TLAMACHTIL 10
¿Tleka mitspaleuis tla timonechikos inuan iTlaixpantijkauan Jehová?
¿Yomitsyolejkej inuan ximonechiko? Tla ayamo keman timonechikoua, xamo timomojtia timonechikos. Xamo tikneki tikmatis tlen kichiuaj iTlaixpantijkauan Jehová ijkuak monechikouaj, tleka nochipa monechikouaj uan xamo timotlajtlania kox moneki inuan timonechikos. Itech nin tlamachtil timomachtis tla timonechikos, mitspaleuis okachi ximouika iuan toTajtsin Dios. Uan noijki tikitas ken mitspaleuis itech monemilis tlen ompa timomachtis.
1. ¿Tleka moneki timonechikoskej?
Se tlakatl tlen okijkuilo Biblia okijto tleka moneki matimonechikokan. Ye okijto: “Kanin sapanoua miakej monechikojtoskej ompa nikueyichiuas Jehová” (Salmo 26:12). Axkan noijki iTlaixpantijkauan Jehová monechikouaj uan yolpakij ijkuak ijkon kichiuaj. Sejse semana itech nochi tlaltikpak monechikouaj para kiueyichiuaskej Jehová, kitlakuikiliskej uan kitlatlaujtiskej. Noijki sejse xiuitl eyi uelta miakej monechikouaj.
2. ¿Tlen timomachtiaj ijkuak timonechikouaj?
Ompa timomachtiaj iTlajtol toTajtsin Dios uan techyekiluiaj tlen kijtosneki (xiktlajtolti Nehemías 8:8). Tla timonechikos, okachi tikixmatis Jehová uan tikmatis tlen kichiua. Ijkuak tikmatis ye mitstlasojtla okachi tiknekis iuan timouikas. Noijki timomachtis ye mitspaleuis okachi xiyolpaki (Isaías 48:17, 18).
3. ¿Ken mitspaleuiskej akinmej inuan timonechikos?
Jehová techiluia “matikitakan ken timosepanpaleuiskej uan ijkon okachi timotlasojtlaskej uan tikchiuaskej tlen kuali. Nochipa matimonechikokan” (Hebreos 10:24, 25). Ijkuak touan timonechikos tikinmixmatis akinmej melauak motlasojtlaj uan noijki kinekij okachi kuali kixmatiskej toTajtsin Dios. Ompa tikkakis tlen yejuan omomachtijkej itech Biblia uan mitsyolchikauas (xiktlajtolti Romanos 1:11, 12). Noijki timotlapouis iuan akinmej yomonamiktijkej uan akinmej katej inselti, yejuan mitsiluiskej ouijkayotl tlen okixnamikej uan tlen okichijkej. Yotikitakej san seki tlamantli tlen techpaleuis tla timonechikouaj. Ikinon Jehová kineki ijkon matikchiuakan.
MATIMOMACHTIKAN
Axkan matikitakan tlen kichiuaj iTlaixpantijkauan Jehová ijkuak monechikouaj uan tleka miak ipati ijkon matikchiuakan.
4. ¿Tlen kichiuaj iTlaixpantijkauan Jehová ijkuak monechikouaj?
Itech achto siglo akinmej okichiuayaj ken Cristo, omonechikouayaj uan ijkon okiueyichiuayaj Jehová (Romanos 16:3-5). Xiktlajtoltikan Colosenses 3:16 uan satepan xikitakan tlen namechmachtia.
-
¿Ken okiueyichiuayaj Jehová akinmej achto opejkej kichiuaj ken Cristo?
Axkan noijki monechikouaj iTlaixpantijkauan Jehová uan ompa kiueyichiuaj. Para tikmatis tlen kichiuaj ijkuak monechikouaj, xikitakan VIDEO. Satepan xikitakan se foto kanin mota ken monechikouaj uan satepan xikitakan tlen namechmachtia.
-
¿Tleka uelis tikijtoskej ijkuak timonechikouaj tikchiuaj ken kijtoua Colosenses 3:16?
-
¿Tlen omitspakti ijkuak otikitak foto noso video kanin mota ken timonechikouaj?
Xiktlajtoltikan 2 Corintios 9:7 uan satepan xikitakan tlen namechmachtia.
-
¿Tleka iTlaixpantijkauan Jehová amo kitlajtlanij tomin kanin monechikouaj?
San sekan xikitakan tlen timomachtiskej ijkuak timonechikoskej itech nin semana.
-
¿Tlen okachi mitspaktiskia tikkakis ijkuak timonechikoskej?
¿Otikmatiaya?
Itech jw.org/ncx, uelis tikitas kanin uan keman monechikouaj iTlaixpantijkauan Jehová itech nochi tlaltikpak.
-
Ijkuak timonechikouaj ikaj techtlapouia ika Biblia, tikinmitaj videos uan okseki tlamantli. Noijki ijkuak tipeuaj uan titlamij, titlakuikaj uan timotlatlaujtiaj.
-
Ijkuak timonechikouaj tlanankiliaj akinmej kinekij.
-
Nochtin tikinseliaj.
-
Kanin monechikouaj iTlaixpantijkauan Jehová amo kintlajtlaniliaj tomin akinmej ompa monechikouaj.
5. Moneki timochijchikauas tla tikneki timonechikos
Matikitakan tlen okichiuaya Jesús iuan ifamilia. Yejuan ochantiayaj Nazaret pero sejse xiuitl oyayaj Jerusalén kanin okatka teokali. Omonekiaya nejnemiskej naui tonal kanin tepeyo. Xiktlajtoltikan Lucas 2:39-42 uan satepan xikitakan tlen namechmachtia.
-
¿Timokuayejyekoua omonekiaya mochijchikauaskej ijkuak oyayaj Jerusalén?
-
Uan tejuatsin, ¿tlen moneki tikchiuas para timonechikos?
-
¿Mitspaleuis tla timonechikos? ¿Tleka ijkon tikijtoua?
Biblia kijtoua miak ipati matimonechikokan uan matikueyichiuakan Jehová. Xiktlajtoltikan Hebreos 10:24, 25 uan satepan xikitakan tlen namechmachtia.
-
¿Tleka moneki nochipa timonechikoskej?
SEKIMEJ KIJTOUAJ: “Amo moneki tipouiskej itech se religión para tikueyichiuaskej toTajtsin Dios, tejuan moneki tikijtoskej tlen tikchiuaskej”.
-
¿Tlen texto noso neskayotl tlen kajki itech Biblia mitspaleuis xikteititi tlen kineki Jehová matikchiuakan?
XIKILNAMIKTO
Tla timonechikos, okachi tikixmatis Jehová, okachi iuan timouikas uan tikueyichiuas iuan oksekimej.
Matikojpauikan
-
¿Tleka Jehová kineki matimonechikokan?
-
¿Tlen timomachtis tla timonechikos iuan iTlaixpantijkauan Jehová?
-
Tlen tikijtoua, ¿ken mitspaleuis tla timonechikos?
NIN NOIJKI MITSPAKTIS
¿Timomojtia ijkuak timokuayejyekoua moneki timonechikos? Se tlakatl tlen omomojtiaya monechikos satepan okipakti, xikita tleka.
Xikita ken se telpochtli okipaktiaya monechikos uan tlen okichi para nochipa ijkon kichijtos.
Ximomachti tlen mokuayejyekouaj oksekimej ijkuak timonechikouaj.
“¿Tleka moneki nimonechikos?” (Nin tlamachtil kajki itech jw.org/ncx)
Xikita tleka se tlakatl tlen okipaktiaya moteuis, okipatlak inemilis ijkuak opejki monechikoua.
“Nochipa onikuikatinemiaya notepos” (Akin Tetlapouijtok, 1 de julio 2014)
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
