AMATAJKUILOL Mateo kijtoua ke keman Jesús kalakik itech templo “peuak kinkalankixtia nochi ne tanamakani uan ne takouani ten tekititoyaj tech in tiopanijtik. Uan kikuik in mesajme den tomin papatani uan ika kalan takuamotak. Uan no ne ikpalme den ne seuilonime den ne naken kinnamakatoyaj in totome ten monotsa palomas [...]. Uan Jesús kinilij in tagayot ijkuin: ‘Acha amo nankimatij de ke tajkuiliutok ya tech in Tajkuilolamatsin ijkuin: “Nijin nochan kitokaytiske se kali de ne tatatautilis iuan Dios”. Uan namejuan nankichiutokke nochantsin keme yeskia se tekal kampa yetokke in tachtekini’” (Mat. 21:12, 13).

Amatajkuilolmej tein ika tajtouaj kemej nemiaj judíos ne uejkauj, kinextiaj ke akin tanamakayaj itech templo tel patiyoj tanamakayaj. Semej nejon amatajkuilolmej kijtoua ke se tonal itech yekinika siglo, ome uiltsitsin tein motemakayaj kemej nemaktilmej ininpatiuj ajsik tein kitania se tetekitilijkej veinticinco tonalmej. Tanauatil kinkauaya akin amo semi kipiayaj tomin maj kitemakanij ome uiltsitsin kemej nemaktilmej, sayoj ke kemej tel patiyojkej katkaj amo ueliajok kiixtauayaj (Lev. 1:14; 5:7; 12:6-8). Simeón ben Gamaliel, se tamachtijkej judío, tel amo kiuelitak nejon, uan kiixtalij maj amo motemakanijok miak nemaktilmej tein monekiaj motemakaskej. Ijkon, ininpatiuj ome uiltsitsin katka tein axkan aksa uelis kitanis komo tekiti sayoj eyi hora.

Ika tein tikitakejya, akin tanamakayaj itech templo tel patiyoj tanamakayaj uan ininka mauiltiayaj taltikpakneminij. Yejua ika Jesús kintokaytij “tachtekini”.