Se tepopaj kayot Brasil kijtoua: “Semi tikuelitaj tein ika timonojnotstokej itech Youak keman tiTaueyichiuaj kemej Kalyetouanij, uan tikitaj ke tel ijsiujka panoua tiempo”. Se tepopaj kayot Japón kijtoua ke ikonetsin akin kipia majtakti xiuit amo kiita ke uejkauakya momachtijtokej uan kineki kisentokas. ¿Keyej? Tepopaj kijtoua: “Semi kiuelita tamachtilis uan nejon kichiua maj tel yolpaki”.

Sayoj ke amo nochin konemej kiuelitaj momachtiskej. Tein melauj, sekin amo kinyolpaktia taueyichiualis kemej kalyetouanij. ¿Keyej amo? Porin tasematij. Se tepopaj kayot Togo kijtoua ke “mochia maj amo se tasemati keman se kiueyichiua Jiova”. Komo panoua nejon, xa kijtosneki ke moneki mopatas kemej mochiua tamachtilis. Miakej kalyetouanij kiitanij ke nejin se “tonal keman onkak yolpakilis”, kemej ika motajtoua tonal sábado itech amatajkuilol Isaías (Is. 58:13, 14).

Tetatmej akin kichiuaj kemej Cristo kiajsikamatij ke ininchankauan uelis kinyolpaktis nejon tonal komo nochin kuali momachiliaj. Ralf, akin kipia eyi isiuapipiluan uan se iokichpil, kijtoua ke ijkuak taueyichiuaj kemej kalyetouanij amo kichiuaj kemej se tamachtilis ta kemej ijkuak monojnotsaj porin nochin tapaleuiaj. Sayoj ke, uelis yeski ouij se kichiuas maj nochin kuali takaktokan uan maj tanemilijtokan itech nemachtil. Se temomaj kijtoua: “Amo nochipa nikpia chikaualis tein nechpaleuis maj nikchiua taueyichiualis kemej kalyetouanij kemej tinochin techyolpaktis ijkon kemej nikuelitaskia”. ¿Toni uelis kichiuaskej tetatmej uan ijkon okachi kinyolpaktis taueyichiualis kemej kalyetouanij?

Se tepopaj kayot Alemania akin kipia ome konemej kijtoua: “Moneki tikpataskej tein monekis”. Uan no, Natalia, akin kipia ome isiuapipiluan kijtoua: “Tikitaj ke okachi moneki maj  amo nochipa sayoj se taman tikchiuakan, ta maj tikpapatatiyakan”. Miakej kalyetouanij kixejxelouaj tamachtilis uan tataman kemej kipanoltiaj. Cleiton, akin kayot Brasil uan kinpia ome telpochmej, kijtoua: “Nejon kichiua maj okachi teyolpakti uan maj nochin tapaleuikan”. Komo konemej uejka moyekanaj, kiseliskej nepaleuil tein sejsemej kinpoloua komo moxejxeloua tiempo tein motemaka tamachtilis. Tetatmej uelis tanemiliskej itech sejse kalyetouanij uan kipataskej tein momachtiskej uan kemej momachtiskej.

¿Toni kichiuaj seki kalyetouanij uan ijkon kipapataj kemej momachtiaj? Seki peuaj mokuikatiaj tein ika kiueyichiuaj Jiova. Juan, akin kayot México, kijtoua: “Nejon kichiua maj nochin tiyolpaktokan uan techpaleuia maj titanemilikan itech tamachtilis tein tikitatij”. Ichankauan kiixpejpenaj nekuikatilmej tein mouikaj ika teisa tein momachtitij nejon youak.

Okseki kalyetouanij kisenixtajtoltiaj seki tajkuilolmej tein moajsij itech Biblia. Kemej kinekij kipapataskej kemej momachtiaj, moxejxelouiliaj tein kijtoua sejse taltikpaknenkej keman taixtajtoltiaj. Se tepopaj kayot Japón, kijtoua ke yekinika kiouijmakaya maj ijkon taixtajtoltikan. Sayoj ke ome ikoneuan semi kiuelitayaj kiitaskej ke inintatuan kinyolpaktiaya teisa kichiuaskej iniuan. Moajsij kalyetouanij akin kiixnextiaj seki tajkuilolmej tein moajsij itech Biblia kemej se tamouisol. Roger, akin nemi Sudáfrica uan kinpia ome ikoneuan kijtoua: “Tikitanij ke konemej kiajsij tein titetatmej amo tikitakej”.

Uan no uelis se kisenchiuas teisa, kemej se kichijchiuas tsikitsin arca tein ne uejkauj Noé kichijchiuak oso itemplo Salomón. Kemej itech nejin tekimej moneki se kiteltemos miak taman tein moneki se kimatis, uelis techtelyolpaktis. Ompa Asia, se siuapil akin kipia makuil xiuit, itatuan uan iueyinan kichijchiujkej se taman neauiltilis tein kikixtijkej keman Pablo yaya okseki altepemej tanojnotsati. Okseki kalyetouanij no kichijchiuanij se taman neauiltilis tein kikixtijkej itech tajkuilolmej tein kipia Éxodo. Donald kayot Togo, akin kipia 19 xiujmej kijtoua: “Kemej tataman timomachtiaj kemej kalyetouanij okachi tikuelitaj uan tinochin titelyolpakij”. ¿Tikonnemilia okse taman tein uelis nankichiuaskej uan ijkon okachi namechyolpaktis taueyichiualis kemej kalyetouanij?

Maski okachi teyolpaktia nemachtil kemej kalyetouanij komo tataman kemej se momachtia uan se kipata tein moneki, komo tiknekij maj yekmelauj techpaleui, tinochin moneki achto timomachtiskej. Kemansa telpochmej siouij, yejua ika tepopaj moneki kinemilis toni momachtiskej uan kiixtalis achto momachtis. Se tepopaj kijtoua: “Keman achto nimomachtia, nochin okachi kinyolpaktia tamachtilis”. Se tepopaj kayot Alemania achto kiniluia ichankauan tein momachtiskej itech seki semana satepan. Ompa Benín seki tetatmej akin kipiaj chikuasen konetsitsin kemansa no kiixtaliaj kiitaskej se DVD keman taueyichiuaj kemej kalyetouanij. Uan kemej tepopaj kineki maj nochin achto momachtikan, kinmaka seki netajtanilmej. Kemej moita, keman kuali se momachtia achto, okachi kuali nemachtil se kipia.

Komo nochin achtook kiniluiaj toni momachtiskej, uelis ika tajtoskej itech semana uan ijkon kitelnekiskej yetoskej itech nemachtil. Uan komo sejsemej kichiuaj teisa keman momachtiskej, nochin kimachiliskej ke tapaleuiaj ika inintamachtilis keman taueyichiuaj kemej kalyetouanij.

Miakej kalyetouanij kinouijmaka kipiaskej ininnemachtil nochi semanas.

Miakej tetatmej moneki tekitiskej miak horas uan ijkon uelis kinixpanoltiskej ininchankauan. Nejon kipanoua se tepopaj kayot México, akin youi tekititi chikuasen hora kualkan uan mokepa ikalijtik hasta chikueyi hora youak. Uan kemansa xa monekis mopatas Youak keman tiTaueyichiuaj kemej Kalyetouanij porin mochiuati okse taman itech nechikol, kemej ijkuak yetok tokniuj takalpanojkej oso tikpiaj se ueyi nechikol.

Maski ijkon, moneki tikixtaliskej nochi semanas titaueyichiuaskej kemej kalyetouanij. Itech altepet Togo, se siuapil akin kipia 11 xiujmej akin monotsa Loïs, kijtoj: “Maski kemansa tiotakya tipeuaj tonemachtil porin teisa panok tonayan, nochipa tikpiaj tonemachtil kemej kalyetouanij”. Techpaleuis maj nochipa tikchiuakan, komo ipeujyan semana tikpiaj tonemachtil, porin komo nesi teisa tein amo tikchiayaj uelis tikchiuaskej okse tonal itech semana.

Kemej itokay kinextia, taueyichiualis kemej kalyetouanij no ika tikueyichiuaj Jiova. Xionmochikaua maj nochi semanas nochin mochankauan kiueyitalikan Jiova ‘ika inintenoj kemej kitemakaskiaj kuakuejmej tein moyekiskaltijkejya’ (Os. 14:2). Uan xiontapaleui maj nejon tonal kintelyolpakti nochin, porin “yolpakilis itech Jiova yejua nanmoaltepeuj chikauak tein kiyoualojtok tepamit” (Neh. 8:9, 10).