Lucas 21:1-38
21 Jesús okinmitak akinmej okipiayaj miak tomin okitemakayaj tomin para templo.
2 Ijkuakon okitak se siuatl tlen yoixpoliuik inamik uan amo okipiaya miak tlamantli. Ye okintemakak ome tomintsitsintin.*
3 Jesús okijto: “Ne namechiluia, nin siuatsintli maski amo kipia miak tlamantli okitemakak okachi miak tomin uan amo ken yejuan.
4 Porque yejuan okitemakakej tlen ayakmo kinejnekij.* Pero nin siuatsintli tlen amo kipia miak tlamantli okitemakak nochi tlen okipiaya”.
5 Satepan sekimej omotlapouijtokaj ken ochijchitoka templo. Okinpiaya kuajkualtsitsintin temej* uan nochi tlen okimakayaj toTajtsin Dios.
6 Jesús okijto: “Ajsis tonal kixixiniskej nochi tlen axkan nankitaj. Ayakmo nepanitos nion se tetl”.
7 Yejuan okitlajtlanijkej: “Tlamachti, ¿keman ijkon panos uan tlen kiteititis yipanos nochi non tlamantli?”.
8 Ye okinnankili: “Ximomaluikan. Amikaj manamechkajkayaua. Miakej uitsej, kinejnekiskej* notoka uan kijtoskej: ‘Non tlakatl ye ne’ noso kijtoskej: ‘Yoajsik tonal tlen omoijto’. Pero amo xikinneltokilikan.
9 Noijki amo ximomojtikan ijkuak nankikakiskej onka guerra uan miakej mokualaniaj. Porque nin tlamantli moneki achto panos pero amo san niman tlatlamis”.
10 Jesús noijki okinmilui: “Se altepetl mokualanis iuan okse altepetl uan noijki tekiuajkej mokualaniskej.
11 Nouian tlalolinis, tlaapistis uan yetos kokolistli. Motas miak tlamantli temomojti uan motaskej uejueyij milagros itech iluikak”.
12 “Pero achto namechkitskiskej uan namechtlajyouiltiskej. Noijki namechtemaktiskej itech sinagogas* uan namechtsakuaskej. Namechuikaskej inmixpan akinmej tlanauatiaj uan tekiuajkej porque nankichiuaj ken ne nikchiua.
13 Ijkon nankitematiltiskej akin ne.
14 Ikinon amo san ximokuayejyekojtokan* ken nanmopaleuiskej,
15 porque ne namechiluis tlen nankijtoskej uan namechmakas ixtlamatilistli. Ijkon amikaj namechtlanilis nion amikaj namechtlajtolnamikis.
16 Noijki namechtemaktiskej namopapanuan, namokniuan, namofamiliares uan namoyolikniuan. Noijki sekimej namechmiktiskej.
17 Nochtin namechkokoliskej porque nankichiuaj ken ne nikchiua.
18 Pero amo poliuis nion se namotsonkal.
19 Nankimakixtiskej namoyolilis tla nantlaxikoskej”.
20 “Ijkuak nankitaskej soldados kiyaualoskej Jerusalén, xikmatikan yikipojpoloskej.
21 Akinmej yetoskej Judea mayakan itech tepeyo. Akinmej yetoskej Jerusalén macholokan. Akinmej yetoskej intlala amo mayakan Jerusalén.
22 Porque itech nonmej tonalmej toTajtsin Dios tetlajyouiltis. Ijkon mochiuas nochi tlen ijkuilitok.
23 ¡Mialmastin siuamej tlen yikipiaskej inkone noso tlen tlachichitijtoskej! Porque tlajyouiskej akinmej nikan chantij uan kitlajyouiltiskej nin altepetl.
24 Miakej kinmiktiskej ika espada uan miakej kinuikaskej itech okseki altepemej. Akinmej amo judíos ipan tlajtlaksaskej* Jerusalén hasta ijkuak toTajtsin Dios kitekauilis ijkon mapano”.
25 “Noijki motas miak tlamantli tlen amo keman omotaya itech tonaltsin, itech metstli uan itech sitlalimej. Nikan tlaltikpak tlajyouiskej akinmej chantij itech altepemej. Amo kimatiskej tlen kichiuaskej ijkuak ijkoyokas mar nion ijkuak chikauak molinis.
26 Nochtin sapanoua momojtiskej uan kuatlayouiliskej. Noijki kintekipachos tlen panos ipan tlaltikpak porque nochi tlen onka iluikak motsetselos.*
27 Ijkuakon kitaskej iKone Tlakatl uits ika ichikaualis ipan se mixtli.
28 Ijkuak peuas ijkon panos, ximoketsakan uan xiajkotlachiakan porque yinamechmakixtiskej”.
29 Jesús noijki okinmilui nin neskayotl:* “Xikitakan tlen kipanoua higoskouitl uan nochi kojyo.
30 Ijkuak nankitaj peua selia, nankimatij yipeuas tlatotonias.
31 Noijki ijkuak nankitaskej panos nin tlamantli, xikmatikan yiuits iTekiuajkayo toTajtsin Dios.
32 Ne namechiluia, amo ixpoliuiskej akinmej axkan yoltokej hasta mapano nochi nin tlamantli.
33 Iluikak uan tlaltikpak pojpoliuiskej pero tlen nikijtoua amo keman pojpoliuis”.
34 “Ximotlachilikan para amo miak xitlakuakan, amo miak xitlakonikan uan amo sapanoua manamechtekipacho namoyolilis tlamo ayakmo kuali nanmokuayejyekoskej.* Ijkon amo nankimatiskej keman ualajsiki non tonal,
35 uan yetos ken se trampa. Porque non tonal kinmajsiki nochtin tlen chantij nikan tlaltikpak.
36 Xiijsatokan uan ximotlatlaujtijtokan para uelis nanmomakixtiskej ijkuak panos nochi non tlamantli. Ijkon uelis nanmoketoskej ixpan iKone Tlakatl”.
37 Tlajka Jesús otlamachtiaya itech templo uan youak oyaya mokalotiti itech tepetl Olivos.
38 Nochi kualkan, nochtin oyayaj templo kikakitiuij Jesús.
Notas
^ Noso “leptones”.
^ Noso “kitekitiltiaj”, “kikuij”.
^ Noso “tepejximej”.
^ Noso “kitekitiltiskej”, “kikuiskej”.
^ Xikita diccionario.
^ Noso “ximonejneuilijtokan”.
^ Noso “mokejketsaskej”.
^ Noso “molinis”.
^ Noso “ejemplo”.
^ Noso “nanmonejneuiliskej”.
