Axkan noyampa onkak miak taman kampa monextia auilnemilis oso pornografía. * Moajsi itech televisión, amaixmej tein kiteixmatiltia yankuik taken, tatsotson, Internet (kemej kampa uelij mopanoltiliaj taixkopimej), kampa kiteixmatiltiaj teisa, películas, amaixmej, videojuegos, teléfono tein ueli kichiua miak taman uan okseki teposmej. Nesi ke nejon se taman tein kuali moita axkan. Nejin tonalmej, okachi taltikpakneminij kiitaj okachi auilnemilis kemej amo ijkon moitstoya achto (xikonita recuadro  “Keniuj momoyaujtok miak taman kampa monextia auilnemilis”).

No mopatatok tanemilil tein kipialiaj nochi taman kampa monextia auilnemilis. Se siuat tamachtijkej akin itokay Gail Dines kijkuiloua: “Axkan senkis monextia auilnemilis yejua ika tein achto moitaya ke tel amo kuali axkan amo ijkon kiitajok”.

Uan tejuatsin ¿keniuj tikonita nejon? ¿Tikonnemilia ke amo teijtakoua oso kemaj? Jesús kijtoj: “Nochi in kuouit ten amo kuali, yejua ne kitemaka takilome ten amo kualtia” (Mateo 7:17). ¿Toni taman takilot kiualkuilia akin kiita auilnemilis? Maj tikitakan eyi netajtanilmej tein techpaleuis maj tikmatikan.

TEIN KIJTOUAJ TATEMOUANIJ: Akin kiita auilnemilis uelis mochiuas se taman tein kiouijmakas kikauas, yejua ika, sekin tatemouanij uan tapajtianij kijtouaj ke tamati kemej crack (se taman cocaína).

Brian, * akin kitelitaya auilnemilis itech Internet, kijtoua: “Amo teyi nechtsakuiliaya. Nikmachiliaya ke amo nejuaok nimoyekanaya. Semi nechkuejmolouaya notanemilil hasta niuiuiyokaya uan nechkokouaya notsontekon. Niktemoj keniuj nikauas, sayoj ke nechuikilij miak xiujmej nikchiuas”.

Akin kitelitaj auilnemilis, kitemouaj kitatiskej, uan amo mouikaj iniuan oksekin uan kitatiaj tein kinpanoua. Yejua ika, miakej kitemouaj yetoskej ininselti uan mopinaujmatij, motekipachouaj, tayokoyaj uan tauelmikij. Sekin hasta kipiaj tanemilil tein kinextia ke amo kinekij nemiskejok. Sergio, akin semi kitemouiaya taixkopimej kampa nesi auilnemilis itech teléfono tein kiuikatinemia, kijtoua: “Niknekia niyetos noselti uan amo nikmatia toni nikchias. Nimomachiliaya noselti, nechkuejmolouaya notanemilil, nikmachiliaya ke amo teyi nikualtiaya uan niknemiliaya ke amo ueliskia nikauas. Semi nimopinaujmatia uan nikmouiliaya niktemos nepaleuil”.

Hasta komo aksa amo uejkaua kiita auilnemilis uelis kiualkuilis tein tel amo kuali. Se siuat tapajtijkej akin itokay Judith Reisman tein kitemoua toni kipanoua akin kiita auilnemilis, kijtoj ininixpan comité del Senado de Estados Unidos: “Taixkopimej kampa monextia auilnemilis mokaua itech ikuatixyo aksa uan kijtakoua, ijsiujka ompa mokauaj maski amo kinekia, uan tel uejkaua moajsi itech itanemilil [...] uan semi ouij oso amo ueliok mokixtilia”. Susan, se ichpoch akin kipia 19 xiujmej akin kiitak auilnemilis itech Internet maski amo yejua kitemojtoya uan satepan kitelnekia kiitas nejon, kijtoj: “Taixkopimej tein nikitak mokauak itech notsontekon. Nechejko itech notanemilil keman yeski. Moita ke amo keman uelis senkis nikpojpolos”.

TEIN KIUALKUI: Akin kiita auilnemilis kiouijmaka kikauas uan kitelijtakoua (2 Pedro 2:19).

TEIN KIJTOUAJ TATEMOUANIJ: “Akin kiita auilnemilis kijtakoua inamik uan ichankauan.” (The Porn Trap [Tamekauilis tein kipia nochi taman kampa monextia auilnemilis], akin kijkuiloj Wendy uan Larry Maltz.)

Akin kiita auilnemilis kijtakoua inamik uan ichankauan porin...

• ... amo takuaujtamatijok se iuan okse kemej namikuanij, mouejkatiliaj uan amo motasojtajok (Proverbios 2:12-17).

• ... kichiua maj kitemo sayoj itanejnekilis, maj amo moitakanok kemej achto uan amo moyolpaktiajok keman mosentekaj (Efesios 5:28, 29).

• ... kichiua maj kinemili uan maj kinejneki tein amo chipauak (2 Pedro 2:14).

• ... kiuika maj kichikaujkaui inamik maj kichiuakan tein amo kinamiki keman mosentekaj (Efesios 5:3, 4).

• ... kiuika maj kinemili kikajkayauas inamik uan hasta kichiuas (Mateo 5:28).

Biblia kiniluia namikuanij maj amo mokajkayauakan iuan okse (Malaquías 2:16). Akin ijkon  kichiua, kijtakoua inamik uan kinuika maj mokauakan uan maj kitsayanakan amat ininixpan tekiuanij, uan nejon semi kinijtakoua konemej.

Konemej no kintelijtakoua komo kiitaj auilnemilis. Brian kisentoka kijtoua: “Keman nikpiaya majtakti xiuit, ijkuak timotatatiayaj nikajsik iamaixuan nopopaj kampa monextia auilnemilis. Peuak nikichtakaita maski amo nikmatia keyej niknekia nikitas nejon taixkopimej. Ijkon peuak niktelneki nikitas nejon tein teijtakoj hasta keman niueyiak”. Tein kiajsinij tatemouanij kinextia ke telpochmej uan ichpochmej akin kiitaj auilnemilis, uelis kinuikas maj mosentekakan keman semi telpochmej oso ichpochmej oso iniuan tataman taltikpakneminij, uan maj kichikaujkauikan aksa, maj amo tanemilikanok kemej moneki uan amo moyeknejnemiltiajok.

TEIN KIUALKUI: Akin kiita auilnemilis kichiua maj tami netasojtalis, uan kiualkui tekokojkayot uan tajyouilis (Proverbios 6:27).

TEIN KIJTOUA BIBLIA: “Xiktajtamikan nijinkes tataman chiualisme: Ma amo xiauilnentinemikan iuan [...] ten amo namouan pouij keme namikuani. [...] Amo xitanemilikan ika tamachilisme ten kualkui tajtakol. Uan amo ximotemaktikan ma namechyekana ne tanejnekilis ten sayo mijmikiloyot [...,] amo xiknejnektinemikan ten teaxka san, porin ne chiualis kinejneuilia keme kuak se kinmouistilia tiopantatadiosme.” (Colosenses 3:5.)

Nejin tajtolmej kinextia ke Jiova * kitauelita nochi taman kampa monextia auilnemilis. Uan amo porin semi tel tajtani. Yejuatsin techchijchiuak maj tiknekikan tikpiaskej tonamik uan kinekia maj namikuanij ijkon moyolpaktikan se iuan okse, maj okachi motasojtakan uan maj senyolpakikan kinpiaskej konemej (Santiago 1:17).

Komo ijkon, ¿keyej tikijtouaj ke Jiova kitauelita nochi taman kampa monextia auilnemilis? Maj tikitakan seki taman keyej:

• Jiova kimati ke akin kiita auilnemilis uelis kijtakos yejua inemilis uan oksekin (Efesios 4:17-19).

• Yejuatsin techtasojta uan amo kineki maj titajyouikan (Isaías 48:17, 18).

• Amo kineki maj moijtakokan namikuanij uan kalyetouanij (Mateo 19:4-6).

• Kineki maj tichipaujkanemikan uan maj tikpoujkaitakan tein kinnamiki kipiaskej oksekin (1 Tesalonicenses 4:3-6).

• Kineki maj tikpoujkaitakan tein techmakatok maj ika tikinpiakan konemej uan maj tikuikan kemej moneki (Hebreos 13:4).

• Yejuatsin kimati ke akin kiita auilnemilis kichiua maj amo kipialiok se chipauak tanemilil siuat oso takat, maj sayoj kitemo itanejnekilis uan maj tanemili kemej Satanás (Génesis 6:2; Judas 6, 7).

TEIN KIUALKUI: Akin kiita auilnemilis kijtakoua ikuali uikalis iuan Dios (Romanos 1:24).

Sayoj ke, Jiova kiiknelia akin kineki kikauas nejon tachiualis. Biblia kijtoua: “Jiova teiknelijkej uan kineki tapaleuis, amo niman kualani uan kitelpia ueyi netasojtalis. Ta yejuatsin kuali techixmati keniuj tichijchiujtokej, uan kielnamiki ke tichijchiujtokej ika talnex” (Salmo 103:8, 14). Dios kinyoleua akin yolyemankej maj kitemokan uan ijkon kiseliskej “iteiknelilis uan ne itapaleuilis [...] kuak moneki” (Hebreos 4:16; xikonita recuadro  “Toni uelis kipaleuis aksa maj amo kiitaok auilnemilis”).

Tel miakej kiselianij inepaleuil Dios. ¿Toni uelik kichiujkej? Maj tikitakan keniuj Biblia kijtoua ke sekin moijkuanilijkej seki tachiualismej tein teijtakoua: “Dios namechyolajchiuilij ya de namotajtakoluan. Uan Dios namechyolchipauak [...] [uan] namechpouak ya ke nanyolchipauke ya ika itokaytsin de Totekotsin Jesucristo uan ika in chikaualis den Yektikatsin Espíritu” (1 Corintios 6:11). Yejuan kijtouaj kemej tatitanil Pablo: “Nochi ueli nikchiua ika ichikaualis ne akin nechmakatok” (Filipenses 4:13, TNM).

Susan, akin uelik kichiuak maj amo kiitaok auilnemilis, kijtoua: “Sayoj Jiova ueli tepaleuia maj se kikaua nejon tachiualis. Komo tiktajtaniaj maj techpaleui uan maj techyekana, uelis tikpiaskej se nemilis chipauak uan se kuali uikalis iuan. Yejuatsin amo keman techsenkauas”.