Marcos 7:1-37
7 Kanin okatka Jesús oajsitoj fariseos uan sekimej tlen otlamachtiayaj tlanauatil. Yejuan oualayaj Jerusalén.
2 Yejuan okinmitakej idiscípulos Jesús otlakuajtokaj, pero okatkaj masokiojkej porque amo omomajtekijkej.
3 (Fariseos uan nochtin judíos amo otlakuayaj tla amo omomajtekiayaj hasta tlakpak, porque okichiuayaj ijkon ken okinmachtijkej inuejkatatajuan.
4 Noijki ijkuak omokopayaj tiankisko amo otlakuayaj tla amo omomajtekiayaj. Achto okinkalakiayaj ijtik atl copas, konmej uan tepalkamej de cobre. Okichiuayaj ijkon ken okinmachtijkej inuejkatatajuan).
5 Fariseos uan akinmej otlamachtiayaj tlanauatil okiluijkej Jesús: “Modiscípulos amo momajtekiaj ijkuak tlakuaj, ¿tleka amo kichiuaj tlen otechmachtijkej touejkatatajuan?”.
6 Ye okinmilui: “Nankipiaj ome namoixko ikinon profeta Isaías okijto tlen namechpanoskia ijkon ken ijkuilitok: ‘Akinmej pouij itech nin altepetl san kijtouaj nechueyichiuaj pero amo nechtlasojtlaj.
7 Amitlaj ipati nechueyichiuaj porque san tlamachtiaj tlen tlanauatiaj tlakamej’.
8 Namejuan san nankichiuaj tlen onamechmachtijkej namouejkatatajuan uan amo nankichiuaj tlen tlanauatia toTajtsin Dios”.
9 Noijki okinmilui: “Nankimatij ken nankichiuaskej para amo nankintlakamatiskej* itlanauatiluan toTajtsin Dios. San nankichiuaj tlen onamechmachtijkej.
10 Moisés okijto: ‘Xiktlakaita mopapa uan momama’. Noijki okijto: ‘Kimiktiskej akin kiuijuikaltia ipapa noso imama’.
11 Pero namejuan nankijtouaj: ‘Ikaj uelis kiluis ipapa noso imama: “Amo uelis nimitspaleuis porque nochi tlen nikpia yonikijto niktliokolis toTajtsin Dios”’.
12 Ijkon ayakmo ikaj nankikauiliaj makipaleui ipapa noso imama.
13 Nankichiuaj oksekimej ayakmo makipatioitakan iTlajtol toTajtsin Dios, porque san nankichiuaj tlen onamechmachtijkej uan nankichiuaj okseki tlamantli tlen amo moneki”.
14 Ijkuakon Jesús oksepa okinnotski akinmej ompa okatkaj uan okinmilui: “Kuali techkakikan uan xikajsikamatikan tlen kijtosneki tlen namechiluis.
15 Tlen kikua se tlakatl amo kisokiotia, pero kisokiotia tlen amo kuali kisa ikamak”.
16 *
17 Jesús okinkajte akinmej ompa okatkaj uan okalak itech se kali. Ompa idiscípulos okitlajtlanijkej tlen kijtosneki tlen okijto.
18 Ye okinnankili: “¿Namejuan noijki amo nankajsikamatij? ¿Amo nankitaj nochi tlen kikua se tlakatl amo kisokiotia?
19 Porque tlen kikua ajsi ijtik uan amo ajsi iyolipan uan satepan kikixtia”. Ijkon Jesús okijto nochi tlakuali chipauak.
20 Noijki okijto: “Tlen kisa ikamak se tlakatl non tlen kisokiotia.
21 Ijkuak ikaj amo kuali mokuayejyekoua* non kisa iyolipan: auilnemi,* tlachteki, temiktia,
22 kikajkayaua isiua noso inamik, tlaixneki, kichiua tlen amo kuali, tlakajkayaua, tlajtlakolchijtinemi uan ayakmo pinaua,* nexikoli, tlauijuikaltia, moueyineki uan amo ixtlamatki.
23 Nochi nin tlamantli amo kuali, kisa iyolipan tlakatl uan non kisokiotia”.
24 Satepan Jesús oyajki altepetl Tiro uan Sidón. Okalak itech se kali porque amo okinekiaya makimatikan kox ompa okatka. Pero san niman omomatki ompa okatka.
25 Ijkuak yikin oajsito Jesús, se siuatl tlen itakotsin okipiaya se ejekatl* okimatki ompa okatka, ikinon okajsito uan ixpan omotlankuaketski.
26 Non siuatl okatka griega uan ochantiaya Fenicia ompa Siria. Ye miak uelta okitlatlaujti Jesús makikixtili ejekatl* itakotsin.
27 Pero Jesús okilui: “Xikkaua achto kuali matlakuakan konemej. Amo kuali tla tikinkixtiliskej intlakual konemej uan tikinmakaskej itskuintsitsintin”.
28 Siuatl okijto: “Melauak tlen tikijtoua noteko. Pero hasta itskuintsitsintin tlen katej itlampa mesa kikuaj intenpayax konemej tlen uetsi”.
29 Jesús okilui: “Xio uan amo ximotekipacho. Ejekatl* yokika motakotsin porque ijkon otikijto”.
30 Siuatl oyajki ichan, okajsito itakotsin uetok ipan cama uan ayakmo okipiaya ejekatl.*
31 Jesús okiski altepetl Tiro uan oyajki itempa mar Galilea. Opanok ik Sidón uan ik Decápolis.*
32 Ijkuakon okiuikilijkej se tlakatl tlen amo otlakakiaya uan amo kuali otlajtouaya. Okitlatlaujtijkej Jesús ipan makitlali ima.
33 Ye uejka okiuikak tlakatl kanin amikaj kitaskia. Okinkalaki imajpiluan ijtik inakasuan uan satepan ochijchak uan okikitskili inenepil.
34 Jesús oajkotlachixki, oelsijsiuik uan okijto: “Éffatha”, nin tlajtoli kijtosneki “ximotlapo”.
35 Tlakatl san niman opejki tlakaki uan opejki kuali tlajtoua.
36 Jesús okinnauati akinmej ompa okatkaj amikaj makiluikan tlen opanok. Pero yejuan okachi okijtojtinemiayaj maski okinmiluiaya amitlaj makijtokan.
37 Nochtin omotlajtlachialtijkej uan okijtouayaj: “Ye nochi kuali kichiua. ¡Hasta kichiua matlakakikan akinmej amo tlakakij uan matlajtokan akinmej amo tlajtouaj!”.
Notas
^ Noso “nankinuelkakiskej”.
^ Seki biblias kipiaj nin versículo pero tlen yiuejkika omoijkuilo ika griego amo kipia.
^ Noso “monejneuilia”.
^ Ika griego moijtoua pornéia. Xikita diccionario kanin kijtoua auilnemi.
^ Xikita diccionario.
^ Noso “demonio”.
^ Noso “demonio”.
^ Noso “demonio”.
^ Noso “demonio”.
^ Noso “majtlaktli altepemej”.
