Kemej tikonitak itech achto tamachtilismej, itaixpantijkauan Jiova kiitaj ke iTekiuajyo Dios yekmelauj moneki. Sayoj ke, xa mitsonyolpaktia seki taman tein iTekiuajyo Dios motenkaua kiualkuis, sayoj ke ouij tikonneltoka ox yekmelauj mochiuas.

Kuali maj amo tikneltokakan nochi tein techiluiaj (Proverbios 14:15). Yejua nejon tein kichiujkej itatojtokakauan Cristo akin katkaj kayomej itech ne uejkauj xolal Berea. * Keman yekinika kikakkej kuali tanauatilmej ika iTekiuajyo Dios, amo niman kineltokakej. Momachtijkej uan ijkon “kiyektemoliayaj in Tajtoltsin de Dios” (Hechos 17:11). Ika okseki tajtolmej, kiitakej ox tein kikakkaj mouikaya ika tein kijtoua iTajtol Dios, uan kiitakej ke katka melauak.

Tiitaixpantijkauan Jiova timitsonyoleuaj xikonchiua ijkon kemej kichiujkej nejon yekinika itatojtokakauan Cristo. Tamachtilis tein tiktemakaj kajkalpan ika Biblia tein amo moneki moixtauas, mitsonpaleuis xikonita ox mouika tein tikijtouaj ika Tekiuajyot iuan tein kijtoua iTajtol Dios, Biblia.

Tamachtilis tein tiktemakaj amo sayoj mitsonpaleuis xikonmati okachi toni iTekiuajyo Dios. No mitsonpaleuis xikonajsi itanankilil netajtanilmej tein motelnekij kemej nejin:

•   ¿Kani tiualeujkej?

• ¿Keyej tinemij?

• ¿Keyej kikaua Dios maj onka tajyouilis?

• ¿Toni techpanoua keman timomikiliaj?

• ¿Kiixpoloskej taltikpak?

• ¿Keniuj uelis yolpakiskej kalyetouanij?

Sayoj ke tein okachi kuali, tionmomachtis Biblia mitsonpaleuis xionmotoki iuan Dios (Santiago 4:8). Ijkon kemej okachi kuali tionmouikas iuan, okachi amo ouij tikonitas nochi tein kuali tein uelis mitsonualkuilis iTekiuajyo Dios axkan uan satepan. Jesús kiluij iPopaj: “Nachipa nemilis kijtosneki yejua nijin: Ke in taltikpakuani ma mitsonixmatikan Tejuatsin ke tion Dios tion Yolmelauaktsin, uan sayo Tejuatsin tion Dios. Uan in taltikpakuani ma nechixmatikan Nejuatsin ke ni Jesucristo ten Tejuatsin tinechonualtitanik” (Juan 17:3).