujkauj, akin semi techtasojta senkis techiluia “akin momikilijkejya, [...] amo kimatijok nion teyi” (Eclesiastés 9:5).

Motelneki maj titakuaujtamatikan iuan Dios, amo sayoj keman motelkokoua se tochankauj, ta no keman tikpanotoskej tayokol satepan ke momikilijya. Dios uelis mitsonyolseuis ika tajtolmej tein mitsonyolchikauaskej uan ika tein mitsonpaleuiskej oksekin. Doreen kijtoua: “Nikselij ininnepaleuil nochin. Tein melauj, amo tikchiayaj nochi nejon nepaleuil. Nonamik uan nejua senkis tikmatkej ke katka Jiova akin techiluijtoya: ‘Nikan niyetok namouan uan namechpaleuis xikixnamikikan nejin’. Amo keman nikelkauas”.

Kemej tikitaj, Jiova yejua akin okachi kuali teyekpia. Kemej yejua toTachijchiujkauj, kiajsikamati tayokol tein tikmachiliaj. Yejuatsin ueli uan kineki techyolchikauas uan techpaleuis maj titaxikokan. Uan tein okachi kuali, motenkauani ke kitamis mikilis uan amo akinok momikilis uan ke oksepa kinmakas nemilis millones akin momikilijkejya akin moajsij itech itanemilil (Juan 5:28, 29; Apocalipsis [Revelación] 21:3, 4). Keman nejon panos, uelis tikijtoskej nejin tein kijtoj Pablo: “Amo uelis techtanilis ok ne chikaualis de mikilis. [...] Amo uelis ok kimiktis totakayo” (1 Corintios 15:55).