Mateo 3:1-17
3 Itech nonmej tonalmej, Juan Bautista opejki tetlapouia kanin tlauaki ompa Judea.
2 Ye okijtouaya: “Ximoyolkopakan porque yiuits Tekiuajkayotl tlen kajki iluikak”.
3 Profeta Isaías yokijtojka tlen kichiuaskia Juan, ye okijto: “Kanin tlauaki mokaki ikaj chikauak kijtoua: ‘¡Xikchipauakan iojui Jehová uan xikmelauakan!’”.
4 Itlaken Juan ochijchitoka ika itsojmio camello uan omotlajkoilpiaya ika se kuetlaxtli. Ye okinkuaya chapulimej uan neujtli.*
5 Miakej tlen ochantiayaj Jerusalén, Judea uan itempa aueyatl Jordán, oyayaj kitatiuij Juan.
6 Ye okinapolaktiaya ijtik aueyatl Jordán uan yejuan omoyolkuitiayaj inmixpan oksekimej.
7 Ijkuak Juan okitak oualayaj miakej fariseos uan saduceos kanin ye oteapolaktiaya, okinmilui: “Namejuan nankouamej, ¿akin onamechilui amo namechtlajyouiltis toTajtsin Dios?
8 Achto xikteititikan melauak nanmoyolkopaj.
9 Amo ximixeuikan nankijtoskej Abrahán namopapa. Porque toTajtsin Dios uelis kichiuas ninmej temej* mamochiuakan ikoneuan Abrahán.
10 Yokiyektlalijkej hacha para kitsontekiskej ineluayo kouitl. Kouitl tlen amo kuajkuali itlakilo, kitsontekiskej uan kitlamotlaskej ijtik tlitl.
11 Ne namechapolaktia ijtik atl porque nanmoyolkopaj. Pero akin satepan uits okachi chikauak amo ken ne, uan amo nechnamiki nikinkixtilis ikakuan.* Ye namechapolaktis ika espíritu santo uan ika tlitl.*
12 Ye kikitskijtok tlen ika kejekanis* trigo uan tlachipauas kanin tlaejekanis.* Kololos trigo tlen yichipauak uan kitlatis, pero tlajsoli kitlamotlati ijtik tlitl tlen amo keman seuis”.
13 Se tonal, Jesús okatka Galilea uan oyajki itech aueyatl Jordán para Juan makiapolakti.
14 Pero Juan amo okinekiaya kiapolaktis uan okilui: “¿Tikneki ne manimitsapolakti? ¿Amo te moneki techapolaktis?”.
15 Jesús okinankili: “Axkan ijkon mamochiua, porque ijkon kuali tikchiuaskej nochi tlen kineki toTajtsin Dios”. Ijkuakon Juan ayakmo itlaj okilui.
16 Non tonal Juan okiapolakti Jesús. Ijkuak okiski ijtik atl, omotlapo iluikak uan ye* okitak oualtemouaya iespíritu toTajtsin Dios ken se paloma ipan Jesús.
17 Ijkuakon omokak ikaj oualtlajto iluikak uan okijto: “Nin noKone niktlasojtla uan ye kichiua manipaki”.
Notas
^ Noso “miel”.
^ Noso “tepejximej”.
^ Noso “ihuaraches”.
^ Nin kijtosneki sekimej kinpejpenas ika espíritu santo uan sekimej kinmixpolos ika tlitl.
^ Noso “kipipitsas”, “kitsetselos”.
^ Noso “tlapipitsas”, “tlatsetselos”.
^ Xamo ye Juan okitak.
