Ángela, * se tokniuj siuat akin iselti uan kipia panoua 30 xiujmej, tepitsin motekipachoua. Kimati ke tayekananij kikalpanotij uan motajtania toni kiiluitij. Kimati ke mopolouiliani seki nechikolmej, sayoj ke semi siujtiuits keman mokepa ichan satepan ke tekitik nochi tonal kampa kinyekpia akin xiuejkejya. Uan amo sayoj nejon, ta no kitekipachoua seki taman itech inemilis uan kokolis tein kipia imomaj.

Komo tejuatsin tionyeskia semej tayekananij akin kikalpanoti Ángela, ¿keniuj tikonyolchikauaskia? (Jer. 31:25.) ¿Keniuj tionmomachtiskia uan ijkon keman tikonkalpanos se akin “sioujtok” kemej nejon tokniuj yekmelauj uelis tikonyolchikauas?

Tinochin kemansa techsioujtia seki taman kemej tekit tein tikpiaj oso itekiyo Dios tein tikchiuaj. Keman tanauatijkej Daniel kiitak se taman tein amo kiajsikamatik, kijtoj: “Nitelsiouik” (Dan. 8:27). Satepan, ángel Gabriel monextij iixpan uan kiajsikamatiltij tein monekia uan kiyekiluij ke Jiova kikakik inetataujtiluan uan kimatiltij ke kisentokaya ‘kiteltasojtaya’ (Dan. 9:21-23). Uan okse tonal, se ángel no ijkon kiyolchikauak tanauatijkej akin sioujtoya ika tajtolmej tein kipaleuijkej (Dan. 10:19).

Yejua ika, achto ke tikonyolchikauas se tokniuj akin sioujtok oso kineki mosenkauas, xikonnemili keniuj moajsi. ¿Toni kuejmolmej kipia? ¿Keniuj nejon xa kisioujtijtok? ¿Toni kualneskayomej kipia? Richard, akin kiuika panoua 20 xiujmej kemej tayekankej, kijtoua: “Nikita tein kuali kichiujtokej tokniuan. Nikitani ke okachi amo ouij se kinyolchikauas keman achto  ke niyas ininchan, ika nejmachkayot nikita toni kipanotokej”. Komo okse tayekankej mouan yas, ¿keyej amo nankisenitaj keniuj moajsi tokniuj?

Kemej xa tikitanij, uelis teouijmakas se kijtos tein se kipanotok. Yejua ika, se tokniuj xa kiouijmakas kintapouis tayekananij keniuj momachilia. ¿Toni tapaleuis maj amo ijkon pano? Komo tiixuetskaj ika nochi toyolo uan tikijtouaj seki tajtolmej tein teyolchikauaj. Michael, akin kiuikaya panoua 40 xiujmej kemej tayekankej, keman takalpanoua, peua kijtoua tajtolmej kemej nejin: “Se tayekankej kitelyolpaktia kinkalpanos tokniuan uan ijkon okachi kinixmatis, yejua ika niktelnekia niualas axkan”.

Semi kuali yeskia komo tikchiuaj se netataujtil ika nochi toyolo achto ke titajtoskej iuan tokniuj. Keman tatitanil Pablo kichiuaya netataujtil, kijtouaya kualneskayomej tein kipiayaj tokniuan kemej takuaujtamatilis, netasojtalis uan taxikolis (1  Tes. 1:2, 3). Keman tikonijtos itech netataujtil keniuj tikontasojkamati kualneskayomej tein kipia tokniuj, tikonchiujtos tein tapaleuis maj ueli ximonojnotsakan kemej teyolchikauas. Uan no, motajtoluan uelis kiyolseuis tokniuj. Ray, akin uejkaujya tekititok kemej tayekankej, kijtoua: “Kemansa tikelkauaj keniuj tel tapaleuia keman tikchiuaj itekiyo Dios, yejua ika semi teyolchikaua keman aksa techelnamiktia”.

Ijkon kemej Pablo, uelis ‘tikonyolmajxitis’ oso tikonyolchikauas tokniuan komo tikonkui maski sayoj se texto itech Biblia (Rom. 1:11). Kemej neskayot, se akin tayokoxtok xa uelis kinemilis ke amo teyi kualtia. Tejuatsin uelis tikonnextilis ke akin kijkuiloj Salmo, maski momachilij “kemej se kuetaxtekomat [tein uakik] itech pokti”, kijtoj: “Amo nikelkauani motanauatiluan” (Sal. 119:83, 176). Satepan ke tikonmelauas tepitsin nejin tajkuilolmej, uelis tikonnextis  ke tiontakuaujtamati ke tokniuj amo no kielkauani itanauatiluan Dios.

Se tokniuj siuat akin amo kiyolpaktiaok kichiuas itekiyo Dios oso amo tekitiok itech nechikol, uelis tikonyolchikauas ika neskayot kampa monextia ke se siuat kipoloj se platajtomin (Luc. 15:8-10). Nejon tomin xa katka semej platajtomin tein ika chijchiujtoya se koskat tein patiyoj. Keman tikonmelauas nejon neskayot, xikonchiua maj tokniuj kiajsikamati ke itech inechikol Dios tamati kemej semej nejon platajtomin tein patiyoj. Satepan, uelis tikonnextis ke yejua semej ichkatsitsin tein Jiova kinpia, yejua ika, semi ika motekipachoua.

Miakej tokniuan kiuelitaj kimelauaskej tein kijtoua se texto itech Biblia, yejua ika amo sayoj tejuatsin xiontajto. Satepan ke moixtajtoltis se tajkuilol tein kipaleuis itech se taman tein kipanotok, xikonixpejpena se tajtol oso se tanemilil tein tayekantok uan xikontajtani keniuj kiita. Kemej neskayot, uelis moixtajtoltis 2 Corintios 4:16 uan tikontajtanis: “¿Kemansa tikonmachiliani ke Jiova mitsonmakani chikaualis keman tikonnemiliaya ke amo ueliskiaok tiontaxikos?”. Nejon uelis tapaleuis maj motemaka yekmelauj yolchikaualis (Rom. 1:12).

No uelis tikonyolchikauas se tokniuj komo ika tikonnojnotsa aksa akin ixnesi itech Biblia tein kipanok se taman kemej yejua. Kemej neskayot, komo kineki mosenkauas xa momachilijtos kemej Ana oso Epafrodito akin kemansa motayokoltijkej. Sayoj ke Dios kisentokaya kuali kinitaya (1 Sam. 1:9-11, 20; Filip. 2:25-30). Yejua ika, keman kinamikis, ¿keyej amo nankiitaj se neskayot tein moajsi itech Biblia?

Tikonnextis ke yekmelauj tikonsentoka ika tionmotekipachoua se tokniuj, komo satepan ke tikonkalpanoua, tikontemoua keniuj tikonsentokas tikonpaleuis (Hech. 15:36). Achto ke tionmonauatis, uelis nanmotenkauaskej se tonal nansentekitiskej itech tanojnotsalis. Oso xikonnemili tein kichiua se tokniuj akin itokay Barnard uan uejkaujya tekititok kemej tayekankej. Keman oksepa kiita akin seki tonalmej achto kikalpanojka, kitemoua kimatis ox ueli kichiua se taman tein kiyolmajxitij. Ika tamatilis kitajtania: “¿Kemaj mitsonpaleuiani tein ika titajtojkej?”. Komo ika tionmotekipachoua tokniuan, uelis tikonmatis komo moneki okachi nepaleuil.

Axkan okachi moneki kimachiliskej tokniuan ke kinyekpiaj, kinajsikamatij uan kintasojtaj (1 Tes. 5:11). Yejua ika, achto ke tikonkalpanos akin tikonyolchikauas, xikonnemili toni kipanotok. Xikontajtani inepaleuil Jiova uan ika nejmachkayot xikonixpejpena textos tein tikonkuis. Ijkon tikonajsis tajtolmej tein ika tikonyolchikauas akin “sioujtok”.