Sekimej techtlajtlaniaj
2 Tesalonicenses 3:14 kijtoua kuali matikitakan akin itlaj kichiua. ¿Moneki san tlayekankej ijkon kichiuaskej noso tinochtin akinmej tipouij itech tlanechikol?
Apóstol Pablo okinmilui tokniuan tlen okatkaj Tesalónica: “Tla ikaj amo kichiua tlen tikijtouaj itech nin carta, kuali xikitakan akin ijkon kichiua” (2 Tes. 3:14). Achto otikijtouayaj ijkon omonekiaya kichiuaskej tlayekankej. Tla ikaj amo okintlakamatiaya principios bíblicos uan tlayekankej yimiak uelta okipaleuijkej, tlayekankej okitemakayaj se tlamachtil kanin timonechikouaj para matimomaluikan. Ijkuakon tokniuan ayakmo okachi omouikayaj iuan non tokni uan san okinotsayaj ijkuak omonechikouayaj uan ijkuak otetlapouiayaj.
Pero axkan tikajsikamatij tlen kijtosneki tlen okijto Pablo. Kijtosneki moneki tisejse tikpejpenaskej tlen tikchiuaskej ijkuak se tokni itlaj kichiua. Ikinon tlayekankej ayakmo kitemakaskej se tlamachtil para technejmachtiskej. ¿Tleka omopatlak tlen otikajsikamatiayaj? Matikitakan tlen opanotoka ijkuak Pablo okijto non tlajtoli.
Pablo okijto sekimej tokniuan tlen okatkaj itech tlanechikol ‘amo otetlakamatiayaj’. Ye okinmilui tlen kijtoua iTlajtol toTajtsin Dios pero yejuan amo okichiuayaj. Ye okinmiluijka ijkuak okintlajpalotoya: “Amo matlakua akin amo kineki tekipanos”. Sekimej amo otekipanouayaj porque otlatsiuiayaj. Noijki omokajkalakiayaj kanin amo okinnotsayaj. ¿Tlen okichiuayaj tokniuan ijkuak ikaj amo otetlakamatiaya? (2 Tes. 3:6, 10-12).
Pablo okijto: “Kuali xikitakan akin ijkon kichiua”. Nin tlajtoli ika griego kijtosneki kuali kitaskiaj akin ijkon okichiuaya uan momaluiskiaj para amo kichiuaskiaj ijkon ken ye okichiuaya. Non tlanauatil omonekiaya kitlakamatiskej nochtin tokniuan uan amo san tlayekankej ijkon kichiuaskiaj (2 Tes. 1:1; 3:6). Ikinon ijkuak se tokni okitaya ikaj amo okitlakamatiaya iTlajtol toTajtsin Dios, ye okipejpenaya kox mouikas iuan akin ijkon okichiuaya.
¿Kijtosneki ayakmo iuan mouikaskiaj ijkon ken ijkuak ikaj ayakmo poui itech tlanechikol? Amo. Porque Pablo okijto: “Xiknejmachtikan ken se tokni”. Ikinon sejse tokni ok iuan omotlapouiayaj non tokni ijkuak omonechikouayaj uan ijkuak otetlapouiayaj. Pero amo iuan oyayaj ijkuak omoyolpaktiaya noso ijkuak okichiuaya okseki tlamantli. Pablo okijto omonekiaya ijkon kichiuaskej “para mapinaua” akin amo okitlakamatiaya iTlajtol toTajtsin Dios. Ijkon non tokni pinauaskia uan kipatlaskia inemilis (2 Tes. 3:14, 15).
¿Ken uelis tikchiuaskej tlen okijto Pablo? Moneki achto matikitakan kox non tokni melauak amo tetlakamati ijkon ken okijto Pablo. Ye amo okijto akinmej kipejpenaj kichiuaskej okse tlamantli porque tlatlamantli mokuayejyekouaj noso kinpaktia kichiuaskej okseki tlamantli. Noijki amo okijtojtoka akinmej itlaj otechtoktijkej uan otechyolkoko. Ye okijtojtoka akinmej yimiak uelta yokinmiluijkaj tlen omonekiaya kichiuaskej pero amo otetlakamatiayaj.
Tla tikitaj se tokni amo kitlakamati iTlajtol toTajtsin Dios, a tisejse tikijtoskej amo iuan timoyolpaktiskej nion iuan tikchiuaskej okseki tlamantli. Pero amo matikinmiluikan akinmej amo pouij itech tofamilia tlen otikijtojkej tikchiuaskej porque toselti ijkon otikijtojkej. Pero ok iuan timotlapouiskej ijkuak timonechikoskej uan ijkuak titetlapouiskej. Tla kipatlas inemilis oksepa iuan timouikaskej.
a Ayakmo timouikaskej iuan tokni tlen tlatsiui tekipanos, akin amo kineki kikauas inovio noso inovia tlen amo iTlaixpantijka Jehová, akin amo kipaktia tlen technauatiaj itech tlanechikol noso tlen tlamachtia Biblia uan tlateneua (1 Cor. 7:39; 2 Cor. 6:14; 2 Tes. 3:11, 12; 1 Tim. 5:13). ‘Amo tetlakamati’ akin ijkon kichiua.
