Mateo 16:1-28
16 Fariseos uan saduceos okitatoj Jesús porque okinekiayaj kiyejyekoskej, ikinon okiluijkej makichiua se milagro ika itoka toTajtsin Dios.
2 Ye okinmilui: “Ijkuak yotiotlakik namejuan nankijtouaj: ‘Mostla kualtsin tonas porque iluikak chichiltik’.
3 Ijkuak tlanesi nankijtouaj: ‘Axkan seuas uan kiauis porque iluikak chichiltik pero tlamixtlayoua’. Namejuan nankimatij ken tlayetos ijkuak nankitaj iluikak, pero amo nankajsikamatij tlen kijtosneki tlen axkan panotok.
4 Akinmej axkan yoltokej amo yolkualmej uan amo tetlakamatij,* nochipa kinekij kitaskej se milagro. Pero amo kitaskej okse milagro, san kitaskej tlen okipanok Jonás”. Jesús ijkon okinmiluijteuak uan oyajki.
5 Satepan oyajkej okse lado itempa mar pero idiscípulos okilkajkej kiuikaskej pan.
6 Jesús okinmilui: “Ximotlachilikan uan ximomaluikan amo manamechijtlako inlevadura fariseos uan inlevadura saduceos”.
7 Discípulos opejki kimoluiaj: “Amo otikualikakej pan”.
8 Jesús okikak tlen okimoluiayaj uan okinmilui: “Namejuan amo okachi nantlaneltokaj, ¿tleka nankimoluiaj amo onankiualikakej pan?
9 ¿Ayamo nankajsikamatij tlen onamechilui? ¿Amo nankilnamikij ijkuak otikintlamakakej 5,000 tlakamej san ika makuili pan? ¿Amo nankilnamikij tlen omoka onankololojkej ika chikimej?
10 ¿Yonankilkajkej ijkuak otikintlamakakej 4,000 tlakamej san ika chikome pan? ¿Yonankilkajkej keski uejueyij chikimej onankololojkej tlen omoka?
11 ¿Tleka amo onankajsikamatkej tlen onikijto amo kijtosneki pan? Ne onamechilui ximomaluikan amo manamechijtlakokan fariseos uan saduceos ika inlevadura”.
12 Ijkuak ijkon okinmilui, okajsikamatkej tlen okijto amo kijtosneki levadura tlen kitlaliliaj pan. Ye okinmilui mamomaluikan para amo makinmijtlako tlen tlamachtiaj fariseos uan saduceos.
13 Ijkuak Jesús oajsito altepetl Cesarea ompa Filipo, okintlajtlani idiscípulos: “¿Tlen kijtouaj oksekimej? ¿Akin iKone Tlakatl?”.
14 Yejuan okinankilijkej: “Sekimej kijtouaj ye Juan Bautista. Oksekimej kijtouaj ye Elías uan oksekimej kijtouaj ye Jeremías noso okse profeta”.
15 Jesús okinmilui: “Namejuan, ¿tlen nankijtouaj? ¿Akin ne?”.
16 Simón Pedro okinankili: “Te tiCristo, tiiKone toTajtsin Dios tlen yoltok”.
17 Jesús okilui: “Xipaki Simón ikone Jonás, porque tlen otikijto amo omitsmatilti se tlakatl. Omitsmatilti noTajtsin tlen kajki iluikak.
18 Noijki nimitsiluia, te tiPedro uan ipan nin tetl nikintlalis akinmej nechneltokaj,* uan ipuertas Mikatekochtli* amo kintlanilis.
19 Ne nimitsinmakas illaves Tekiuajkayotl tlen kajki iluikak. Ijkuak itlaj kilpiskej iluikak, te tikilpis ipan tlaltikpak. Ijkuak itlaj kitotomaskej iluikak, te tiktotomas ipan tlaltikpak”.
20 Noijki okinnauati idiscípulos amikaj makiluikan ye okatka Cristo.
21 Ijkuakon Jesús okinyekilui idiscípulos omonekiaya yas Jerusalén. Ompa kitlajyouiltiskiaj tlayekankej, teopixkej tlen otlayekanayaj uan akinmej otlamachtiayaj tlanauatil. Noijki kimiktiskiaj pero ipan eyi tonal toTajtsin Dios kiyolitiskia.
22 Pedro oksekan okiuikak Jesús uan opejki kajua: “NoTeko, ¿tleka tikijtoua mitstlajyouiltiskej? Te amo keman ijkon mitspanos”.
23 Jesús omokopki uan okilui Pedro: “¡Xio Satanás! Te san techtsatsakuilia porque timokuayejyekoua* ken tlakamej uan amo ken toTajtsin Dios”.
24 Ijkuakon Jesús okinmilui idiscípulos: “Tla ikaj kineki nouan uits, ayakmo makichiua san tlen ye kineki. Makiseli makitlajyouiltikan* uan nouan mauiki.
25 Ixpoliuis akin kinekis kimakixtis iyolilis, pero akin mochiuas nodiscípulo oksepa yoltos maski ixpoliuis.
26 ¿Tlen ipati tla ikaj kitlanis nochi tlen onka tlaltikpak uan satepan mikis? ¿Uelis ikaj itlaj kitemakas para yoltos?
27 Porque iKone Tlakatl uits inuan iángeles ika ichikaualis iTajtsin. Non tonal sejse kintlaxtlauis ijkon ken okichijkej.
28 Ne namechiluia, sekimej tlen nikan katej amo ixpoliuiskej hasta ijkuak kitaskej iKone Tlakatl uits itech iTekiuajkayo”.
Notas
^ Noso “tlauelkakij”.
^ Ika griego moijtoua “notlanechikol”.
^ Ika griego moijtoua Hades. Xikita diccionario.
^ Noso “timonejneuilia”.
^ Noso “kouitl”. Xikita diccionario.
