ITECH xiuit 1970, seki tatemouanij kiajsikej se amatajkuilol tein tatak ompa xolal Ein Gedi (Israel), kampa ika moajsi mar Muerto. Kiajsikej keman tachkuatoyaj itech se sinagoga tein kitatijkej keman kiixpolojkej nejon xolal, xa satepan ke panok xiuit 500 itech totonaluan. Kemej nejin amatajkuilol semi uejueliujtoya amo ueliaj kiixtajtoltiayaj nion ueliaj kimejmelauayaj porin teyinia. Yejua ika, ¿keniuj uelik kimatkej tein kijtoua nejon amatajkuilol? Ika teposmej tein okachi yankuikej uan ika computadora.

Tein kiajsikej kinextia ke tein ompa ijkuiliujtok moajsi itech Biblia. Ompa ixnesij seki versículos tein moajsij ipeujyan amatajkuilol Levítico. No kipia Tetragrámaton, naui letras tein ika moijkuiloua itokay Dios itech tajtol hebreo. Nesi moijkuiloj kemej itech xiuit 50 uan 400 itech totonaluan. Yekinika amatajkuilol tein okachi uejkaujkayot yejua tein moajsik mar Muerto ompa Qumrán (moijkuiloj kemej itech xiuit 100 a.i.t.) uan ojpatika amatajkuilol tein no uejkaujkayot yejua tein moajsik ompa Ein Gedi. Itech periódico The Jerusalem Post, Gil Zohar kijkuiloj ke achto kinemiliayaj ke Códice de Alepo (moijkuiloj kemej itech xiuit 930 i.t.) yejua ojpatika amatajkuilol tein okachi uejkaujkayot. Hasta ke kiajsikej amatajkuilol ompa Ein Gedi kiitakej ke okachi uejkaujkayot ke Códice de Alepo. Tamatinij kijtouaj ke nejin amatajkuilol tein kiajsikej kinextia ke tajkuilolmej tein kipia Torá “amo mopatani tein kijtoua maski panouanij tel miak xiujmej uan maski akin oksepa kimaijkuilojkej Biblia kipiakej nepololmej amo teyi kipatilijkej”.