1, 2. ¿Keyej moneki tikitaskej ke motelneki Salmo 45?

SE TEKIUAJ ueyichiujkej youi ipanko se caballo porin kitemoua kipaleuis tein melauak. Satepan ke senkis kintani akin kitauelitaj, monamiktia iuan se ichpoch tel kuakualtsin, uan kielnamikij uan kiueyitaliaj nochipaya. Ika amo miak tajtolmej, ijkon ueliskia se kijtos ke ika tajtoua Salmo 45.

² Sayoj ke Salmo 45 amo sayoj se tetapouilis tein tami ika se taman tein teyolpaktia. Tachiualismej tein ompa moijtoua moneki tikitaskej ke motelnekij porin mouika ika tonemilis axkan uan satepan. Yejua ika, maj tikyekitakan tein kijtoua nejin salmo.

3, 4. 1) ¿Toni “taman tein teyolpaktia” moneki tikitaskej ke motelneki, uan toni uelis kichiuas maj tikmachilikan itech toyolo? 2) ¿Toni tanauatil tikteixmatiltiaj ika se “tekiuaj”? 3) ¿Kemanian tonenepil mochiua kemej “itajkuiloloni se kuali tajkuilojkej”?

³ (Xikonixtajtolti Salmo 45:1.) Moajsi “se taman tein teyolpaktia” tein kichiua maj akin kijkuiloj Salmo yolpaki uan iyolo “motsetseloua”. Nejin mouika ika se tekiuaj. Itech tajtol hebreo, tajtol tein mokepa kemej “motsetseloua”, tein melauj kijtosneki “moloni”. Kemaj,  nejin taman kichiua maj iyolo akin kijkuiloj Salmo kemej yeskia moloni porin tel yolpaki uan maj inenepil mochiua kemej yeskia “itajkuiloloni se kuali tajkuilojkej”.

⁴ ¿Keniuj moneki tikitaskej nejin? Kuali tanauatilmej ika Tekiuajyot tein moajsi imako Mesías “se taman tein teyolpaktia”. Nejon kuali tanauatilmej okachi mochiuak se taman tein teyolpaktia itech xiuit 1914, porin ijkuak peuak moita kemej se yekmelauj tekiuajyot tein moixtalijya ompa iluikak uan amo kemej se tekiuajyot tein ualas satepan. Yejua nejin “kuali tanauatilmej” tein tikteixmatiltiaj “semanauak taltikpak kampa nemij uan ijkon nochin kimatiskej” (Mat. 24:14, TNM). ¿No “motsetseloua” toyolo ika nejin tanauatil? ¿Tikteixmatiltiaj kuali tanauatilmej ika nochi toyolo? Kemej panok iuan akin kijkuiloj Salmo, tejuan ika titajtouaj se “tekiuaj”. Tikteixmatiltiaj ke Jesucristo kiixtalijkejya kemej Tekiuaj itech Tekiuajyot tein moajsi imako Mesías. Uan no, tikinyoleuaj nochin, tekiuanij uan akin kinixyekanaj, maj mokauakan maj kinixyekana itekiuajyo (Sal. 2:1, 2, 4-12). Uan tonenepil mochiua kemej se “itajkuiloloni se kuali tajkuilojkej” keman tiktekitiltiaj iTajtol Dios, Biblia, keman titanojnotsaj.

5. 1) ¿Toni taman kualtsinyot kipiak Jesús? 2) ¿Keniuj itajtoluan Jesús kiualkuia iteiknelilis Dios, uan keniuj uelis tiktojtokaskej ineskayo?

⁵ (Xikonixtajtolti Salmo 45:2.) Biblia amo semi kijtoua keniuj ixtamatia Jesús. Kemej amo kipiaya tajtakol, tikyekmatij ke katka se takat tel ‘kuakualtsin’. Sayoj ke, kemej amo keman kikauak Jiova yejua nejon tein kichiuak maj kipia yekmelauj kualtsinyot. Uan no, keman kiteixmatiltij kuali tanauatilmej ika iTekiuajyo Dios “itajtoluan [...] kualkuia neteiknelilis de Dios” (Luc. 4:22; Juan 7:46). ¿Timochikauaj tiktojtokaskej ineskayo keman titanojnotsaj uan tikuij tajtolmej tein ajsis ininyolo akin techkakij? (Col. 4:6.)

6. ¿Keniuj Dios kitatiochiuij Jesús “nochipaya”?

⁶ Kemej Jesús amo keman kikauak Jiova, yejuatsin kipaleuij itech itanojnotsalis uan kitatiochiuij satepan ke kitemakak inemilis kemej netetayokolil. Tatitanil Pablo kijkuiloj: “Cristo nentinemia taltikpak keme ipa taltikpak tagat. Uan no motemaktijtiaya imako Itajtsin Dios ika nochi yolyemanalis para ijkon uelis kitakamatinemis Itajtsin. Uan ijkon Cristo Jesús kitakamatinemia Totajtsin Dios hasta ijkuak kimiktijke”. Pablo no kijtoj: “Ika ya nojon Totajtsin Dios kiueyipantalij Cristo ma tayekana inpan nochi tayekanani. Uan [...] kimouiskatokaytij Cristo ika se tokay ten kachi ueyi chiuke inpan nochi oksekin chiuanime. Uan no Dios kiueyipantalij Cristo para ma motankuaketsakan uan ma kimouistilikan Cristo Jesús nochi [...] ten nentinemij ne eluiyaktsinko uan ten nentinemij nikan taltikpak. Uan no ma kimouistilikan Cristo nochi [...] ten yetokke taltikpaktampa. Uan ijkon ma nochi ten yoltinemij ma kixmatikan uan ma kijtokan ke Cristo Jesús, Yejuatsin Totekotsin. Uan ijkon nochi ten yoltinemij [...] kiueyikualnextiske Totajtsin Dios” (Filip. 2:8-11). Jiova kitatiochiuij Jesús “nochipaya” keman kiajokuik uan amo kemanok momikiliskia (Rom. 6:9).

7. ¿Keniuj Jiova kiixpejpenak Jesús okachi ke ‘itekitikaikniuanʼ?

⁷ (Xikonixtajtolti Salmo 45:6, 7.) Kemej Jesús kiteltasojta melaujkayot uan kiteltauelita nochi tein uelis kichiuas maj amo kuali ika motajto iTajtsin, Jiova kiixpejpenak kemej Tekiuaj itech Tekiuajyot tein moajsi imako Mesías. Kiixpejpenak ika “aceite tein teyolpaktia”  okachi ke ‘itekitikaikniuan’, tein kijtosneki, akin tekiuajtiaj Judá akin ichankauan David. ¿Keniuj? Yekinika, yejuatsin Jiova kiixpejpenak; uan amo sayoj kiixpejpenak kemej Tekiuaj, ta no kemej Tayekankatiopixkat (Sal. 2:2; Heb. 5:5, 6). Uan no, Jesús amo kiixpejpenkej ika aceite, ta ika iespíritu Dios. Uan itekiuajyo amo moajsi nikan taltikpak, ta ompa iluikak.

8. 1) ¿Keyej tikyekmatij ke Jesús taixyekanas ika melaujkayot? 2) ¿Keyej uelis tikijtoskej ke Dios ‘yejua itrono’ Jesús?

⁸ Itech xiuit 1914, Jiova kiixpejpenak iKonetsin kemej Tekiuaj itech Tekiuajyot tein moajsi imako Mesías. ‘Takot tein kiixnextia itaixyekanalis kemej tekiuaj, yejua se takot tein kipia tein melauak’, yejua ika uelis tikyekmatiskej ke itech iTekiuajyo onkas melaujkayot uan amo tachichikouis. Kinamiki maj yejua Tekiuaj, porin Dios ‘yejua itrono’, tein kijtosneki ke Jiova kiixpejpenak kemej Tekiuaj. Uan no, iTekiuajyo Jesús uejkauas “nochipaya”. ¿Amo mitsonyolpaktia tikontekitilis Jiova ika itaixyekanalis Tekiuaj akin yejuatsin kiixtalij?

9, 10. 1) ¿Kemanian Cristo motajkoilpilij espada, uan keniuj kitekitiltij? 2) ¿Keniuj Cristo kitekitiltis espada satepan?

⁹ (Xikonixtajtolti Salmo 45:3.) Jiova kiiluia Tekiuaj maj motajkoilpili iespada. Keman kichiua nejon, kinauatia maj iniuan moteui akin kiixnamikij iueyi taixyekanalis uan maj kinixpolo (Sal. 110:2). Kemej Cristo se Tekiuaj Tateuijkej akin amo akin kitani, kitokaytiaj ‘tel chikauak’. Motajkoilpilij espada itech xiuit 1914 keman kintanik Satanás uan iamokuali ejekauan uan kinpantamotak nikan taltikpak (Apoc. 12:7-9).

¹⁰ Nejon sayoj ika peuak tatantiuj Tekiuaj akin youi ipanko caballo, porin moneki ‘kisentokas kachi ok tatantiyas’ (Apoc. 6:2). Jiova kijtoj ke Tekiuaj moneki kiixpolos nochi tein amo kuali tein onkak nikan taltikpak kampa taixyekantok Satanás, uan no kiixpolos tein yejua uan iamokuali ejekauan taoliniaj maj mochiua. Yekinika ixpoliuis Ueyi Babilonia, nochi taneltokalismej tein amo melaujkej tein moajsij noyampa taltikpak. Jiova kichiuas maj tekiuanij itech nejin taltikpak kiixpolokan “siuaauilnenke” akin amo yolkuali (Apoc. 17:16, 17). Satepan, Tekiuaj Tateuijkej kinixpolos taltikpaktekiuajyomej. Cristo, akin no kitokaytiaj “tayekanke [...] tech ueyi taltekoch”, senkis tatanis keman kinpantamotas Satanás uan iamokuali ejekauan itech ueyi taltekoch (Apoc. 9:1, 11; 20:1-3). Maj tikitakan keniuj achtook moijtoua itech Salmo 45 nejin tachiualismej tein motelneki.

11. ¿Toni “tein melauak” kipaleuia Cristo?

¹¹ (Xikonixtajtolti Salmo 45:4.) Tekiuaj Tateuijkej amo tateuia porin kineki moaxkatilis talmej oso kinchiuas takeualmej. Kichiua porin kineki kiajsis se taman tein motelneki. ‘Tateuia uan ijkon kipaleuia tein melauak uan yolyemanilis uan melaujkayot.’ ¿Toni “tein melauak” kipaleuia Tekiuaj? Jiova kinamiki taixyekanas itech nochi tein onkak iluikak uan taltikpak, uan yejua nejin tein melauak uan tayekantok tein Tekiuaj moneki kipaleuis. Keman Satanás kiixnamikik Dios, taomeyolotij ox kinamiki maj taixyekana. Ijkuak uan hasta axkan, amokuali ejekamej uan taltikpakneminij no taomeyolotiaj ika nejon tein melauak. Tekiuaj akin Dios kiixpejpenak axkanya moneki tateuis uan senkis kinextis ke Jiova kinamiki maj taixyekana.

12. ¿Toni kijtosneki maj Tekiuaj kipaleui “yolyemanilis”?

¹² Tekiuaj no kipaleuia “yolyemanilis”. Iyoj Konetsin Dios kitemakak se kuali neskayot porin yolyemanik katka uan mokauak maj kiixyekana iTajtsin akin ueyi taixyekankej (Is. 50:4, 5; Juan 5:19). Nochin itekitikauan Tekiuaj moneki kitojtokaskej ineskayo uan mokauaskej ika yolyemanilis maj senkis kinixyekana Jiova kemej ueyi taixyekankej. Sayoj akin kichiuaskej nejin uelis nemiskej itech yankuik taltikpak tein Dios motenkaua kiualkuis (Zac. 14:16, 17).

13. ¿Toni kijtosneki maj Cristo kipaleui “melaujkayot”?

 ¹³ Uan no, Cristo kipaleuia “melaujkayot”, tein kijtosneki “imelaujkayo Dios”, tanauatilmej tein Jiova kitemaka ika tein kuali oso tein amo kuali (Rom. 3:21, TNM; Deut. 32:4). Isaías achtook kijtoj toni kichiuaskia Tekiuaj Jesucristo: “Se tekiuaj taixyekanas ika melaujkayot” (Is. 32:1). Itekiuajyo Jesús kiualkuis “yankuik eluikak” uan “yankuik taltikpak kampa mochiutos sayo ten kualtsin chipaukanemilis ijkon kemej yejuatsin motenkauak” (2 Ped. 3:13). Nejin kijtosneki ke nochin akin nemiskej itech nejon yankuik taltikpak monekis kitakamatiskej itanauatiluan Jiova (Is. 11:1-5).

14. ¿Toni “miak taman tein se kimoujkaita” kichiuas Cristo ika iyekmay? (Xikonita taixkopin ipeujyan tamachtilis.)

¹⁴ Keman Tekiuaj youi ipanko caballo, kiuika se espada itajkoyan (Sal. 45:3). Sayoj ke moneki kikixtis uan kitekitiltis ika iyekmay. Akin kijkuiloj Salmo kijtoj ke Jesús kichiuaskia ika iyekmay “miak taman tein se kimoujkaita” (Sal. 45:4). Keman Jesucristo yas ipanko caballo uan kiixpolos itech Armagedón nochi tein amo kuali tein mochiujtok itech taltikpak kampa taixyekana Satanás, kinchiuilis akin kiixnamikij “miak taman tein se kimoujkaita”. Amo tikyekmatij toni kitekitiltis tein ika kiixpolos tein amo kuali tein mochiujtok, sayoj ke kintelmojmoujtis akin amo kikakkej tein Dios tanejmachtij uan amo mokaujkej maj kinyekana Tekiuaj (xikonixtajtolti Salmo 2:11, 12). Keman Jesús ika tajtoj tein panoskia keman ejkos ixpoliuilis, kijtoj: “Taltikpakuani talkautiyaske ya ika ne moutil kuak kinemilijtoske de toni tatsakuiltilis ninpan ejkotok nikan taltikpak. Uan hasta Dios no kintsetselos ne tayekanani ten nentinemij ejekaixko”. Uan no kijtoj: “Ijkuakon namejuan nannechitaske Nejuatsin ni Yektagatsin de Dios niualajtos ya ne mixtsalan ejekaixko uan ika ueyi chikaukakualtsiyo” (Luc. 21:26, 27).

15, 16. ¿Akonimej yeskij itateuijkauan Cristo tein kitojtokatiyaskej?

¹⁵ Itech Apocalipsis ika tajtoua keman Tekiuaj ualas “ika ueyi chikaukakualtsiyo” kinixpolokiuj akin kiixnamikij Dios. Tatitanil Juan kijtoj: “Nikitak ke ualtatapotok ne eluiyaktsinko uan ompa ualkalankisak se istak caballo. Uan Cristo Jesús Yejuatsin panyetiuits uan yejua nijin itokaytsin: In Yolmelauaktsin [...] taixkomakatinemi uan kichiutinemi ne teuilis de guerra sayo ika ten melau. Uan Yejuatsin kitoktiliayaj uel miak soldados [...] ne eluiyaktsinko. Uan nochi yejuan takentoyaj ika kuajkuali istaktsin tilma ten yek chipauak ten kilia lino. Uan nochi yejuan panyetiualayaj tech istak caballojme. Uan iteno Yejuatsin ual kisak se machete ten semi tenkanauak, tenika kinkojkokos uan kintajyouiltis nochi in taltikpakuani. Uan Yejuatsin kinyekantinemis ika ueyi chikaukauelilis nochi in taltikpakuani. [...] Uan ijkon Yejuatsin kinueyitajyouiltis in taltikpakuani ika ne kualanyot tatsakuiltilis ten ualeuak imako Totajtsin Dios ten kipixtinemi nochi chikaualis” (Apoc. 19:11, 14, 15).

¹⁶ ¿Akonimej yeskij “soldados” oso tateuianij ne iluikak akin tateuiskej iuan Cristo? Keman yejua motajkoilpilij espada uan kinpantamotak Satanás uan iamokuali ejekauan nikan taltikpak, iuan moajsikej “iángelikniuan” (Apoc. 12:7-9). Yejua ika, taixejekol maj tikijtokan ke ángeles akin yektikej yeskij itateuijkauan Cristo itech neteuilis Armagedón. ¿Moajsiskej oksekinok iniuan nejon tateuianij? Jesús motenkauak iniuan iikniuan taixpejpenalmej nejin taman: “Nochi nekes ten kitanilitiue ya in amokuali Satanás, uan no kitamitakamatitiue ya notanauatiluan hasta kuak ne momikiliske, yejuan nojonkes nikinaxkatilis tanauatil [...] ijkon keme Notajtsin Dios nechmaktilij ya [...] para yejuan ma [tayekantinemikan] ika ueyi chikaualis. Uan ijkon nochi nekes ten amo tatakamatinemij, yejuan nojonkes tajtamis ninchikaualis ijkon keme se kontsin papayakas” (Apoc. 2:26, 27). Nejin kinextia ke iikniuan Cristo taixpejpenalmej, akin  ijkuak kiseliskejya ininnetetayokolil ompa iluikak, no pouiskej iniuan tateuianij. Iuan yetoskej keman kichiuas “miak taman tein se kimoujkaita” tein ika kinixpolos xolalmej.

17. 1) Kemej Cristo youi ipanko se istak caballo, ¿toni kijtosneki nejon? 2) ¿Toni kiixnextiaj espada uan arco?

¹⁷ (Xikonixtajtolti Salmo 45:5.) Tekiuaj youi ipanko se istak caballo, nejin kinextia ke tateuis ika melaujkayot uan yeski kemej kiyolpaktis Jiova (Apoc. 6:2; 19:11). Uan no, amo sayoj kiuika iespada, ta no se arco. Tajkuilol kijtoua: “Nejua nikitak ke ualkisak se istak caballo. Uan ne naken ipan motaliaya, yejuatsin ne maaktoya se [...] arco. Uan no kikuatalilijke se kualtsin corona porin yejuatsin tayekankatatanke [...] uan kisentoka kachi ok tatantiu”. Espada uan arco kiixnextiaj tein Cristo kitekitiltis tein ika kinixpolos akin kiixnamikij.

18. ¿Keniuj yeski tel tenej flechas tein Tekiuaj kitekitiltis?

¹⁸ Ika kualtsitsin tajtolmej, akin kijkuiloj Salmo achtook kijtoj ke flechas tein Tekiuaj kikuis, tel tenej yeskij, tein kikoyoniskej ininyolo akin kiixnamikij uan kichiuaskej maj miakej mikikan. Tel miakej mikiskej noyampa taltikpak, ta Jeremías achtook kijtoj: “Akin Jiova kinmiktis itech nejon tonal yekmelauj peuas moajsiskej kampa ika peua taltikpak hasta kampa ika tami” (Jer. 25:33). Uan Juan no ika tajtoj nejon: “Nikitak se ángel ten ijkatok iixpan in tonaltsin. Uan yejua kinchikaukatsajtsilij nochi in tototsitsin [...] ten patantinemij ejekaixko. Uan yejua kinilij ijkuin: Xiualakan uan ximonechikokan nikan kampa Dios namechmaka ueyi tatakualis. Uan nankikuaske ninnakayo de ne tayekanani reyes uan ninnakayo de soldados. Uan [...] de taka ten semi yolchikauke katka. Uan [...] de caballojme iuan in taka ten inpan yetinemiaj. Uan no nankikuaske ninnakayo nochi tataman [...] takeualme tanamakme oso takeualme ten amo tanamakme. Uan [...] taka uejueyi chiuanime oso maski taka amo uejueyi chiuanime” (Apoc. 19:17, 18).

19. ¿Keniuj Cristo ‘kisentokas taixpan tatanitiuj’ uan senkis tatanis?

¹⁹ Satepan ke Tekiuaj Jesucristo akin ueyichiujkej kiixpolos tein amo kuali tein mochiujtok itech taltikpak kampa Satanás taixyekantok, ‘kisentokas taixpan tatanitiuj’ (Sal. 45:4). Senkis tatanis keman kipantamotas Satanás uan iamokuali ejekauan itech ueyi taltekoch, uan ompa yetoskej keman Jesús tekiuajtitos Mil Xiuit (Apoc. 20:2, 3). Amokuali uan iamokuali ejekauan moajsiskej kemej yeskia mikemej uan amo uelis kichiuaskej nion teyi. Ijkon amo kinijtakoskejok taltikpakneminij uan yejuan uelis senkis kitakamatiskej ininTekiuaj akin tatani. Sayoj ke, achto ke kiitaskej ke nochi taltikpak mochiua se xochital, moajsisok se tonal tein kichiuas maj yolpakikan iuan Tekiuaj uan iikniuan taixpejpenalmej. Itech okse tamachtilis tikitaskej toni nejon tachiualis tein kinyolpaktis.