Hebreos 11:1-40
11 Titlaneltokaskej kijtosneki kuali tikmatij panos tlen tikchiaj. Noijki kuali tikmatij melauak onka seki tlamantli maski amo tikitaj.
2 Touejkatatajuan otlaneltokayaj ikinon toTajtsin Dios okinmititi okinseli.
3 Tejuan titlaneltokaj ikinon tikmatij nochi tlen onka kajki kanin moneki porque toTajtsin Dios ijkon okijto. ToTajtsin Dios okichijchi tlen tikitaj ika tlamantli tlen amo tikitaj.
4 Abel otlaneltokaya ikinon ye okimakak toTajtsin Dios se tetliokolil okachi ipati uan amo okimakak ken itetliokolil Caín. ToTajtsin Dios okiseli itetliokolil uan okititi okitaya yolkuali porque otlaneltokaya. Itlaneltokilis ok techmachtia maski ye yoixpoliuik.
5 Enoc otlaneltokaya ikinon toTajtsin Dios oksekan okiuikak para amo tlajyouiskia ijkuak ixpoliuiskia uan amikaj okajsik kanin okatka. Ijkuak toTajtsin Dios ayamo oksekan okiuikaya, ye okititi okiyolpaktiaya.
6 Amo uelis tikyolpaktiskej toTajtsin Dios tla amo titlaneltokaj. Porque akinmej motokiaj inauak toTajtsin Dios moneki kineltokaskej ye kajki uan kinteochiua akinmej mochijchikauaj kitemouaj.
7 Noé otlaneltokaya ikinon okiteititi okitlakamatiaya* toTajtsin Dios ijkuak okilui tlen panoskia maski ayamo omotaya. Noijki okichi se arca uan ijkon omomakixtijkej akinmej iuan ochantiayaj. Ye otlaneltokaya, ikinon okiteititi omonekiaya tlajyouiskej akinmej chantij tlaltikpak. ToTajtsin Dios okiseli porque otlaneltokaya.
8 Abrahán otlaneltokaya ikinon otetlakamatki* ijkuak toTajtsin Dios okilui mauia kanin kiseliskia tlen ye okilui kimakaskia. Ye oyajki maski amo okimatiaya kanin oyaya.
9 Abrahán otlaneltokaya ikinon ochantiaya itech altepetl tlen toTajtsin Dios okilui kimakaskia maski amo okatka ialtepe. Ochantiaya itech kaltsitsintin iuan Isaac uan Jacob. Yejuan noijki kiseliskiaj tlen Abrahán okiluijkej kimakaskiaj.
10 Porque ye okichiaya altepetl tlen kuali motlakxilijtok. ToTajtsin Dios okijto ken mochiuas non altepetl uan ye okichijchi.
11 Sara otlaneltokaya ikinon okiseli chikaualistli para kipias ikone maski yokipiaya miak xiuitl uan ayakmo uelis kinpiaskia ikoneuan. Porque okimatiaya akin okijto tlen panoskia melauak kichiua tlen kijtoua.
12 Ikinon se tlakatl okinpixki miakej ikoneuan maski omotaya ayakmo uelis kinpiaskia. Okatkaj sapanoua miakej ken sitlalimej tlen katej iluikak uan amikaj uelis kinpouas porque katej ken xali tlen kajki itempa mar.
13 Nochtin yejuan otlaneltokakej hasta ijkuak oixpolikej maski amo okiselijkej tlen okinmiluijkej. Pero okitakej tlen okinmiluijkej maski satepan mochiuaskia uan okiselijkej ika pakilistli. Yejuan teixpan okijtouayaj oualayaj itech okseki altepemej uan amo nochipa yetoskiaj itech tlali kanin ochantiayaj.
14 Akinmej ijkon kijtouaj kiteititiaj mochijchikauaj kitemoskej kanin chantiskej.
15 Pero tla yejuan kilnamiktoskiaj kanin okiskej uelis oksepa mokopaskiaj.
16 Pero axkan mochijchikauaj kajsiskej kanin okachi kuali chantiskej uan non kijtosneki tlen poui iluikak. Ikinon toTajtsin Dios amo pinaua makinotsakan inDios uan okinyektlalili se altepetl.
17 Abrahán otlaneltokaya ikinon okitemakak Isaac ijkuak okiyejyekojkej. Non tlakatl okiseli ika pakilistli tlen okiluijkej uan okiyejyeko kitemakas san ye se ikone.
18 Maski okiluijkej: “Moxuiuan ualeuatoskej itech Isaac”.
19 Pero ye okimatiaya toTajtsin Dios uelis kiyolitiskia ikone tla ixpoliuiskia. ToTajtsin Dios okichi amo maixpoliui uan non okiteititi tlen panoskia satepan.
20 Isaac otlaneltokaya ikinon okinteochi Jacob uan Esaú ijkuak okinmilui tlen panoskia satepan.
21 Jacob otlaneltokaya ikinon okinteochi sejse ikoneuan José ijkuak yiixpoliuiskia uan omopaleui ika ibastón ijkuak okiueyichi toTajtsin Dios.
22 José otlaneltokaya ikinon okijto israelitas kisaskiaj Egipto uan ijkuak yiixpoliuiskia otlanauati makiuikakan iomio.*
23 Ipapanuan Moisés otlaneltokayaj ikinon okitlatijkej eyi metstli ijkuak oneski* porque okitakej okatka se chokotsin kuajkualtsin. Yejuan amo okimauilijkej* tlen otlanauati tekiua.
24 Moisés otlaneltokaya ikinon ijkuak omoskalti amo okinek makijtokan ye ikone ichpoch faraón.
25 Ye okipejpenki makitlajyouiltikan iuan ialtepe toTajtsin Dios. Amo okipejpenki moyolpaktis maski san kanaj keski tonal ika tlen amo kuali okinekiaya kichiuas icuerpo.
26 Moisés okajsikamatiaya okachi ipati tlajyouis ken Cristo uan amitlaj ipati tlamantli tlen okatka Egipto. Ika nochi iyolo ye okichiaya makiteochiuakan.
27 Moisés otlaneltokaya ikinon okiski Egipto uan amo omomojti maski tekiua okualanki. Ye omochixki uan otlaxiko ijkuak otlajyoui ken yetoskia okitaya akin amo mota.
28 Moisés otlaneltokaya ikinon okichi Pascua uan okitsitsikuitski estli. Ijkon iángel toTajtsin Dios amo kinmiktiskia inkoneuan israelitas tlen achto okinpixkej.
29 Israelitas otlaneltokayaj ikinon opanokej ijtik mar Rojo ipan tlali uaki. Egipcios omelsinkej ijtik atl ijkuak okinekiayaj ijkon kichiuaskej.
30 Israelitas otlaneltokayaj ikinon chikome tonal okiyaualojkej tepamitl tlen okipiaya altepetl Jericó uan oxixinki non tepamitl.
31 Rahab omonemakaya pero otlaneltokaya ikinon amo okixpolojkej inuan akinmej amo otetlakamatiayaj,* porque ye kuali okinseli akinmej ichtaka otlachiatoj.
32 ¿Tlen okseki nikijtos? Porque amo nimajxilis namechiluis tlen okichijkej Gedeón, Barac, Sansón, Jefté, David, Samuel uan oksekimej profetas.
33 Yejuan otlaneltokayaj ikinon okintlanilijkej tekiuajkej, okichijkej tlen kuali, toTajtsin Dios okinmilui tlen kichiuaskia, okinkamatsakej leones,
34 amo okintlati tlitl, omakiskej ijkuak okinekiayaj kinmiktiskej ika espada, amo okatkaj chikauakej pero satepan omochijkej chikauakej, amo omomojtiayaj ijkuak okimomakayaj uan okinchololtijkej soldados tlen okinekiayaj kinmakaskej.
35 ToTajtsin Dios okinyoliti infamiliares sekimej siuamej. Sekimej tlakamej okintlajyouiltijkej pero amo okikajkej toTajtsin Dios maski uelis kinmakixtiskiaj. Ijkon okichijkej porque okinekiayaj okachi kuali yetoskej ijkuak kinyolitiskej.
36 Oksekimej okinpinauijkej uan okinuitekej ika mekatl. Pero noijki okinmilpijkej ika cadenas uan okintsakej.
37 Okinmojmotlakej ika tetl, okinyejyekojkej, okintlajkotsontekej uan okinmiktijkej ika espada. Onentinemiayaj ika intlaken tlen ochijchitoka ika imieuayo ichkamej uan imieuayo tentsomej. Amitlaj okipiayaj, otlajyouiayaj uan okintoktiayaj miak tlamantli.
38 Akinmej chantij tlaltikpak amo okinnamikiaya inuan yetoskej. Onentinenkej kanin tlauaki, itech tepeyo, itech cuevas uan ijtik tekochtli.
39 Yejuan amo okiselijkej tlen okinmiluijkej maski toTajtsin Dios okinmititi okinseliaya porque otlaneltokayaj.
40 Porque toTajtsin Dios yokijtojka tejuan achto techmakas itlaj tlen okachi kuali. Ijkon amo achto kinkixtiliskej tlajtlakoli uan tejuan satepan.
Notas
^ Noso “okiuelkakiaya”.
^ Noso “otlauelkaki”.
^ Noso “otlanauati ken kitokaskiaj”.
^ Noso “otlakatki”.
^ Noso “okimakasikej”.
^ Noso “otlauelkakiayaj”.
