2 Corintios 9:1-15
9 Amo moneki namechtlajkuililis para nankimatiskej moneki nankinpaleuiskej tokniuan yolchipauakej.
2 Ne nikmati nankinekij nantlapaleuiskej uan ijkon nikinmiluia tokniuan tlen chantij Macedonia kuali tlen nankichiuaj. Yisexiuitl nikinmiluijtiuits yiuelis tlapaleuiskej akinmej chantij Acaya. Miakej tokniuan noijki kinekij kichiuaskej ijkon ken namejuan nankichiuaj.
3 Nikintitlani tokniuan para motas kox melauak yiuelis nantlapaleuiskej ijkon ken onikinmilui nankichiuaskiaj. Ijkon amo yetos san nenka otikinmiluijkej kuali tlen nankichiuaj porque nankinekij nantlapaleuiskej.
4 Tla tokniuan tlen chantij Macedonia nouan yaskej pero namejuan amo uelis nantlapaleuiskej, san timopinatiskej porque otimechneltokilijkej nantlapaleuiskej. Pero namejuan okachi nanmopinatiskej.
5 Ikinon kuali onikitak nikinmiluis tokniuan matlayekanakan manamechitatij uan makololokan tlen onankijtojkej nankitetliokoliskej. Ijkon yinankipiaskej tlen nankitetliokoliskej uan amo namechchiualtiskej xiktemakakan.
6 Namejuan yinankimatij akin amo miak tlatoka amo miak kololoua, pero miak kololoua akin miak tlatoka.
7 Sejse makichiua ijkon ken yokijto iyolipan, amo makixkoko nion amo makichiualtikan porque toTajtsin Dios kitlasojtla akin kitemaka ika pakilistli.
8 ToTajtsin Dios uelis namechtliokolis tlen kuali uan ijkon amo keman itlaj namechpolos. Noijki nankipiaskej tlen moneki para nankichiuaskej tlen kuali.
9 (Ijkon ken ijkuilitok: “Ye miak tlamantli kitetliokolia uan kinmaka akinmej amitlaj kipiaj. Ye kichiua tlen kuali uan nochipa kilnamikiskej”.
10 ToTajtsin Dios kimaka miak semilla akin tlatoka uan nochtin kinmaka pan tlen kikuaskej. Ye noijki namechmakas semilla uan kimiaktilis para nankitokaskej uan kimiaktilis tlen nankololoskej porque nankichiuaj tlen kuali).
11 ToTajtsin Dios sapanoua namechteochiua para tlatlamantli xiktemakakan tlen nankipiaj ika nochi namoyolo. Ijkon oksekimej kitlasojkamatiliskej toTajtsin Dios ijkuak tiktemakaskej namotetliokolil.
12 Nin tetliokolil amo san kinpaleuis tokniuan yolchipauakej tlen amitlaj kipiaj. Noijki kinpaleuis miakej makitlasojkamatilikan toTajtsin Dios porque nantlapaleuiaj.
13 Ijkon yejuan kiueyichiuaskej toTajtsin Dios porque ijkuak nantlapaleuiaj nankiteititiaj nankitlakamatij* kuali tlajtoli. Non kuali tlajtoli kijtoua akin Cristo uan namejuan nankitematiltiaj. Noijki nankiteititiaj namechpaktia nankinmakaskej tlen nankipiaj tokniuan yolchipauakej uan oksekimej.
14 Ijkuak yejuan namopatka motlatlaujtiskej, kijtoskej namechtlasojtlaj porque toTajtsin Dios onamechtliokoli tlen kuali.
15 Tiktlasojkamatiliaj toTajtsin Dios porque otechmakak sapanoua kualtsin tetliokolil.
Notas
^ Noso “nankiuelkakij”.
