Juan 14:1-31
14 “Amo ximotekipachokan. Xikneltokakan toTajtsin Dios uan noijki ne techneltokakan.
2 Ikalijtik noTajtsin tlakualkan kanin nanchantiskej. Ne namechiluiskia tla amo yetoskia tlakualkan. Ne nio namechtlayektlaliliti kanin nanchantiskej.
3 Ijkuak yonia onamechtlayektlalilito, oksepa niualmokopas uan namechuikas kanin ne niyetos. Nanyetoskej nonakastlan uan ijkon kanin ne niyetos noijki ompa nanyetoskej.
4 Namejuan nankixmatij ojtli kanin ne nio”.
5 Tomás okitlajtlani Jesús: “NoTeko, ¿ken tikixmatiskej ojtli tla amo tikmatij kanin tias?”.
6 Jesús okinankili: “Ne niojtli, ne nimelauak uan ne niyolilistli. San ne uelis ikaj nikpaleuis maajsiti inauak noTajtsin.
7 Nankixmatiskej noTajtsin tla nantechixmatij. Axkan yinankixmatij uan yonankitakej”.
8 Felipe okilui: “NoTeko, san tiknekij techixmatilti moTajtsin”.
9 Jesús okilui: “Felipe, ¿ayamo techixmati maski youejka namouan nika? Akin yonechitak noijki yokitak noTajtsin. ¿Tleka tikijtoua manamechixmatilti noTajtsin?
10 ¿Amo tikneltoka ne nika iuan noTajtsin uan ye nouan kajki? Tlen namechiluia amo san ne nimokuayejyekoua.* NoTajtsin kichijtok tlen ye kineki uan nouan kajki.
11 Techneltokilikan ijkuak namechiluia ne nika iuan noTajtsin uan ye nouan kajki. Tla amo nantechneltokiliaj, xikneltokakan tlen nikchiua.
12 Ne melauak namechiluia, akin nechneltoka kichiuas tlen ne nikchiua. Kichiuas okachi miak tlamantli porque ne nio inauak noTajtsin.
13 Ne namechmakas nochi tlen nankitlajtlaniskej ika notoka. Ne ijkon nikchiuas para xikueyichiuakan toTajtsin Dios.
14 Ne namechmakas tlen nankitlajtlaniskej ika notoka”.
15 “Nankichiuaskej tlen namechnauatia tla nantechtlasojtlaj.
16 Ne niktlatlaujtis noTajtsin manamechmaka okse tlamantli tlen nochipa namechpaleuis.
17 Oksekimej amo kiseliaj espíritu santo tlen kiteititia tlen melauak, porque amo kitaj nion amo kixmatij. Pero namejuan nankixmatij porque namouan kajki uan namouan yetos.
18 Ne amo namechkauas. Oksepa namouan niualmokopas.
19 Ayakmo miak poliui uan oksekimej ayakmo nechitaskej. Pero namejuan nantechitaskej porque ne niyoltok uan namejuan nanyoltoskej.
20 Non tonal nankimatiskej ne nika iuan noTajtsin, namejuan nouan nankatej uan ne namouan nika.
21 Nechtlasojtla akin kiselia tlen niknauatia uan kichiua. NoTajtsin kitlasojtlas akin nechtlasojtla. Ne noijki niktlasojtlas uan nikchiuas kuali manechixmati”.
22 Ijkuakon Judas (amo ye Judas Iscariote) okitlajtlani Jesús: “NoTeko, ¿tleka tikneki tikchiuas kuali matimitsixmatikan uan amo oksekimej mamitsixmatikan?”.
23 Jesús okinankili: “Akin nechtlasojtla kichiuas tlen nikijtoua, uan noTajtsin kitlasojtlas. Ne uan noTajtsin tiuitsej, uan san sekan iuan tichantiskej.
24 Akin amo nechtlasojtla, amo kichiua tlen nikijtoua. Amo noaxka tlen namechiluia, iaxka noTajtsin tlen onechualtitlanki”.
25 “Axkan ijkon namechiluia porque ok namouan nika.
26 Pero ika notoka, noTajtsin namechualtitlanilis espíritu santo manamechpaleui. Non espíritu santo nochi namechmachtis uan namechilnamiktis nochi tlen yonamechilui.
27 Namechkajteuilia yolseuilistli uan namechmaka noyolseuilis. Yolseuilistli tlen ne niktemaka amo ijkon ken kitemakaj oksekimej. Amo ximotekipachokan nion amo ximomojtikan.
28 Yonankikakej tlen onikijto: ‘Nias pero oksepa namouan niualmokopas’. Tla nantechtlasojtlaj, nanpakiskej nio inauak noTajtsin porque noTajtsin okachi ueyititok.
29 Yonamechilui nin tlamantli maski ayamo panoua, para ijkuak panos namejuan nantlaneltokaskej.
30 Ayakmo okachi namouan nimotlapouis porque yiuits akin tlanauatia ipan tlaltikpak. Pero ye amitlaj uelis nechtoktis.
31 Ne nikchiua nochi tlen noTajtsin onechnauati para nochtin makimatikan niktlasojtla noTajtsin. Ximoketsakan, tiauij”.
Notas
^ Noso “nimonejneuilia”.
