1. ¿Keyej ueli tikijtouaj ke Jiova iaxka nochi tein onkak? (Xikonita taixkopin ipeujyan tamachtilis.)

NOCHI tein onkak iaxka Jiova: iluikak, taltikpak uan nochi tein itech onkak (Deut. 10:14; Apoc. 4:11). Uan kemej kinchijchiuak taltikpakneminij, tejuan no tiiaxkauan (Sal. 100:3). Sayoj ke, ijkon kemej panouanij xiujmej, Jiova kinixpejpenani sekin maj mochiuakan iaxkauan kemej amo panouani iniuan oksekin.

2. ¿Akonimej kijtoua Biblia ke iaxkauan Jiova kemej amo panouani iniuan oksekin?

² Kemej neskayot, itech Salmo 135 moijtoua ke itekitikauan Dios akin kitakamatkej uan nenkej itech xolal Israel katkaj iaxkauan akin kintelpatiuitaya (Sal. 135:4). Uan no, Oseas kijtojka ke sekin akin amo katkaj israelitas no pouiskiaj itech ixolal Jiova (Os. 2:23). Nejin mochiuak keman Jiova peuak kinixpejpena akin amo katkaj judíos maj tekiuajtikan iluikak iuan Jesús (Hech. 10:45; Rom. 9:23-26). Nejin taltikpakneminij akin kinixpejpenkej ika espíritu kintokaytiaj ijkon: “Nanpueblojuani nanyolchipauke ten Dios kichiuak ya ke naniaxkauan” (1 Ped. 2:9, 10). Uan miakej tokniuan tatakamatinij itech nejin tonalmej, akin kichiaj nemiskej nikan taltikpak, Dios no kinita kemej ‘ixolal’ uan ‘itaixpejpenaluan’ (Is. 65:22).

3. 1) ¿Akonimej kipiaj se kuali uikalis iuan Jiova? 2) ¿Toni tikitaskej itech nejin tamachtilis?

 ³ Axkan, akin kichiaj yaskej iluikak, “amo ueyi oloch ichkamej”, uan akin kichiaj nemiskej nikan taltikpak, ‘okseki ichkamej’, kisenueyichiuaj Jiova kemej “sayo se sen oloch” (Luc. 12:32, TNM; Juan 10:16). Tiknekij tiknextiliskej Jiova ke semi tiktasojkamatij maj ueli kuali timouikakan iuan. Itech nejin tamachtilis, tikitaskej keniuj uelis tiktasojkamatiliskej porin techmaka nejin ueyi tatiochiualis.

4. 1) ¿Katiyejua se taman kemej tiktasojkamatiliaj Jiova maj techkaua maj timochiuakan tiitasojikniuan? 2) ¿Keniuj Jesús kichiuak se taman kemej nejon?

⁴ Se taman kemej tiknextiliaj Jiova ke timotasojkamatij yejua keman timotemaktiaj iuan. Keman timoauiaj, nochin ueli kiitaj ke tiiaxkauan uan ke timotemakaj tiktakamatiskej (Heb. 12:9). Jesús kichiuak se taman kemej nejon keman moauij, porin kemej yeskia kiluij iTajtsin: “Nikchiuas motanejnekilis, noDios, nechtelyolpaktia” (Sal. 40:7, 8). Maski pouiaya itech se xolal tein ixyetoyaya kitekitilis Jiova, yejua motemaktij iuan.

5, 6. 1) ¿Keniuj momachilij Jiova keman Jesús moauij? 2) Xikonijto se neskayot tein kinextia keniuj momachilia Jiova keman iuan timotemaktiaj.

⁵ ¿Keniuj momachilij Jiova keman Jesús moauij? Biblia kijtoua: “Kuak kiauij ya Jesús, ijkuakon nimantsin Yejuatsin ajkopankisak den ueyiat. Uan ijkon tatapouik tech eluiyak uan Jesús kitak in [y]ektikatsin [e]spíritu de Totajtsin Dios ten ual temoaya keme se tototsin paloma uan kalayik itech Jesús. Uan no ijkon no mokakik se tajtolis den eluiyaktsinko ten Yejuatsin kijtoaya ijkuin: ‘Yejuatsin nijin Notasojkonetsin tenika semi nimoyolpakiltia’” (Mat. 3:16, 17). Jiova semi kiyolpaktij kiitas ke iKonetsin, akin iaxkaya katka, motemakaya kitekitilis sayoj yejuatsin. No ijkon, Jiova semi yolpaki keman timotemaktiaj, uan techtatiochiuis (Sal. 149:4).

⁶ Maj tikitakan se neskayot tein techpaleuis maj okachi kuali tikajsikamatikan keniuj momachilia Jiova keman iuan timotemaktiaj. Maj tiknemilikan ke se takat kitoka miak xochit. Se tonal, isiuapiltsin kiteki se xochit uan kitayokolia. Maski nochi xochit iaxka takat, kiyolpaktia maj isiuapiltsin kimaka nejon xochit porin ijkon kinextilia ke kitasojta. Tikmatij ke takat kiita ke nejon xochit yejua tein okachi kualtsin. No ijkon, Jiova semi yolpaki keman tikixtaliaj timotemaktiskej sayoj iuan (Éx. 34:14).

7. ¿Keniuj techpaleuia Malaquías maj tikajsikamatikan keniuj kinita Jiova akin kitekitiliaj ika nochi ininyolo?

⁷ (Xikonixtajtolti Malaquías 3:16.) Akin ayamo motemaktiaj nion moauiaj moneki kinemiliskej keyej motelneki kichiuaskej. Melauak ke tiiaxkauanya Jiova keman peua timoajsij itech iijtik tomomaj. Sayoj ke, maj tiknemilikan keniuj semi kiyolpaktia maj tikitakan kemej toTekiuaj uan maj timotemaktikan iuan (Prov. 23:15). Yejuatsin kinixmati akin kitekitiliaj ika nochi ininyolo uan kijkuiloua inintokay itech iamatajkuilol tein ika teelnamiki.

8, 9. ¿Toni kintajtania Jiova akin inintokay ijkuiliujtok itech iamatajkuilol tein ika teelnamiki?

⁸ Komo tiknekij maj totokay kisentoka ijkuiliujto itech iamatajkuilol Jiova tein ika teelnamiki, moneki tikchiuaskej  seki taman. Malaquías kijtoj ke moneki tikmoujkatokaskej Dios uan titanemiliskej itech itokay. Komo tikueyichiuaj teisa oso aksa, Jiova kijkuanis totokay itech iamatajkuilol (Éx. 32:33; Sal. 69:28).

⁹ Yejua ika, timotemaktiskej iuan Jiova amo sayoj kijtosneki timotenkauaskej iuan ke tikchiuaskej itanejnekilis uan timoauiskej. Sayoj sepa timotemaktiaj uan timoauiaj. Tikueyichiuaskej Jiova uan tiyeskij tiitekitikauan kijtosneki tiknextiskej ika tein tikchiuaj mojmostaj ke tiktakamatij (1 Ped. 4:1, 2).

10. ¿Keniuj moneki senkis nesis ke taman kemej monejnemiltiaj akin kitekitiliaj Jiova uan akin amo?

¹⁰ Itech tamachtilis tein achto tikitakej timomachtijkej ke Caín, Salomón uan israelitas kijtouayaj ke kiueyichiuayaj Dios, sayoj ke amo senkis kitakamatiaj. Ininneskayo senkis kinextia ke akin iaxkauan Jiova moneki kitauelitaskej tein amo kuali uan kitasojtaskej tein kuali (Rom. 12:9). Jiova kijtoua ke senkis nesi “keniuj tel taman se akin yolmelauak uan se akin amo yolkuali, se akin kitekitilia Dios uan se akin amo kitekitilia” (Mal. 3:18).

11. ¿Keyej moneki kiitaskej oksekin ke sayoj tikueyichiuaj Jiova?

¹¹ Okse taman kemej tiknextiliaj Jiova ke tiktasojkamatiliaj maj techixpejpenani kemej itekitikauan yejua keman tikchiuaj maj oksekin kiitakan ke tikixtalijkej tiktakamatiskej (Mat. 5:16; 1 Tim. 4:15). Maj timotajtanikan: “¿Ueli kiitaj oksekin ke senkis niktakamati Jiova? ¿Niktemoua nikiniluis ke niitaixpantijkauj?”. Maj tiknemilikan keniuj semi motayokoltiskia komo tipinauaj tikiniluiskej oksekin ke tiiaxkauan (Sal. 119:46; xikonixtajtolti Marcos 8:38).

12, 13. ¿Keyej ouij tekisa se kimatis ox seki tokniuan itekitikauan Jiova?

¹² Tetayokoltij tikijtoskej, sayoj ke seki tokniuan kipiaj “talnamikilis ten poui nikan taltikpak” uan yejua ika ouij tekisa se kimatis ox itekitikauan Dios (1 Cor. 2:12). Akin kipiaj nejon “talnamikilis”  kitayekanaltiaj inintanejnekilis (Efes. 2:3). Kemej neskayot, maski miakpa techyolmajxitianij, sekin amo kuali moita kemej motilmajtiaj uan kemej mochijchiuaj. Motaliliaj tilmaj tein tel kopitstik uan tein kichiua maj moita ininnakayo, hasta keman youij nechikolmej. Oksekin tel taman kemej kitekij inintson oso kemej moxiluiaj (1 Tim. 2:9, 10). Nejin kichiua maj oksekin ouij kinkisa kimatiskej ox itaixpantijkauan Jiova (Sant. 4:4).

¹³ Seki tokniuan kinextiaj ika okseki taman ke amo senkis kiixtopeuanij kemej monejnemiltiaj akin amo itekitikauan Dios. Kemej neskayot, keman youij iluimej, mijtotiaj uan monejnemiltiaj kemej amo kinamiki kichiuas se itekitikauj Dios. Kitaliaj itech redes sociales taixkopimej kampa nesij yejuan uan kijkuilouaj miak taman tein kinextia ke tanemiliaj kemej akin amo itekitikauan Dios. Xa amo kichiuanij se ueyi tajtakol uan kisentokaj pouij itech nechikol, sayoj ke uelis kijtakoskej ininkuali uikalis iuan Jiova akin mochikaujtokej kuali monejnemiltiskej (xikonixtajtolti 1 Pedro 2:11, 12).

14. ¿Keniuj moneki tikyekpiaskej tokuali uikalis iuan Jiova?

¹⁴ Nochi tein onkak itech taltikpak chijchiujtok kemej techolinis maj tiktayekanaltikan “tanejnekilis den pitsotik ten eua itech in tonakayo; uan yejua ne taixnejnekilis kuak kiyokolitaj in toixtololouan; uan yejua ne moueyinekilis ten eua itech miak tataman de se kipixtok” (1 Juan 2:16). Sayoj ke tejuan tiiaxkauan Jiova, uan yejua ika yejuatsin technauatia maj “tiksekokautiyakan ne amokuali nemilis uan ma tikmajpeutiyakan ne tanejnekilisme ten ualeutok iuan in taltikpakuani san. Uan [...] ma tiyekchipaukanemikan ika ne kuali taixejekolis, uan ma tikpiakan ne yolmelaukanemilis uan ma tikmouistilijtiyakan Totajtsin Dios nikan taltikpak” (Tito 2:12). Nochi itech tonemilis, kemej titajtouaj, kemej titakuaj uan titatayij, kemej timotilmajtiaj uan kemej timochijchiuaj, uan kemej titekitij, moneki kinnextilis akin techitaj ke tiiaxkauan  Jiova (xikonixtajtolti 1 Corintios 10:31, 32).

15. ¿Keyej moneki tiyeskij tikualtakamej iniuan tokniuan uan tikintasojtaskej?

¹⁵ No tiknextiaj ke tiktasojkamatij kuali timouikaskej iuan Jiova keman kuali tikinitaj tokniuan. Yejuan no iaxkauan Dios. Komo amo keman tikelkauaj nejin, nochipa tiyeskij tikualtakamej iniuan uan tikintasojtaskej (1 Tes. 5:15). Jesús kiniluij itatojtokakauan: “Komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:35).

16. ¿Toni neskayot tein kisa itech Tanauatil tein kiselijka Moisés tamachtia keniuj Jiova kinita itekitikauan?

¹⁶ Maj tikitakan se neskayot tein techpaleuis maj tikajsikamatikan keniuj moneki timouikaskej itech nechikol. Tein motekitiltiaya itech itemplo Jiova ixyetoya maj sayoj kitekitiltianij itech taueyichiualis. Itech Tanauatil tein kiselijka Moisés kuali momelauaya keniuj monekia kinyekpiaskej, uan akin amo kitakamatiaj nejon tanauatilmej monekia kinmiktiskej (Núm. 1:50, 51). Komo Jiova ijkon kiyekpiaya tein motekitiltiaya itech taueyichiualis, okachiok kinyekpias itekitikauan akin motemaktijkej iuan uan kitakamatij. Se tonal, kiluij ixolal: “Akin namechmatoka kimatoka noixtololo” (Zac. 2:8).

17. ¿Toni kiita uan kikaki Jiova?

¹⁷ Malaquías kijtoj ke Jiova kiita uan kikaki keniuj mouikaj itekitikauan (Mal. 3:16). Senkis nesi ke Jiova “kuali kinixmati naken pouij iuantsin” (2 Tim. 2:19). Yejuatsin kikaki uan kiita nochi tein tikijtouaj uan tikchiuaj (Heb. 4:13). Kiita keman amo tikinnextiliaj kualtakayot tokniuan. Sayoj ke uelis tikyekmatiskej ke no kiita keman titetapojpoluiaj, kuali titeseliaj uan tikualtakamej (Heb. 13:16; 1 Ped. 4:8, 9).

18. ¿Keniuj uelis tiktasojkamatiliskej Jiova porin techixpejpenak maj tipouikan itech ixolal?

¹⁸ Tiknekij tiknextiliskej Jiova ke semi tiktasojkamatij tipouiskej itech ixolal. Tikmatij ke timotemaktiskej iuan yejua tein okachi kuali tein tikixpejpenkej. Maski tinemij “intsalan in taltikpakuani ten semi amo yolkualime, porin yejuan kixtopeutinemij in Tajtoltsin de Dios”, tiknekij maj kiitakan nejin: “Amo aken uelis namechteluiliske uan amo no uelis namechpajpantijtinemiske tajtakol [...]. Uan nankichiutinemij ijkon keme se tanex tatanextia kampa tayouayanilot” (Filip. 2:15). Senkis tikixtopeuaj tein amo kuali (Sant. 4:7). Uan tikintasojtaj uan tikinpoujkaitaj tokniuan, porin tikmatij ke no iaxkauan Jiova (Rom. 12:10).

19. ¿Keniuj Jiova kintatiochiuia akin iaxkauan?

¹⁹ Itech Biblia moajsi nejin netenkaualis: “Jiova amo kisenkauas ixolal” (Sal. 94:14). Nejin yekmelauj mochiuas. Hasta komo timomikiliaj, Jiova amo techelkauas (Rom. 8:38, 39). “Komo tiyoltinemiske ok, ijkuakon tiyoltinemiske sayo para tiktekitilijtinemiske Totekotsin. [...] Uan komo tiyoltinemiske ok oso komo timomikiliske, ijkuakon ipa tipoutinemiske iuantsin Totekotsin.” (Rom. 14:8.) Tiktelnekij maj ejko tonal keman Jiova kinajokuis nochin itasojikniuan akin nochipa kitakamatkej (Mat. 22:32). Axkan tikseliaj miak tatiochiualismej. Kemej moijtoua itech Biblia, “yolpaki xolal tein iDios yejua Jiova, xolal tein yejuatsin kiixpejpenak maj iaxka” (Sal. 33:12).