Jehová techiluia maj tikiluikan tein yeski kuejmol tein tikpiaskej oso nochi tein techtekipachoua (Salmo 55:22). Uelis tikiluiskej Dios tein yeski kuejmol tein tikpiaskej. Komo tejuan techtekipachoua, Jehová no kitekipachoua. Se motataujtis yejua yekinika taman tein techpaleuis maj kuali timomachilikan (Filipenses 4:6, 7).

Keman tikpiaj se kokolis itech totanemilil, xa tikmachiliskej ke tietokej toselti. Porin oksekin amo nochipa kimatij tein tikpanotokej (Proverbios 14:10). Sayoj ke, kemej Dios kemaj kimati tein tikpanotokej uan kuali techkaki, uelis tikiluiskej keniuj timomachiliaj. Jehová techita, kimati toni techyolxokolia, kimati ouijkayomej tein tikixnamikij, uan yejua ika kineki maj tikiluikan tein yeski taman tein techtekipachoua (2 Crónicas 6:29, 30).

Keman tiktataujtiaj Jehová, okachi titakuaujtamatij ke kineki techpaleuis. No uelis tikijtoskej kemej se akin kijkuiloj Biblia, yejua kiluij Dios: “Tikitani notajyouilis, tikita tein semi nechtekipachoua” (Salmo 31:7). Se kimatis ke Jehová kiita tein techtekipachoua, uelis techpaleuis para maj amo timosenkauakan. Yejuatsin amo sayoj kiita ke titajyouiaj, ta kuali kimati tein tikpanotokej uan ika Biblia techpaleuia maj tiyolseujtokan uan techyolchikaua.