Tel miakej kimatij ke seki taman tein tikchiuaskej kuali yetok sayoj ke okseki amo. Miakej amo kiuelitaj keman aksa ika mauiltiaj, keman aksa temiktia uan no keman ika mauiltiaj konemej. Sayoj ke miakej kiuelitaj keman kiitaj ke aksa kualtakat oso ininka motekipachoua oksekin, uan keman mochiua tein kuali yetok. Sayoj ke, ¿toni panoua itech okseki taman kemej akoni iuan se motekas, titakajkayauaskej oso amo, oso keniuj se kiniskaltis konemej? Miakej kinemiliaj ke uelis tikchiuaskej miak taman uan ke tein tikixtaliskej tikchiuaskej kuali yetok. Yejua ika miakej kiixtaliaj kichiuaskej tein yejuan kinemiliaj ke kuali yetok oso tein oksekin kijtouaj. Sayoj ke, ¿yekmelauj uelis techpaleuis nejin?

Miakpa keman tikixtaliaj tikchiuaskej teisa, timoixyekanaj ika tein tiknemiliaj ke kuali yetok oso amo (Romanos 2:​14, 15). Hasta konemej kiitaj keman teisa amo kuali yetok uan amo kuali momachiliaj keman kichiuaj teisa tein amo kuali. Ijkon kemej timoskaltijtiouij, timomachtiaj toni kuali uan toni amo kuali yetok ika tein kichiuaj uan kijtouaj oksekin, kemej tochankauan, akin iniuan timomachtiaj, akin techmachtiaj oso akin nemij kampa tejuan tinemij, uan no ika tein tikneltokaj uan kemej techiskaltijkej. Yejua ika, keman tikixtaliaj tikchiuaskej teisa timoixyekanaj ika tein techmachtijkej ke kuali yetok oso amo.

Tein tikmatij ke kuali yetok uelis techolinis maj titeiknelikan, maj timotasojkamatikan uan maj tikualtakamej. No uelis techpaleuis maj amo tikchiuakan tein ika uelis tikinyolkokoskej akin tikintasojtaj oso tein ueliskia techpinaujtis uan kichiuas maj amo kuali timomachilikan.

Tikchiuaskej tein tiknemiliaj ke kuali yetok, ¿yejua tein okachi kuali? Keman Garrick telpoch katka, kiixtalij kichiuas tein yejua kinemiliaya ke okachi kuali katka. Sayoj ke satepan kiitak ke moixyekanas ika tein yejua kinemiliaya ke kuali yetok amo kipaleuiaya. Yejua kijtoj ke semi amo yolpakia porin auilnemia, kikuia drogas, tauanaya uan tateuiaya.

Keman tikixtaliaj tikchiuaskej teisa timoyekanaj ika tein tiknemiliaj ke kuali yetok, sayoj ke miakpa no timoyekanaj ika tein oksekin kinemiliaj. Nejon techpaleuia porin oksekin ueli techiluiaj tein kinpanok uan toni kinpaleuij. Tochankauan, akin iniuan timouikaj uan akin nemij kampa tejuan tinemij techpoujkaitaj keman tikchiuaj tein yejuan kinemiliaj ke kuali yetok.

Tikchiuaskej tein oksekin kinemiliaj ke kuali yetok, ¿yejua tein okachi kuali? Keman Priscila katka ichpoch kichiuak tein kichiuayaj akin iniuan mouikaya, yejuan semi auilnemiaj. Sayoj ke kiitak ke kichiuas tein oksekin kinemiliayaj ke kuali yetok amo kiyolpaktiaya. Yejua kijtoua: “Nikchiuas tein oksekin kichiuayaj amo nechpaleuij. Uan nikchiuak miak taman tein amo kuali, tein ueliskia nechtajyouiltis”.

Keman tikixtaliskej toni tikchiuaskej, tein tejuan uan oksekin kinemiliaj tapaleuia. Sayoj ke komo timoixyekanaj ika nejin, amo nochipa kuali kisas tein tikixtaliskej. Kemansa amo tikitaj keniuj tein tikixtaliskej tikchiuaskej uelis techijtakos oso kinijtakos oksekin (Proverbios 14:12). Uan no maski tikitaskej ke tein tiknemiliaj oso kinemiliaj oksekin kuali yetok, ueliskia timopoloskej. Porin nejon tein tiknemiliaj ueliskia mopatas. Kemej tein panoua itech nejin tonalmej, achto amo kuali kiitayaj seki taman sayoj ke axkan kuali kiitaj, uan seki taman tein achto ipa momattoyaj kichiuaskej axkan amo kuali kiitajok.

¿Moajsi teisa tein uelis techixyekanas, tein techpaleuis maj tikmatikan toni kuali yetok uan toni amo? ¿Moajsij tayolmajxitilismej tein uelis techpaleuiskej maj tikixtalikan tikchiuaskej tein satepan amo techkuejmolojtos?

Kemaj, moajsi teisa tein uelis kuali techixyekanas tinochin maski seseko tikayomej. Tamachtilis tein kisentoka techpaleuis maj tikmatikan toni uelis techixyekanas, tein techpaleuis para maj nochipa tikchiuakan tein kuali yetok.