Yekinika amatajkuilol tein kipia Biblia, Génesis, kimelaua ika seki tajtolmej keniuj nesiko nochi tein tikitaj: “Keman peuak nochi, Dios kichijchiuak iluikak uan taltikpak” (Génesis 1:1). Satepan ke Dios kichijchiuak koujmej uan tapialmej, kinchijchiuak yekinika taltikpakneminij, Adán uan Eva. Yejuan amo katkaj kemej tapialmej, ta ueliaj kinextiayaj tein Dios kinextia. Kemej neskayot, ininselti ueliaj kiixpejpenayaj toni kichiuaskej. Yejua ika, monekia tanankiliskej ika tein kichiuaskiaj. Komo yejuan kitakamatiskiaj Dios, nemiskiaj iniuan nochin ininkoneuan itech taltikpak kampa kualtsin mouikaskiaj uan amo keman momikiliskiaj, ijkon kemej Dios kiixtalijka.

Sayoj ke se ángel kiitak ke ueliskia kinchiualtis taltikpakneminij tein yejua kinekia uan ijkon mochiuak Satanás, tein kijtosneki “Taixnamikkej”. Ika se kouat kikajkayauak Eva. Kiiluij ke okachi kuali nemiskia komo kikauaskia Dios. Adán uan Eva kitajtolkakkej Satanás uan ijkon kikaujkej Dios akin kinchijchiuak. Kemej kiixpejpenkej kichiuaskej nejon tein amo kuali, amo ueliskiajok nemiskej nochipaya uan techpanoltilijkej tajtakol uan mikilis.

Dios niman kijtoj ke kinekia kiyektalis nejon uan ijkon ikoneuan Adán ueliskiaj kiajsiskej nemilis nochipaya. Dios kijtoj ke se ‘tekonetsin’, senkis kiixpoloskia Satanás uan nochi tajyouilis tein Satanás, Adán uan Eva kichiujkej maj onka (Génesis 3:15). ¿Akoni yeskia nejon ‘tekonetsin’? Nejon momelaujtiyaskia yolik.

Sayoj ke Satanás kisentokak kitemoj kitsakuilis itanejnekilis Dios. Kisentokakej momiakilijkej akin amo yolkualmej. Yejua ika Dios kiixtalij kinixpolos ika se tetsaujkakiouit. Kiiluij Noé, akin katka yolmelauak, maj kichijchiua se arca, oso se ueyi koujkaxon tein ueliskia moajsis aixko, kampa momakixtiskia yejua uan ichankauan uan tapialmej tein kinkalakiskia ompa.

Se xiuit satepan ke tetsaujkakiouik, Noé uan ichankauan kiskej itech arca. Nejon tonalmej amo nemiajok akin amo yolkualmej, sayoj ke ‘tekonetsin’ ayamo nesia.

(Mokixtia itech Génesis 1 hasta 11, Judas 6, 14 uan 15 uan Apocalipsis [Revelación] 12:9.)