Yekinika Neteuilis tein Mochiuak itech Nochi Taltikpak tamik itech tonal 11 metsti noviembre xiuit 1918. Taltikpakneminij tatsakkej kampa tekitiaj uan mijtotitoj kalampa. Sayoj ke nejon yolpakilis amo uejkauak. Okse tetsauit moualtokiaya tein okachi temiktij ke ametralladora.

Itech metsti junio xiuit 1918, nesik kampa tateuiayaj akin kayomej Francia se ueyi chauis tein moixmatik kemej gripe española, tein niman moitak ke semi tamouilil katka. Itech sayoj seki metsti kinmiktij okachi tateuianij akin pouiaj Estados Unidos tein moajsiaj Francia ke taixnamikinij. Uan tateuianij akin mokepkej ininchan kiuikakej nejon kokolis uan kimoyaujkej noyampa taltikpak.

Mayan uan tatasojtilis no motelitak satepan ke panok neteuilis. Miakkan ompa Europa miakej mayamikiaj keman tamik neteuilis. Kemej itech xiuit 1923, itomin Alemania semi amo kipiayaok ipatiuj. Chikuasen xiujmej satepan, noyampa taltikpak semi amo onkayaok tein ika moixpanoltiayaj. Uan ika tamik, itech xiuit 1939 peuak Ojpatika Neteuilis itech Nochi Taltikpak, tein uelis tikijtoskej ke kisentokak ika yekinika. ¿Toni kichiuak maj panouani nejon?

Tein techpaleuis maj tikajsikamatikan keyej mochiua teisa, uan okachiok Yekinika Neteuilis tein Mochiuak itech Nochi Taltikpak, moneki tikitaskej tein  achtook kijtojka Biblia ke panoskia. Jesucristo ika tajtoj seki tonalmej keman moteuiskiaj altepemej se iuan okse uan onkaskiaj tetsaujkakokolismej uan noyampa tasojtiskia takual (Mateo 24:3, 7; Lucas 21:10, 11). Kiniluij imomachtijkauan ke nejon ouijkayomej kinextiskiaj ke tinentokej itamian tonalmej. Amatajkuilol Apocalipsis (oso Revelación) tein moajsi itamian Biblia, okachi techmelauilia nejon, uan kinextia ke onkaskia tajyouilis nikan taltikpak porin mochiuaskia se neteuilis ne iluikak. (Xikonita recuadro  “Neteuilis nikan taltikpak, neteuilis ne iluikak”.)

Amatajkuilol Apocalipsis ininka tajtoua nauin akin youij ininpanko caballos. Eyin kiixnextiaj uejueyi ouijkayomej tein Jesús achto kijtojka: neteuilis, mayan, uan tetsaujkakokolismej. (Xikonita recuadro  “¿Yajtokej nauin ininpanko caballos?”.) Moyekita ke Yekinika Neteuilis tein Mochiuak itech Nochi Taltikpak kipeualtij uejueyi tajyouilis tein kisentoka hasta axkan. Uan Biblia kinextia ke yejua Amokuali akin yekmelauj itajtakol maj onka nochi nejon (1 Juan 5:19). ¿Uelis se tonal aksa kitsakuilis?

Apocalipsis kiyeknextia ke Amokuali “amo kipia ok miak tonalme” (Apocalipsis 12:12). Yejua ika tel kualantok uan kichiujtok maj onka miak tajyouilis nikan taltikpak. Moyekita ke ouijkayomej tein noyampa onkak kinextia ke amo uejkaua tamiti tonalmej tein kipiaok Satanás.

Yekinika Neteuilis tein Mochiuak itech Nochi Taltikpak kichiuak maj peua mopata nochi. Peuak tonalmej keman onkak neteuilismej, taixnamikilis uan tekiuanij amo tapaleuiaj kemej motenkauaj. No kiyeknextij ke Satanás kipantamotkej nikan taltikpak (Apocalipsis 12:9). Amokuali akin taixyekana nikan taltikpak monejnemiltia kemej se ueyi taixyekankej akin nion tepitsin teiknelia tein kimati ke amo miak tonalmej kipiaok. Keman tamis itonaluan, no tamis uejueyi ouijkayomej tein peuak moita itech Yekinika Neteuilis tein Mochiuak itech Nochi Taltikpak.

Tein achtook kijtojka Biblia ke panos, techyekmatiltia keyej uelis titakuaujtamatiskej ke Jesucristo, toTekiuaj akin moajsi iluikak, amo uejkaua “kinuejuelos in chikaualisme den amokuali Satanás” (1 Juan 3:8). Uan axkanya, tel miakej tajtanij maj uiki nejon Tekiuajyot. ¿Toni tikonchiuas tejuatsin? Ika nejon tekiuajyot, akin kichiuaj tein kuali kiitaskej keniuj nikan taltikpak mochiua itanejnekilis Dios uan amo tein kineki Amokuali (Mateo 6:9, 10). Keman taixyekantos iTekiuajyo Dios, amo mochiuasok neteuilis itech nochi taltikpak nion okse taman neteuilis (Salmo 46:9). Okachi xionmomachti tein kichiuas nejon tekiuajyot uan ijkon tionnemis itech tonalmej keman onkas yolseuilis noyampa taltikpak (Isaías 9:6, 7).