SAYOJ ke, akin taoliniaj maj nochi taneltokalismej sentekitikan tel taman kiitaj nejin. Eboo Patel, akin kipeualtij maj mosentilikan taneltokalismej Interfaith Youth Core kijtoj: “Xinechnextilikan se taneltokalis tein amo kitemoua maj onka teiknelilis [...,] maj amo moijtako taltikpak [...,] maj amo tepaleuikan”.

Uan melauak nejin: budistas, católicos, protestantes, hindúes uan musulmanes sentekitinij kemansa porin kitemouaj kitamiskej tatasojtilis, kintajtouiaj taltikpakneminij, kitemouaj maj amo kitekauilikanok maj kitalpachokan teposmej tein toponij oso kinekij tapaleuiskej maj amo kisentoka moijtako taltikpak. No mosentilianij uan ika tajtouanij keniuj nochin moajsikamatiskej uan moyolmajxitiaj. Uan no, keman ueli kichiuaj nejon, iluichiuaj, kixotaltiaj velas, tatsotsonaj oso motataujtiaj.

¿Uelis taneltokalismej kiyektaliskej kuejmolmej tein kipiaj komo mosentiliaj? ¿Ijkon tayektalis Dios nikan taltikpak?

Semej nechikolmej tein okachi ueyi itech nochi taltikpak moueyichiuaj porin kijtouaj ke iniuan pouij 200 taneltokalismej tein tekititok itech 76 altepemej. Kinekij “maj sentekitikan taneltokalismej uan maj uejkaua”; sayoj ke amo uelinij kichiuanij. Kemej neskayot, akin kipeualtijkej nejon nechikol kijtojkej ke tein kiixtalijkej maj mochiua, monekik kiyekitaskej keman kijkuilojkej uan ijkon amo kinkualantiskiaj miakej taneltokalismej uan oksekin akin ompa pouij. ¿Keyej? Se taman, porin amo nochin kinekiaj maj ika motajto Dios itech amat. ¿Toni kichiujkej? Amo ika tajtojkej Dios.

Sayoj ke komo amo ueli ika se tajtoua Dios, ¿keniuj tapaleuia taneltokalis? ¿Toni taman onkak itech se nechikol kemej nejin uan se nechikol tein kinpaleuia oksekin? Yejua ika, yejuan amo moitaj kemej se taneltokalis, ta kemej se nechikol tein taolinia maj mosentilikan taltikpakneminij.

Dalai Lama, akin motelixmati uan tapaleuia maj mosentilikan taneltokalismej, kijtoua: “Nochin taneltokalismej tayolchikauaj maj se tetasojta, maj se teikneli uan maj se tetapojpolui”. Uan no kijtoua: “Uan motelneki tiknextiskej itech tonemilis”.

Tikyekmatij ke kemaj moneki titetasojtaskej, titeikneliskej uan titetapojpoluiskej. Tamachtilis tein Jesús kitemakak tein motelixmati kijtoua: “Xikinchiuilikan tokniuan ijkon keme nankinekij ke in tokniuan ma namechchiuilikan” (Mateo 7:12). ¿Sayoj yejua nejon moneki maj kichiua taneltokalis tein  melauak? ¿Maj sayoj tayolchikaua maj kichiuakan tein kuali?

Tatitanil Pablo kijtoj ke itech itonaluan miakej taltikpakneminij kitelnekiaj kitekitiliskej Dios sayoj ke amo kipiayaj “taixmatilis tein ajsitok”. Kemej amo kiixmatiaj “imelaujkayo Dios”, kinekiaj “kiixtaliskej tein yejuan kiita[ya]j ke melauak” (Romanos 10:2, 3, TNM). Uan kemej amo senkis kimatiaj toni kinekia Dios maj kichiuakan, sayoj nenkaj katka inintanejnekilis uan inintakuaujtamatilis (Mateo 7:21-23).

Jesús kijtoj: “Yolpakij akin yolseujkanemij” (Mateo 5:9, TNM). Yejua kichiuaya kemej tamachtiaya, ta amo keman tayolchikauak maj onka tateuilis uan kitetapouij tamachtilis tein kinpaleuiskia nochin taltikpakneminij tein kipiayaj tataman taneltokalismej maj kipiakan yolseuilis (Mateo 26:52). Akin kiselijkej itamachtilis mosentilijkej iniuan okseki itatojtokakauan akin monextiliayaj ueyi netasojtalis (Colosenses 3:14). Sayoj ke ¿kijtosneki nejon ke Jesús sayoj kitemoj kinsentilis taltikpakneminij uan maj kuali mouikanij? ¿Iniuan taueyichiuaya okseki taneltokalismej?

Akin taixyekanayaj itech inintaneltokalis fariseos uan saduceos kitauelitayaj Jesús, kitajyouiltijkej uan hasta kitemojkej kimiktiskej. ¿Keniuj tanankilij Jesús? Kiniluij imomachtijkauan: “Xikinkauakan nojon fariseos, porin yejuan ixpojpoyome” (Mateo 15:14). Kemej tikitaj, Jesús amo kinekik mosentilis iniuan okseki taneltokalismej.

Seki xiujmej satepan, moixtalij se yankuik nechikol kampa kitojtokayaj Cristo ompa Grecia, itech altepet Corinto kampa nemiaj akin seseko kayomej uan pouiaj itech tataman taneltokalismej. ¿Keniuj monekia monejnemiltiskej akin kitojtokayaj Cristo? Tatitanil Pablo kinijkuilouilij: “Namechilia amo ximoyekantinemikan ika ne amokuali tamachilis tenika moyekantinemij nekes de amo taneltokani”. Ompa kinmelauilij: “Amo no uelis sen yetinemiske Totekotsin Cristo iuan Satanás ten no kiliaj Belial. Uan amo no uelis senpoutinemij se taneltokakke de Cristo iuan se tagat ten amo taneltoka”. Satepan kinyolmajxitij: “Xikisakan uan ximosekokauan de nekes ten amo taneltokani” (2 Corintios 6:14, 15, 17).

Kemej tikitaj, Biblia techyolmajxitia maj amo timosentilikan iniuan okseki taneltokalismej. Sayoj ke xa tionmotajtania: “Komo ijkon, ¿keniuj uelis yekmelauj tisenyetoskej?”.

Estación Espacial Internacional, se tel kuali tepos tein kitalijkej ejekaixko kampa moyoualoua taltikpak, uelik kichiujkej porin mosenpaleuijkej quince uejueyi altepemej. ¿Tikonnemilia ke ueliskiaj kichijchiuaskej komo amo sayoj se tanemilil kipiaskiaj nion motenkauaskiaj toni amat ika moyekanaskiaj keman kichijchiuaskiaj?

Uelis tikijtoskej ke yejua nejon panotok iniuan akin taoliniaj maj taneltokalismej mosentilikan axkan. Maski semi ika tajtouaj maj se mosenpaleui uan maj se mopoujkaita, amo ueli motenkauaj toni ika moyekanaskej tein kinpaleuis maj ueli kipiakan chikauak takuaujtamatilis. Yejua ika amo ueli kiixtaliaj toni chipaujkanemilis uan katiyejua tamachtilis tein melauak, uan nejon kisentoka kinxeloua taltikpakneminij.

Itech Biblia moajsi itanauatiluan Dios, tein kemej yeskia seki amat tein technextilia keniuj tikchikauaskej totakuaujtamatilis uan maj tinemikan kemej Biblia kijtoua. Akin kitakamatij tein tamachtia, kinpaleuia maj amo kintauelitakanok akin pouij itech okseki taneltokalismej nion maj kinchikoitakan akin okseko kayomej, uan momachtianij sentekitiskej. Dios kijtojka nejin: “Nikpatas inintajtol xolalmej ika se tajtol tein chipauak, uan ijkon nochin yejuan kikuiskej itokay Jiova uan kisentekitiliskej”. Ueli kisentekitiliaj Dios porin moyekanaj ika “tajtol tein chipauak”, tein kijtosneki itanauatiluan Dios (Sofonías 3:9; Isaías 2:2-4).

Itaixpantijkauan Jiova mitsonyoleuaj xikonkalpano Kali kampa tiMosentiliaj tein moajsi ompakauin kampa tionnemi uan ijkon tejuatsin uelis tikonitas keniuj kipiaj yolseuilis uan sentekitij (Salmo 133:1).