Akin kichiuaj kemej Cristo uelis kichiuaskej tein taixejekol uan ijkon mopaleuiskej. Sayoj ke moneki kielnamikiskej tein tayolmajxitia Biblia. Nejin kinpaleuia maj kiajsikamatikan ke amo kuali yetok maj se mopaleui ika pistola, rifle oso okse taman tepos kemej nejon keman oksekin kinekiskej teijtakoskej. Maj tikitakan seki taman tein uelis techpaleuis maj tikmatikan toni uelis tikchiuaskej.

Jiova semi kipatiuita ininnemilis taltikpakneminij. Tekiuaj David kimatia ke itech Jiova “ualeujtok nemilis” (Sal. 36:9). Yejua ika, komo se tokniuj kiixejekoua mopaleuis maj amo kikuilikan tein iaxka, amo kichiuas maj momikili aksa (Deut. 22:8; Sal. 51:14).

Melauak ke uelis se kimiktis aksa ika tein yeski taman. Sayoj ke no melauak ke okachi amo ouij se kimiktis aksa ika se pistola oso okse taman tepos kemej nejon, yeski ijkon se kiixtalis oso amo. * Uan no, komo se tachtekkej moujtok uan kiita ke akin kitachtekijtok kipia se tepos, xa okachi yeski tamouilil uan aksa uelis mikis.

Youak achto ke kimiktiskiaj, Jesús kiniluij imomachtijkauan maj kiuikanij se espada, sayoj ke amo ika mopaleuiskiaj (Luc. 22:36, 38). Kiniluij nejon porin yaya kinmachtiti se taman tein motelneki: maj amo tateuianij, nion ijkuak tel miakej kinteuiskiaj (Luc. 22:52). Keman Pedro kinakaskotonak itakeual tayekankatiopixkat, Jesús kiluij:  “Xikyektali momachete kampa tikieua”. Ompa, kinmachtij se taman tein motelneki, se tayolmajxitilis tein ika moixyekananij itatojtokakauan hasta axkan: “Nochi naken moteuis ika machete, yejua ne no ika machete mikis” (Mat. 26:51, 52).

Kemej kijtoua Miqueas 4:3, itekitikauan Dios kichiuaj ininespadas kemej “tameualonimej uan ininlanzas, tein ika se tatejteki”. Akin yekmelauj kichiuaj kemej Cristo noyampa kinixmatij ke amo kitemouaj tateuiskej. Kichiuaj kemej tatitanil Pablo tayolmajxitij ika inepaleuil Dios: “Keme aksame namechchiuiliaj tensa ten amo kuali, ijkuakon namejuan amo no ijkon xikinixnamikikan” uan “[xinentinemikan] ika yolseuilis uan ika yolyemanalis iuan nochi taltikpakuani” (Rom. 12:17, 18). Yejua kipanok miak ouijkayomej, kemej keman kinekiaj kitachtekiskej (2 Cor. 11:26). Sayoj ke amo keman kitapanauilij itanauatiluan Dios uan ijkon ueliskia mopaleuis, ta takuaujtamatik iuan Dios uan itech tamatilis tein moajsi itech Biblia, porin nejon “okachi kuali ke teposmej tein mokuij itech neteuilis” (Ecl. 9:18).

Tiitatojtokakauan Cristo tikitaj ke tonemilis okachi kipia ipatiuj ke okseki taman. “Totajtsin Dios amo kipoua ke kipia semi ipatiu se tagat ika por nochi iricojyo ten kipixtinemi.” (Luc. 12:15.) Komo techtachtekia aksa akin kipia se tepos, moneki tiknojnotsaskej ika nejmachkayot. Komo amo techkaki, moneki tikchiuaskej nejin tein Jesús tayolmajxitij: “Takan aksa no mitskuilisneki motaken, ijkuakon xikauili ma kuika motaken hasta no mocamisa”, ika okseki tajtolmej, tikauaskej maj techkuili tein kinekis (Luc. 6:29; Mat. 5:39, 40). * Yejua ika, okachi kuali maj nochipa timotachilikan. Xa amo techtachtekiskej komo amo tiknextijtinemij tein tikpiaj uan komo kampa tinemij kimatij ke amo tiktemouaj timoteuiskej porin tiitaixpantijkauan Jiova (Prov. 18:10; 1 Juan 2:16).

Akin tikchiuaj kemej Cristo amo tikchiuaj tein kikuejmolos inintanemilil oksekin (Rom. 14:21). Komo momati ke se tokniuj kipia se pistola oso okse tepos kemej nejon tein ika mopaleuis keman oksekin kinekiskej kijtakoskej, okseki tokniuan xa tel amo kuali kiitaskej oso hasta kikauaskej Jiova. Netasojtalis techpaleuis maj tiktayekanaltikan tein kinemiliaj oksekin, maski ueliskia tikchiuaskej se taman tein amo kitapanauilia tanauatil tein kiixtalijtokej tekiuanij (1 Cor. 10:32, 33; 13:4, 5).

Akin tikchiuaj kemej Cristo timochikauaj tikauaskej se kuali neskayot (2 Cor. 4:2; 1 Ped. 5:2, 3). Komo se tokniuj kipia se tepos tein ika mopaleuis keman oksekin kinekiskej kijtakoskej, tayekananij kiyolmajxitiskej ika Biblia. Komo kisentoka kipia, amo kikaujtosok se kuali neskayot. Yejua ika amo uelis kiselis tekimej itech nechikol. No ijkon mochiuas iuan se tokniuj akin kiuikatinemi se pistola oso se tepos kemej nejon porin ijkon kitajtaniaj kampa tekiti. Okachi kuali yeskia maj kitemo okse tekit. *

Sejse tokniuj moneki kiixejekos keniuj mopaleuis yejua uan ichankauan, keniuj kiyekpias tein iaxka uan toni ika tekitis. Sayoj ke moneki kiitas tein tayolmajxitia Biblia, porin ompa nesi itamatilis uan inetasojtalis Dios. Kemej kitakamatij nejon tayolmajxitilis, tokniuan akin chikauak inintakuaujtamatilis kiixtaliaj amo kipiaskej se pistola oso okse tepos kemej nejon tein ika mopaleuiskej keman oksekin kinekiskej kinijtakoskej. Kimatij ke yekmelauj yolseujkanemiskej nochipaya komo takuaujtamatij iuan Dios uan kitakamatij tein tayolmajxitia Biblia (Sal. 97:10; Prov. 1:33; 2:6, 7).