Tito 1:1-16
1 Ne niPablo, niktekichiuilia toTajtsin Dios uan niiapóstol Jesucristo. Ne nitlaneltoka ijkon ken akinmej okinpejpenki toTajtsin Dios uan nikmati tlen melauak. Non mouika iuan ken tikueyichiuaskej toTajtsin Dios.
2 Non kichiua matikchiakan nochipa tiyoltoskej porque toTajtsin Dios tlen amo tlakajkayaua yiuejkika ijkon okijto.
3 Ijkuak oajsik tonal, toTajtsin Dios tlen temakixtia okitematilti itlajtol ijkuak onechpejpenki uan onechnauati manitetlapoui kuali tlajtoli.
4 Nimitstlajkuililia Tito, ne nimitsita ken tinokone uan titlaneltoka ken ne:
ToTajtsin Dios uan Cristo Jesús tlen techmakixtia mamitstliokolikan tlen kuali uan mamitsmakakan yolseuilistli.
5 Onimitskajte Creta para xikyektlali tlen amo kuali kajki uan xikintlali tlayekankej itech sejse altepetl ijkon ken onimitsnauati:
6 tlayekanki moneki kuali kichiuas iteki, moneki kipias san se isiua uan ikoneuan matlaneltokakan para amo makinteluikan kichiuaj tlen amo kuali uan teixnamikij.
7 Tlayekanki tlen kajki ken itlakeual toTajtsin Dios moneki kichiuas kuali iteki, amo mayeto yoltlakuauak, amo san niman makualani, amo matlauana, amo mateuiteki uan amo makichiua tlen san ye kipaleuis.
8 Moneki kuali makinseli oksekimej, makipatioita tlen kuali, kuali mamokuayejyeko,* mayeto yolkuali, amo makikaua toTajtsin Dios uan makimati monauatis.
9 Tlen tlamachtis makisa itech tlajtoli tlen melauak. Ijkon uelis kinyolchikauas oksekimej ika kuali tlamachtil uan kinmititis tlen amo kuali kichiuaj akinmej kixnamikij.
10 Porque katej miakej tlakamej tlen teixnamikij, san kijtouaj tlen amitlaj ipati uan tlakajkayauaj. Okachi ijkon kichiuaj akinmej kijtouaj makimochiuilikan circuncisión.
11 Nonmej tlakamej moneki tikinkamatsakuaskej porque kichiuaj ayakmo matlaneltokakan nochtin familias. Ijkon kichiuaj ijkuak kinmachtiaj tlen amo moneki porque kinekij kipiaskej tlen san yejuan kinpaleuis.
12 Se profeta tlen inuan kajki nonmej tlakamej, okijto: “Akinmej chantij Creta nochipa tlakajkayauaj, yetoskiaj ken tekuanimej, tlatsijkej uan san tlakuaj”.
13 Melauak tlen okijto. Ikinon chikauak xikintlapoui uan xikinmilui tlen amo kuali kichiuaj uan ijkon makipiakan chikauak intlaneltokilis.
14 Noijki amo makikakikan tlen san kijtojtinemij judíos nion amo makikakikan tlen tlanauatiaj akinmej okikajkej tlen melauak.
15 Akinmej chipauakej nochi tlamantli kitaj chipauak. Pero akinmej amo tlaneltokaj uan amo chipauakej, amitlaj kitaj chipauak porque amo chipauak intlayejyekol* nion intlalnamikilis.
16 Teixpan kijtouaj kixmatij toTajtsin Dios pero tlen kichiuaj kiteititia kixtopeuaj. Yejuan tetlajyaltijkej, amo tetlakamatij* uan amo ueli kichiuaj itlaj kuali.
