Kemej tikonita Biblia ijkuak tikonixtajtoltia uelis kichiuas maj mitsonyolnotsa oso amo. Maj tikitakan seki taman tein mitsonpaleuis maj mitsonyolnotsa tikonixtajtoltis Biblia.

Xikonixpejpena se Biblia tein kuali kitajtolkepkej uan tein kipia tajtolmej tein axkan mokuij. Komo keman tikonixtajtoltia tikonajsi miak tajtolmej tein amo tikonajsikamati oso tein amo mokuijok, uelis kichiuas maj amo mitsonyolpakti tikonixtajtoltis. Yejua ika, xikontemo se Biblia tein kikui tajtolmej tein amo ouij moajsikamatij uan tein ajsis itech moyolo. Uan no moneki maj ajsito uan maj takuaujtamach. *

Xikonkui tein yankuik kisani. Axkan, Biblia amo sayoj moajsi itech amat ta no itech tataman teposmej. Uelis tikonixtajtoltis itech Internet oso tikontemouis itech se computadora, tableta oso teléfono. Seki teposmej kipiaj tein mitsonpaleuis xikonita keniuj kitajtolkepanij se versículo itech okseki Biblias oso keniuj mouika iuan okseki tajkuilolmej. Uan komo tikonneki tikonkakis, no moajsi ika audio. Miakej kiuelitaj kikakiskej keman youij itech tepos ijkuak tekititij, keman tapaktokej oso kichiuaj okse taman tein amo ouij. ¿Katiyejua okachi mitsonpaleuia? ¿Keyej amo tikonyejyekoua semej?

Xikontemo okachi. Amatajkuilolmej tein kimelauaj okachi tein kijtoua Biblia mitsonpaleuiskej okachi xikonajsikamati tein tikonixtajtoltia. Ompa tikonajsis mapas tein kinextiaj talmej uan xolalmej tein ininka tajtoua Biblia nejin mapas mitsonpaleuiskej  xikonnemili tein panok ompa. Uan no, seki tamachtilismej tein kisani itech nejin amaix uan itech taxelol “Enseñanzas bíblicas” tein moajsi itech jw.org, Internet kampa timoteixmatiltiaj mitsonpaleuiskej xikonajsikamati miak tajkuilolmej tein kipia Biblia.

Xikonpata kemej tikonixtajtoltia. Komo tikonita ke semi ouij tikonixtajtoltis Biblia kampa peua hasta kampa tami, xionpeua kampa mitsonyolnotsas. Komo tikonneki okachi tikonixmatis aksa akin Biblia semi ika tajtoua, uelis tikonixtajtoltis tein kichiuak itech inemilis. Recuadro “ Xikonixmati akin ininka tajtoua Biblia” uelis mitsonpaleuis komo tikonneki tikonixmatis semej akin ika motajtoua. No uelis tikonixtajtoltis sejse tamachtilis tein kipia Biblia oso ijkon kemej moijkuilojtiyajkej. ¿Keyej amo tikonyejyekoua semej?